Հարգելի Մանուշակ,
ԵՊՀ կարող է դիմել միջնակարգ կրթություն ստացած յուրաքանչյուր դիմորդ: Եթե հաջորդ տարի ավարտեք դպրոցը, ապա Դուք կարող եք դիմել եւ մասնակցել ընդունելության քննություններին:

Հարգելի Տաթեւիկ,
Իրավագիտության ֆակուլտետի մագիստրատուրայում կարող են սովորել այն ուսանողները, ովքեր բակալավրիատում ստացել են իրավաբանական կրթություն: Ընդունվելու համար այդ ուսանողները պետք է հանձնեն ընդունելության քննություն բակալավրի պետական քննության ծրագրով: ԵՊՀ-ում մագիստրատուրայի առկա ընդունելությունն արդեն ավարտվել է: Դուք կարող եք դիմել` հեռակա ուսուցման համակարգով ուսուցումը շարունակելու համար:

Հարգելի Անի,
Եթե Դուք ներկայացնեք տեղեկանք, որ Ձեր քույրը Գեղարվեստի պետական ակադեմիայում սովորում է վճարովի համակարգում եւ Դուք սովորում ենք առանց լուծարքների, ապա, համաձայն ԵՊՀ կանոնակարգի, Դուք կստանաք ուսման վարձի 20% զեղչի իրավունք:

Հեռակա ուսուցման համակարգի ընդունելությունը իրականացվելու է մրցութային կարգով: Եթե Ձեր միավորները բավարարեն, ապա դուք կընդունվեք, իսկ եթե միավորները ցածր լինեն, ապա ցանկալի է, որ գործերը հանձնելիս (մինչեւ սեպտեմբերի 20-ը) Ձեր ստացած ցածր միավորները վերահանձնեք եւ ավելի բարձր միավորներ ստանաք: Տեղափոխությունները իրականացվում են մեկ տարի սովորելուց հետո, եւ հաշվի է առնվում ուսանողի առաջադիմությունը: Առկա ուսուցման համակարգ տեղափոխությունը նույնպես օրենքով թույլատրելի է: Տեղափոխության համար կարող եք դիմումով դիմել ԵՊՀ ռեկտորին: Տեղափոխության վերջնական որոշումը կայացնում է ռեկտորը:

Հարգելի Վիգեն,
Դասերից ազատվում են միայն հարգելի պատճառներով: Դրա համար անհրաժեշտ է, որ Դուք դիմումով դիմեք ԵՊՀ ռեկտորին, եւ ռեկտորի թույլատրությունը ստանալու դեպքում Ձեր բացակայությունները կհամարվեն հարգելի: Եթե ուսանողը բացակայում է անհարգելի պատճառներով, ապա նրա բոլոր բացակայությունները կարող են ազդել նրա առաջադիմության վրա եւ նույնիսկ կարգապահական տույժի առիթ դառնան:

Հարգելի Սոնա,
Ռոտացիան իրականացվում է տարին մեկ անգամ: Այս տարվա առաջին կուրսեցիների համար այն կիրականացվի հաջորդ տարի մինչեւ սեպտեմբերի 15-ը: Զեղչերի համակարգին կարող եք ծանոթանալ ինչպես Ձեզ տրված առաջին կուրսեցիների փաթեթից, այնպես էլ` ԵՊՀ պաշտոնական կայքից: