Հիմնադրաման օրվանից մինչ այժմ Ուսանողական խորհուրդն ունեցել է հինգ գումարում: Խորհրդի ղեկավար բարձրագույն մարմինը Ուսանողական խորհրդի համագումարն է, որին յուրաքանչյուր ֆակուլտետ, իր ուսանողների թվաքանակին համապատասխան, ընտրում է համագումարի պատվիրակներ:

Խորհուրդն իր սկզբնական ստորաբաժանումներն ունի համալսարանի բոլոր ֆակուլտետներում: Ուսանողական խորհրդի գործունեության հիմնական նպատակը ուսանողների իրավունքների եւ շահերի պաշտպանությունն է, որն իրականացվում է համալսարանի ղեկավար մարմիններում խորհրդի ներկայացուցիչ-պատվիրակների միջոցով: ՈւԽ գործառույթներից է նաեւ ուսանողների ժամանցի, հանգստի, ներհամալսարանական կյանքի կազմակերպումը:

Ուսանողական խորհրդի նախագահը ԵՊՀ գիտական խորհրդի անդամ է:
Իր գործունեության ընթացքում ուսխորհուրդը մշտապես պաշտպանել եւ պաշտպանում է ուսանողների շահերն ու իրավունքները, փորձում է, որքան հնարավոր է, իր շարքերը դարձնել կուռ ու համախմբված եւ անում է հնարավորը` առկա հավատն ու վստահությունն ամրապնդելու համար:

2001-2002 թթ-ին ուսանողական խորհրդի եւ Համահայկական երիտասարդական հիմնադրամի ջանքերով համալսարանում գործարկվել է «Ուսանողի ձայն» ռադիոկայանը, որը տեղեկատվական մեծ նշանակություն ունեցավ ուսանողների համար:

2004 թ-ի դեկտեմբերի 16-ին ԵՊՀ ՈւԽ նախագահ է ընտրվել միջազգային հարաբերությունների ֆակուլտետի ՈւԽ նախագահության անդամ Միհրան Հակոբյանը: ԵՊՀ ՈւԽ նախագահությունը բաղկացած է 28 անդամից, խորհրդակցական ձայնի իրավունքով ՈւԽ նիստերին մասնակցում են նաեւ ֆակուլտետների ՈւԽ նախագահները:

Ուսխորհուրդն ունի 7 հանձնաժողով` մշակույթի եւ սպորտի, հասարակայնության հետ կապերի եւ լրատվության, արտաքին կապերի, իրավական, գիտակրթական, ֆինանսատնտեսական, սոցիալական:

Ներհամալսարանական միջոցառումներին ու ծրագրերին մասնակցելուց զատ, ԵՊՀ ՈւԽ անդամներն ակտիվորեն մասնակցում են նաեւ համաերիտասարդական, միջբուհական միջոցառումներին եւ ակցիաներին:

ԵՊՀ ՈւԽ գործառույթներն են.

• ուսանողների խնդիրների ներկայացումը բուհի վարչակազմին
  
• ուսանողների իրավունքների պաշտպանությունը
  
• կարիքավոր ուսանողներին սոցիալական աջակցության հնարավորությունների ստեղծումը
  
• տաղանդավոր եւ շնորհալի ուսանողների հայտնաբերումն ու բացահայտումը
  
• ուսանողների ամառային եւ ձմեռային հանգստի կազմակերպումը
  
• ուսանողական կյանքի հանդեպ ուսանողների հետաքրքրության խթանումը

ԵՊՀ գիտխորհրդի որոշմամբ` ֆակուլտետների ՈւԽ նախագահներն ի պաշտոնե հանդիսանում են ֆակուլտետի խորհրդի, իսկ համալսարանի ՈւԽ նախագահը` ԵՊՀ գիտխորհրդի անդամ:

2006 թ-ի դեկտեմբերի 15-ից մինչեւ 2008 թ-ի հունիսի 7-ը ԵՊՀ ՈւԽ նախագահ է եղել ինֆորմատիկայի եւ կիրառական մաթեմատիկայի ֆակուլտետի ՈւԽ նախագահության անդամ Համլետ Մանուկյանը:

2008 թ-ի հունիսի 7-ից ԵՊՀ ՈւԽ նախագահ է ընտրվել միջազգային հարաբերությունների ֆակուլտետի ՈւԽ նախագահ, ՈւԽ նախագահության անդամ Ցոլակ Ակոպյանը: