26.09.2018 | 
Հասարակություն
ԱՎԱՐՏՎԵՑ «ՏԵՂԱՀԱՆՎԱԾ ՀԱՅ ԵՐԻՏԱՍԱՐԴ ՄԱՍՆԱԳԵՏՆԵՐԻ ԱՇԽԱՏԱՆՔԻ ԱՋԱԿՑՈՒՄ» ԾՐԱԳԻՐԸ
ԱՎԱՐՏՎԵՑ «ՏԵՂԱՀԱՆՎԱԾ ՀԱՅ ԵՐԻՏԱՍԱՐԴ ՄԱՍՆԱԳԵՏՆԵՐԻ ԱՇԽԱՏԱՆՔԻ ԱՋԱԿՑՈՒՄ» ԾՐԱԳԻՐԸ
Այսօր Ադամյան սրահում տեղի ունեցավ ԵՊՀ շրջանավարտների և կարիերայի կենտրոնի ու «Վորլդ Վիժն Հայաստան» միջազգային բարեգործական կազմակերպության համագործակցությամբ իրականացվող ծրագրի փակման արարողությունը:

«Տեղահանված հայ երիտասարդ մասնագետների աշխատանքի աջակցում» ծրագրի նպատակը հակամարտության գոտիներից, հատկապես՝ Սիրիայից և Ուկրաինայից, ինչպես նաև Ջավախքից Հայաստան տեղափոխված և բարձրագույն կրթություն ունեցող երիտասարդներին ծանոթացնել հայկական աշխատաշուկայի առանձնահատկություններին:

Ծրագրի պաշտոնական փակմանը ներկա էին Շրջանավարտների և կարիերայի կենտրոնի փոխտնօրեն Կարինե Նազարյանը, կենտրոնի ներկայացուցիչները, «Վորլդ Վիժն Հայաստան» միջազգային բարեգործական կազմակերպության «Զբաղվածության ավելի մեծ հնարավորություններ Հայաստան տեղահանված երիտասարդների համար» ծրագրի համակարգողներ Լորիգ Հալեբիանը և Անի Ջուղեցյանը:

ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանն իր խոսքում նշեց. «Լավագույն արդյունքի մասին խոսում է այն փաստը, որ փակման արարողությանը քիչ մարդ է ներկա: Դա նշանակում է, որ ծրագիրը հասել է իր նպատակին. երիտասարդ մասնագետներն անցել են աշխատանքի:

Իսկ ցանկացած ծրագիր ունի սկիզբ, ընթացք ու վերջ, սակայն մենք միևնույն է կշարունակենք ձեզ հետ աշխատել, դուք մշտապես մեր շատ սպասված շահառուներն եք և անընդհատ ստանալու եք առաջարկներ մեր կողմից»:

«Լավագույն հավաստագիրն այն է, որ շատերդ այսօր աշխատանք ունեք: Կրթությունը, վերապատրաստումը, մշտական կատարելագործումը, նոր հմտությունների ձեռքբերումը մեզ համար պետք է լինեն մշտական գործընթաց, և չպետք է դադարենք դրանց ուշադրություն դարձնել»,- ասաց ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը:

Նա նաև նշեց, որ տեղահանվածները և հայաստանաբնակները չեն առանձնացվել, ինչը հնարավորություն տվեց զարգացնելու միջմշակութային շփումները:

Հանդիպման ավարտին ծրագրի 46 մասնակիցները ստացան հավաստագրեր:

Հիշեցնենք, որ «Վորլդ Վիժն Հայաստան» կազմակերպության գործառնությունների ղեկավար Շաղիկ Մարուխյանի հետ համագործակցության հուշագիրը ստորագրվել էր մարտին:

«Տեղահանված հայ երիտասարդ մասնագետների աշխատանքի աջակցում» ծրագիրը մեկնարկել էր ապրիլին, որի արդյունքում Հայաստանում վերահաստատված երիտասարդները հնարավորություն ստացան ԵՊՀ-ում մասնակցելու հատուկ դասընթացների:
Ծրագիրն ամբողջությամբ ֆինանսավորում է ԱՄՆ պետդեպարտամենտի բնակչության, փախստականների և միգրացիայի բյուրոյի կողմից:


Մարի Ռաֆյան

Այլ նորություններ
«ԺԱՄԱՆԱԿԱԿԻՑ ԱՇԽԱՐՀՈՒՄ ՄՐՑԱԿՑՈՒԹՅԱՆ ԴՈՄԻՆԱՆՏ ԱՌԱՐԿԱՆ ԱՅԼԵՎՍ ՆՅՈՒԹԱԿԱՆ ՀԻՄՔԸ ՉԷ». ԼԻԼԻԹ ՇԱՔԱՐՅԱՆ
ԵՊՀ սոցիալական աշխատանքի և սոցիալական տեխնոլոգիաների ամբիոնի դասախոս Լիլիթ Շաքարյանը հրատարակել է իր երկրորդ՝ «Հաղորդակցության մարտահրավերները տեղեկատվական հասարակությունում» գիրքը, որտեղ դիտարկվել են տեղեկատվական հեղափոխության դերն ու նշանակությունը մարդկության և հասարակական ոլորտների զարգացման գործընթացում: Տիկին Շաքարյանի հետ զրուցել ենք գրքի, դրանում արծարծված թեմաների ու առաջիկա ծրագրերի մասին:
«ԱՐՑԱԽԸ ԵՎ ՄԻՋԱԶԳԱՅԻՆ ՔՐԵԱԿԱՆ ԴԱՏԱՐԱՆԸ. ՆՈՐ ՀԵՌԱՆԿԱՐՆԵՐ». ԱՌՑԱՆՑ ՍԵՄԻՆԱՐ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի ՈՒԳԸ-ի նախաձեռնությամբ տեղի է ունեցել «Արցախը և միջազգային քրեական դատարանը. նոր հեռանկարներ» խորագրով առցանց սեմինար, որը վարել է Միջազգային քրեական դատարանի ավագ դատական ծառայող Էդուարդո Տոլեդոն։