06.04.2010 | 
Ուսանողական, Հասարակություն
ՏԵՂԵԿԱՑՎԱԾ ԼԻՆԵԼԸ ԶԵՐԾ Է ՊԱՀՈՒՄ ԹՐԱՖԻՔԻՆԳԻՑ
ՏԵՂԵԿԱՑՎԱԾ ԼԻՆԵԼԸ ԶԵՐԾ Է ՊԱՀՈՒՄ ԹՐԱՖԻՔԻՆԳԻՑ
Ուսանողները տեղեկատվություն ստացան թրաֆիքինգի հետեւանքով առաջացած վտանգների եւ դրանցից խուսափելու վերաբերյալ:

ԵՊՀ շրջանավարտների եւ կարիերայի կենտրոնը, «Դեմոկրատիան այսօր» հասարակական կազմակերպությունն ու «Միավորված մեթոդիստների օգնության կոմիտեն» կազմակերպել էին «Թրաֆիքինգի գործոնը` որպես կարիերայի զարգացման խոչընդոտ» խորագրով սեմինար-դասընթաց:

 

«Դեմոկրատիան այսօր» հ/կ-ի` թրաֆիքինգի դեմ պայքարի ծրագրի ղեկավար Հասմիկ Էդիլյանն ուսանողներին մանրամասն ներկայացրեց, թե ինչպես պետք է խուսափել թրաֆիքինգի վտանգներից: Աշխատանքի առաջարկից բացի, թրաֆիքինգի դեպքեր են հանդիպում արտերկրում ուսումը շարունակելու կամ օտարերկրացու հետ ամուսնանալու պարագայում: Տիկին Էդիլյանն ուսանողներին խորհուրդ տվեց կյանքն արտասահմանցու հետ կապելուց առաջ ուշադրությամբ ուսումնասիրել տվյալ երկրի օրենդրությունը: Արտերկիր մեկնելուց առաջ պետք է ունենալ տվյալ երկրում գործող միջազգային կազմակերպությունների, Հայաստանի հյուպատոսարանների ու հայկական եկեղեցիների կոնտակտային տվյալները: «Հաճախ երիտասարդները ոգեւորվում են լավ աշխատանք ունենալու գայթակղությունից եւ անիրազեկվածության պատճառով փաստի առջեւ են կանգնում»,- նշում են ոլորտի փորձագետները եւ ուսանողներին հորդորում նման դեպքերում զգույշ գործել:

 

«Միավորված մեթոդիստների օգնության կոմիտեի» կոորդինատոր Վիկտորիա Ավակովան ասում է, որ թրաֆիքինգի ենթարկված հայերի մեծ մասը երիտասարդներ են, եւ մեր երկրում հանդիպում են նաեւ ներքին թրաֆիքինգի դեպքեր, երբ մարզերից գալիս են մայրաքաղաք աշխատելու: ԵՊՀ շրջանավարտների եւ կարիերայի կենտրոնի փոխտնօրեն Կարինե Նազարյանը եւս փաստում է, որ թրաֆիքինգի թեման արդիական է հատկապես երիտասարդների համար:

 

«Աշխատանք փնտրող երիտասարդները հաճախ են ընկնում մոլորության մեջ, ուստի նմանօրինակ դասընթացները նպաստում են, որպեսզի ուսանողներն աշխատանք ընտրելուց առաջ ճիշտ կողմնորոշվեն»,- ասում է Կարինե Նազարյանը: Նշենք, որ այս խորագրերով սեմինարներ ԵՊՀ շրջանավարտների եւ կարիերայի կենտրոնը պարբերաբար է կազմակերպում, եւ հաշվի առնելով ուսանողների հետաքրքրվածությունը` անհրաժեշտություն առաջացավ եւս մեկ անգամ սեմինար կազմակերպելու:

 

Ուսանողներին բաժանվեցին գրքույկներ ու բուկլետներ, որոնցում նշված էին թրաֆիքինգից խուսափելու մեթոդներն ու թեժ գծի հեռախոսահամարը, որով կարելի է զրուցել մասնագետների հետ եւ խորհուրդներ ստանալ: Վերջում ցուցադրվեց իրական պատմությունների հիման վրա նկարահանված ֆիլմ:

Այլ նորություններ
ԸՆՏՐՈՒԹՅՈՒՆՆԵՐԻ ԵՎ ՀԱՆՐԱՔՎԵՆԵՐԻ ՆԿԱՏՄԱՄԲ ՄԻՋԱԶԳԱՅԻՆ ՀՍԿՈՂՈՒԹՅՈՒՆԸ. ՍԵՄԻՆԱՐ ԵՊՀ-ՈՒՄ
ԵՊՀ իրավագիտության ֆակուլտետի նախաձեռնությամբ դասախոսությամբ է հանդես եկել ԱՊՀ միջխորհրդարանական վեհաժողովի խորհրդի քարտուղարության ղեկավարի տեղակալ, Ժողովրդավարության, պառլամենտարիզմի զարգացման և ԱՊՀ երկրների քաղաքացիների ընտրական իրավունքների պաշտպանության մոնիթորինգի միջազգային ինստիտուտի տնօրեն Մուշկետ Իվան Իլիչը։
«ՄԵԾԱՊԵՍ ԱՐԺԵՎՈՐՈՒՄ ԵՄ ՇԱՐՈՒՆԱԿԱԿԱՆ ԿՐԹՈՒԹՅՈՒՆԸ, ԵՎ ԵԹԵ ՄԵՆՔ ԿԱՐՈՂԱՆԱՆՔ ՈՒՍԱՆՈՂՆԵՐԻՆ ԱՅԴ ՈՒՂՈՒ ՎՐԱ ԴՆԵԼ, ՄԵՐ ԱՌԱՔԵԼՈՒԹՅՈՒՆԸ ԿԱՐԵԼԻ Է ՀԱՋՈՂՎԱԾ ՀԱՄԱՐԵԼ ». ԼԻԼԻԹ ՍԱՐԳՍՅԱՆ
ԵՊՀ եվրոպական լեզուների և հաղորդակցության ֆակուլտետի անգլերենի թիվ 2 ամբիոնի դոցենտ Լիլիթ Սարգսյանը «Երևանի պետական համալսարանում դասավանդման գերազանցության մրցանակ» ամենամյա մրցույթի բանասիրական անվանակարգի հաղթողներից մեկն է: Տիկին Սարգսյանի հետ զրուցել ենք մանկավարժական ու գիտական գործունեության, կրթության և գիտության ոլորտների հիմնախնդիրների, դրանց լուծման ճանապարհների և այլ թեմաների մասին: