24.10.2006 | 
Հասարակություն
ՈՒՍԱՆՈՂ ԱՌԱՆՑ ԲՈՒՀԻ
ՈՒՍԱՆՈՂ ԱՌԱՆՑ ԲՈՒՀԻ
Շատ շուտով ուսանողներն, առանց դասերի հաճախելու, կանցնեն բուհական որեւէ դասընթաց` իրենց տանը նստած:

Ժամանակակից բարձրագույն տեխնոլոգիաները զարգացել են այնպես, որ այն կարող է իրականություն դառնալ շատ մոտ ապագայում: Երեւանի պետական համալսարանի Սարգիս եւ Մարի Իզմիրլյանների անվան գրադարանում Եվրամիության «Տեմպուս» ծրագրի շրջանակներում իրականացվում է նախագիծ, որի արդյունքում ԵՊՀ գրադարանում կներդրվի թվային կրթական պաշարների ձեւավորման միջավայր, ինչպես նաեւ` կպատրաստվեն հեռաուսուցման դասընթացներ:

Հոկտեմբերի 24-ին ԵՊՀ ռեկտորատը եւ «Տեմպուս»-ի հայաստանյան գրասենյակի ներկայացուցիչները վկայականներ շնորհեցին ԵՊՀ գրադարանում անցկացված դասախոսների վերապատրաստման երկշաբաթյա դասընթացի մասնակիցներին: ԵՊՀ պրոռեկտոր Ալեքսանդր Գրիգորյանը նշեց, որ ԵՊՀ-ի եւ «Տեմպուսի» միջեւ համագործակցությունը սկսվել է երկու տարի առաջ. «ԵՊՀ գրադարանը մոտ 194 հազար եվրո գրանտ է շահել Եվրամությունից` մեր բուհի գրադարանը համակարգչայնացնելու եւ այն կիրառելու հմտություն ձեռք բերելու համար»: Նա ավելացրեց, որ ԵՊՀ ղեկավարությունը մտադիր է բուհում ստեղծել հեռաուսուցման համակարգ` հատկապես հաշվի առնելով ԵՊՀ Իջեւանի մասնաճյուղի, հայկական Սփյուռքի առկայությունը:

«Հեռաուսուցման դաընթացները շատ կարեւոր են ԵՊՀ-ի` Բոլոնիայի գործընթացին ինտեգրվելու ճանապարհին,- ասաց ծրագրի պատասխանատու Տիգրան Զարգարյանը:- Այս դասընթացներին մասնակցել են ԵՊՀ 10-12 ֆակուլտետի 27 դասախոսներ: Դասընթացը շարունակական է լինելու եւ ավարտվելու է 2007 թ. օգոստոսին»:

Ալեքսանդր Գրիգորյանի խոսքով` բոլոր մասնակիցներն էլ երիտասարդ են ու հեռանկարային: Բացի տվյալ համակարգից օգտվելու կարողությունը, այս ծրագրին մասնակցած դասախոսները սեփական դասընթաց պատրաստելու հմտություններ ձեռք կբերեն:

Ըստ «Տեմպուս»-ի հայաստանյան գրասենյակի ներկայաուցիչ Լանա Կարլովայի` գրադարանին նվիրված ծրագիր կազմակերպությունն առաջին անգամ է իրականացնում: «Հուսով եմ` այն լավ օրինակ կլինի, ու նման ծրագրեր կիրագործվեն նաեւ այլ բուհերում: Գրադարանը բավական մեծ ու բարդ կառույց է, ու նրա համակարգչայնացումը կարեւոր եւ օգտակար կլինի բոլորիս համար»:

Առիթն օգտագործելով` «Գրադարանավարի օրվա» առթիվ ԵՊՀ ղեկավարությունը պատվոգրեր հանձնեց գրադարանի աշխատակիցներին: «Շատ կարեւոր է, որ արած գործը տեսնեն ու գնահատեն»,- ասաց ԵՊՀ գրադարանի տնօրեն Աշոտ Ալեքսանյանը: Պատվոգրեր ստացան գրադարանային գործում երկարամյա փորձ ունեցող եւ մեծ ավանդ ներդրած աշխատակիցները:

Այլ նորություններ
«ԵՐԿԻՐԸ ԱՐՏԵՐԿՐԵՆ». ԳՐՔԻ ՇՆՈՐՀԱՆԴԵՍ ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏՈՒՄ
ԵՊՀ հայ բանասիրության ֆակուլտետում այսօր տեղի է ունեցել սփյուռքահայ մտավորական, հրապարակախոս Վաչե Բրուտյանի «Երկիրը Արտերկրեն» գրքի շնորհանդեսը։
«ԿՅԱՆՔԻ ՆԵՐԿԱՅԻՍ ՄԱՐՏԱՀՐԱՎԵՐՆԵՐԻ ՊԱՅՄԱՆՆԵՐՈՒՄ ԿՑԱՆԿԱՆԱՅԻ ՍԵՐՏԱՑՆԵԼ ԿՐԹՈՒԹՅԱՆ ԵՎ ԳԻՏՈՒԹՅԱՆ ԿԱՊԸ». ՄԱՐԻՆԵ ՅԱՂՈՒԲՅԱՆ
ԵՊՀ եվրոպական լեզուների և հաղորդակցության ֆակուլտետի միջմշակութային հաղորդակցության անգլերենի ամբիոնի դոցենտ Մարինե Յաղուբյանը «Երևանի պետական համալսարանում դասավանդման գերազանցության մրցանակ» ամենամյա մրցույթի բանասիրական անվանակարգի հաղթողներից մեկն է: Տիկին Յաղուբյանի հետ զրուցել ենք մասնագիտական գործունեության, կրթության և գիտության ոլորտների հիմնախնդիրների և այլ թեմաների մասին: