03.12.2010 | 
Հասարակություն, Մշակույթ
«ՇԱՀԱՆԵ՛, ԴՈՒ Ի՛Մ ՇԱՀԱՆԵ…»
«ՇԱՀԱՆԵ՛, ԴՈՒ Ի՛Մ ՇԱՀԱՆԵ…»
ԵՊՀ ռուսական կենտրոնում այսօր նշում էին Սերգեյ Եսենինի ծննդյան 115-ամյակը:

Ռուս մեծանուն գրողի պոեզիան հարազատ է բոլոր ժամանակներում ու բոլոր սերունդներին, բայց այն իր անկեղծությամբ ու զգացմունքների առատությամբ դիպչում է հատկապես երիտասարդների սրտերին: Հենց նրանք էլ այսօր ԵՊՀ ռուսական կենտրոնում ներկայացրին «իրենց Եսենինին»: Պոետի 115-ամյակին նվիրված գրական-երաժշտական միջոցառումը կազմակերպել էր ռուսաց լեզվի դասախոս Տատյանա Աֆանասեւան Կենսաբանության ֆակուլտետի երկրորդ եւ երրորդ կուրսերի մի խումբ ուսանողների հետ: 21 հոգուց բաղկացած այս խմբում հիմնականում այն երիտասարդներն են, ովքեր դժվարությամբ են հաղորդակցվում ռուսերենով: «Այս մեկ ամսվա ընթացքում ես հետեւել եմ նրանց փորձերին ու տեսել, թե ինչ տիտանական աշխատանք է կատարվել»,- նշեց ԵՊՀ ռուսական կենտրոնի տնօրեն Արուսյակ Ներսեսյանը:

 

Եսենինյան այս միջոցառումն այսօր առաջին անգամ հանձնվեց հանդիսատեսի դատին, որոնց շարքերում էին նաեւ Ռուս բանասիրության ֆակուլտետի դեկան Պավել Բալայանն ու Հայաստանի հետ բարեկամության եւ համագործակցության ռուսաստանյան ընկերության ներկայացուցիչ Վլադիմիր Զյուրուկինը: Առաջիկայում այն կներկայացվի նաեւ ավելի մեծ լսարանում, որպեսզի Եսենինը հասանելի դառնա ամենքին: Թեեւ Սերգեյ Եսենինի ստեղծագործություններն ուսանողներին ծանոթ են դեռեւս դպրոցական տարիներից, բայց մասնակիցները նշում էին, որ շատ բանաստեղծություններ ու պոետի մասին կենսագրական տվյալներ իրենց համար բացահայտել են հենց այս միջոցառմանը պատրաստվելու ընթացքում:

 

«Հետաքրքրական էր հատկապես հայուհի Շահանեի ու Եսենինի սիրո պատմությունը»,- նկատեց ուսանողուհիներից մեկը: Սերգեյ Եսենինը ծնվել է 1895 թ-ին Ռյազանի նահանգի Կոնստանտիվո գյուղում։ Գրել սկսել է 9 տարեկանից, բայց իբրեւ պոետ` իր առաջին քայլերի սկիզբը ինքը` պոետը, համարում է 16-17 տարեկան հասակը: 1912 թ-ին Եսենինը տեղափոխվում է Մոսկվա, 1913-ին որպես ազատ ունկնդիր հաճախում է Շանյավսկու համալսարանը: Նրա բանաստեղծություններն իրենց թարմությամբ եւ ինքնատիպությամբ մեծ տպավորություն են թողնում ժամանակակիցների վրա: 1922-23 թթ. ամուսնանալով աշխարհահռչակ պարուհի Այսեդորա Դունկանի հետ` ճանապարհորդում է նրա հետ Եվրոպայում եւ Ամերիկայում: 1925 թ-ին Լենինգրադի «Անգլետեր» հյուրանոցում ծանր ապրումների ճնշման տակ նա վերջ է տալիս իր բուռն ու խելահեղ կյանքին:

Այլ նորություններ
ԸՆՏՐՈՒԹՅՈՒՆՆԵՐԻ ԵՎ ՀԱՆՐԱՔՎԵՆԵՐԻ ՆԿԱՏՄԱՄԲ ՄԻՋԱԶԳԱՅԻՆ ՀՍԿՈՂՈՒԹՅՈՒՆԸ. ՍԵՄԻՆԱՐ ԵՊՀ-ՈՒՄ
ԵՊՀ իրավագիտության ֆակուլտետի նախաձեռնությամբ դասախոսությամբ է հանդես եկել ԱՊՀ միջխորհրդարանական վեհաժողովի խորհրդի քարտուղարության ղեկավարի տեղակալ, Ժողովրդավարության, պառլամենտարիզմի զարգացման և ԱՊՀ երկրների քաղաքացիների ընտրական իրավունքների պաշտպանության մոնիթորինգի միջազգային ինստիտուտի տնօրեն Մուշկետ Իվան Իլիչը։
«ՄԵԾԱՊԵՍ ԱՐԺԵՎՈՐՈՒՄ ԵՄ ՇԱՐՈՒՆԱԿԱԿԱՆ ԿՐԹՈՒԹՅՈՒՆԸ, ԵՎ ԵԹԵ ՄԵՆՔ ԿԱՐՈՂԱՆԱՆՔ ՈՒՍԱՆՈՂՆԵՐԻՆ ԱՅԴ ՈՒՂՈՒ ՎՐԱ ԴՆԵԼ, ՄԵՐ ԱՌԱՔԵԼՈՒԹՅՈՒՆԸ ԿԱՐԵԼԻ Է ՀԱՋՈՂՎԱԾ ՀԱՄԱՐԵԼ ». ԼԻԼԻԹ ՍԱՐԳՍՅԱՆ
ԵՊՀ եվրոպական լեզուների և հաղորդակցության ֆակուլտետի անգլերենի թիվ 2 ամբիոնի դոցենտ Լիլիթ Սարգսյանը «Երևանի պետական համալսարանում դասավանդման գերազանցության մրցանակ» ամենամյա մրցույթի բանասիրական անվանակարգի հաղթողներից մեկն է: Տիկին Սարգսյանի հետ զրուցել ենք մանկավարժական ու գիտական գործունեության, կրթության և գիտության ոլորտների հիմնախնդիրների, դրանց լուծման ճանապարհների և այլ թեմաների մասին: