20.09.2018 | 
Ուսանողական
ՈՒՍԱՆՈՂԱԿԱՆ ԽՈՐՀՈՒՐԴՆ ԱՄՓՈՓԵՑ ԻՐԱԿԱՆԱՑՐԱԾ ԱՇԽԱՏԱՆՔՆԵՐԸ
ՈՒՍԱՆՈՂԱԿԱՆ ԽՈՐՀՈՒՐԴՆ ԱՄՓՈՓԵՑ ԻՐԱԿԱՆԱՑՐԱԾ ԱՇԽԱՏԱՆՔՆԵՐԸ
Այսօր ԵՊՀ կենտրոնական մասնաշենքի մեծ դահլիճում 3 օրակարգային և ընթացիկ հարցերով տեղի ունեցավ ԵՊՀ ՈՒԽ համագումար նիստը:

Նիստի օրակարգում ներառված էին ՈՒԽ նախագահ Դավիթ Ափոյանի 2017-18 ուստարվա հաշվետվությունը, ՈՒԽ նախագահության կազմի հաստատմումը, վերստուգիչ հանձնաժողովի հաշվետվության ներկայացումը և նոր կազմի ընտրությունը:

 

Անդրադառնալով ուստարվա հաշվետվությանը՝ Դավիթ Ափոյանը տեղեկացրեց, որ կառույցի նախագահ է դարձել 2018 թվականի հունվարից, այդ պատճառով կներկայացնի այն աշխատանքները, որոնք իրականացվել են հունվար ամսից մինչև օգոստոս ամիսը ներառյալ ընկած ժամանակահատվածում: 

 

ՈՒԽ նախագահը հաշվետվության ընթացքում անդրադարձավ այն հիմնական խնդիրներին, որոնց մասին բարձրաձայնել է կառույցը և հետևել դրանց լուծմանն ուղղված աշխատանքներին, ապա նաև ներկայացրեց կազմակերպված տարաբնույթ միջոցառումները:

 

Դավիթ Ափոյանը փաստեց, որ իրենց պահանջով ԵՊՀ գրադարաններում տեղադրվել են սկանավորման սարքեր, որոնք լուծելու են մասնագիտական գրքերի թվաքանակի պակասի խնդիրը, ինչպես նաև տեղադրվել են նոր սեղաններ և աթոռներ, որոնք էլ առավել հարմարավետ են դարձրել գրադարանից օգտվելու հնարավորությունները:

 

Բացի այդ՝ ուսանողների չբարձրաձայնած պահանջի համաձայն՝ գրադարանի աշխատաժամերը երկարացվել են մինչև 19:00-ը, բայց, ինչպես նշեց ՈՒԽ նախագահը, ուսանողների հաճախելիությունը ժամը 17:00-ից հետո շատ քիչ է. գրեթե զրոյական. «Գուցե խնդիրը գրականության պակասն է կամ համապատասխան մթնոլորտի բացակայությունը: Մեր առաջիկա ծրագրերի մեջ ներառել ենք այդ խնդիրների լուծումը»:

 

«Մեր պահանջով բոլոր դեկանատներում առկա են առաջին բուժօգնության պարագաներ: Կառույցի շնորհիվ բարելավվեցին նաև ուսանողական էլեկտրոնային հասցեները. այժմ ուսանողները հնարավորություն ունեն օգտագործելու այլընտրանքային էլեկտրոնային հասցեներ: Կենսաբանության ֆակուլտետի արտադրական պրակտիկայի ժամանակ մենք լուծեցինք ուսանողների կեցության և սննդի հարցը, մեր շնորհիվ ԵՊՀ աշխարհագրության և երկրաբանության ֆակուլտետի մասնաշենքում իրականացվեցին վերանորոգման աշխատանքներ, լուծվեց ֆակուլտետի Սերվիս բաժնի պրակտիկայի հարցը: Մենք լուծեցինք նաև ուսանողական ճաշարանների գների հարցը: 3 օր առաջ էլ ստացել ենք wi-fi-ի նոր սարքեր, որոնք միաժամանակ 500 ուսանողների հնարավորություն կտան օգտվելու ինտերնետից»,- ասաց Դավիթ Ափոյանը:

 

Անդրադառնալով իրականացված միջոցառումներին՝ ՈՒԽ նախագահը հիշատակեց ընդհանուր զարգացմանն ուղղված արտագնա դասընթացները, «Իրազեկ ուսանող» հաղորդաշարը, «Ուսանողական ռազմական բանակում-2018»-ը և առաջին անգամ իրականացված «Իրազեկում» ծրագիրը, խոսեց դրանց արդյունավետության մասին:

 

ՈՒԽ նախագահն ասաց նաև, որ կառույցն իր մասնակցությունն է ունեցել համալսարանի կոլեգիալ կառավարման բոլոր օղակներում: Դավիթ Ափոյանը կոչ արեց ուսանողներին հետագայում լինել առավել ակտիվ, համարձակ և անտարբեր չմնալ ոչ մի հարցի նկատմամբ:

 

Օրակարգային երկրորդ հարցով միաձայն հաստատվեց Ուսանողական խորհրդի նախագահության կազմը, ապա, անցնելով երրորդ հարցին, Մարգարիտա Ղազարյանը ներկայացրեց վերստուգիչ հանձնաժողովի հաշվետվությունը՝ անդրադառնալով, թե կառույցն ինչպես է օգտագործել բյուջեն և շեշտելով, որ ՈՒԽ-ն իր գործունեության ընթացքում հավատարիմ է մնացել իր կանոնադրությանը և համապատասխան իրավական ակտերին: Ի դեպ, կառույցի բյուջեի կատարողականին հնարավոր է ծանոթանալ ԵՊՀ ՈՒԽ-ի ֆեյսբուքյան պաշտոնական էջում (ԵՊՀ ուսանողական խորհուրդ):

 

Համագումարի ժամանակ միաձայն ընտրվեց նաև վերստուգիչ հանձնաժողովի նոր կազմը, որի անդամներ դարձան Տաթև Սողոյանը, Խաչիկ Աբաջյանը և Ամալյա Սողոմոնյանը:

Համագումարից հետո ԵՊՀ գիտական խորհրդի դահլիճում տեղի ունեցավ ՈՒԽ նախագահության հերթական նիստը, որի ընթացքում նախագահի ժամանակավոր պաշտոնակատար, Միջազգային հարաբերությունների ֆակուլտետի մագիստրոս Դավիթ Ափոյանն ընտրվեց ՈՒԽ նախագահ:

 

 Քնար Միսակյան

 

 

Այլ նորություններ
ԵՎՐՈՊԱԿԱՆ ԼԵԶՈՒՆԵՐԻ ԵՎ ՀԱՂՈՐԴԱԿՑՈՒԹՅԱՆ ՖԱԿՈՒԼՏԵՏԸ ՃԱՆԱՊԱՐՀԵՑ 2020-2021 ՈՒՍՏԱՐՎԱ ՇՐՋԱՆԱՎԱՐՏՆԵՐԻՆ
ԵՊՀ Չարենցի անվան դահլիճում այսօր տեղի է ունեցել Եվրոպական լեզուների և հաղորդակցության ֆակուլտետի բակալավրիատի շրջանավարտների դիպլոմների հանձնման հանդիսավոր արարողությունը:
«ՏԱՐԱԾԱՇՐՋԱՆԱՅԻՆ ԱՆՎՏԱՆԳՈՒԹՅՈՒՆ. ՀՀ ՍՊԱՌՆԱԼԻՔՆԵՐԸ ՀԵՏՊԱՏԵՐԱԶՄՅԱՆ ՇՐՋԱՆՈՒՄ» ԽՈՐԱԳՐՈՎ ՀԱՆԴԻՊՈՒՄ ՏԻԳՐԱՆ ԱԲՐԱՀԱՄՅԱՆԻ ՀԵՏ
ՈՒԽ Լ. Ազգալդյանի անվան մարտական ակումբն այսօր ԵՊՀ գիտխորհրդի նիստերի դահլիճում կազմակերպել էր հանդիպում «Հենակետ» վերլուծական կենտրոնի ղեկավար Տիգրան Աբրահամյանի հետ: