01.06.2021 | 
Հասարակություն
ԿԵՆՍԱԲԱՆՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ ՏԵՍԵԼ ՈՒ ՀԱՇՎԱՌԵԼ ԵՆ ՀԱՅԱՍՏԱՆԻ ԿԱՐՄԻՐ ԳՐՔՈՒՄ ՆԵՐԱՌՎԱԾ ՄԻ ՇԱՐՔ ԿԵՆԴԱՆԻՆԵՐԻ. ԻՐԱԿԱՆԱՑՎԵԼ Է ԳԻՏԱՐՇԱՎ
ԿԵՆՍԱԲԱՆՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ ՏԵՍԵԼ ՈՒ ՀԱՇՎԱՌԵԼ ԵՆ ՀԱՅԱՍՏԱՆԻ ԿԱՐՄԻՐ ԳՐՔՈՒՄ ՆԵՐԱՌՎԱԾ ՄԻ ՇԱՐՔ ԿԵՆԴԱՆԻՆԵՐԻ. ԻՐԱԿԱՆԱՑՎԵԼ Է ԳԻՏԱՐՇԱՎ
ԵՊՀ կենսաբանության ֆակուլտետի կենդանաբանության ամբիոնի նախաձեռնությամբ կազմակերպվել և իրականացվել է երկօրյա գիտարշավ դեպի «Խոսրովի անտառ» պետական արգելոց, որի ընթացքում ուսանողները բնության մեջ տեսել ու հաշվառել են Հայաստանի Կարմիր գրքում ներառված մի շարք կենդանիների:

Մեզ հետ զրույցում Կենդանաբանության ամբիոնի դոցենտ Աստղիկ Ղազարյանը նշեց, որ գիտարշավը կազմակերպվել է Վրաստանի և Գերմանիայի հետ համատեղ իրականացվող Կովկասյան կենսաբազմազանության գենետիկական ուսումնասիրության միջազգային ծրագրի («CaBOL») և «Կենդանիների էկոլոգիա և պահպանություն» ու «Կենդանիների բազմազանություն» առարկաների շրջանակում, որոնց ուսուցման ընթացքում ուսումնասիրվում է նաև կենդանիների պահպանությունը:

 

«Գիտարշավի կազմակերպումը նպատակ ուներ ուսանողներին գործնականում ծանոթացնելու կենդանիների պահպանությանը: Մենք ընտրեցինք հատկապես «Խոսրովի անտառ» պետական արգելոցը, քանի որ այստեղ արգելոցային պայմանները շատ լավն են և կենդանիների պահպանությունն էլ լավ է իրականացվում, ուստի ստեղծվում է լավ հնարավորություն բնության մեջ տեսնելու և հաշվառելու Հայաստանի Կարմիր գրքում ներառված կենդանիներին՝ օգտագործելով ժամանակակից մեթոդներ»,- ասաց Աստղիկ Ղազարյանը:

 

Նրա փաստմամբ, Կենդանաբանության ամբիոնի վարիչ Մարինե Առաքելյանի, ամբիոնի դոցենտ Գեորգի Պոպովի, դասախոս Տիգրան Հայրապետյանի և իր ուղեկցությամբ կազմակերպված գիտարշավին մասնակցել են ֆակուլտետի 4-րդ և մագիստրատուրա 1-ին կուրսի ուսանողները, ինչպես նաև 2-րդ կուրս այն ուսանողները, որոնք որպես մասնագիտացում ընտրել են կենդանաբանությունը:

 

 

Արգելոցի տարածքում մասնակիցները տարբեր ուղղություններով իրականացրել են արշավներ, որոնց ընթացքում կարողացել են դիտարկել  ՀՀ Կարմիր գրքում գրանցված «Parnassius Mnemosyne» և այլ թիթեռներ, Իլիկամողես, Անդրկովկասյան սահնօձ, ինչպես նաև Սպիտակագլուխ անգղ, Գաճաճ արծիվ, Անտառային ձիաթռչնակ, տարբեր տեսակի չղջիկներ և այլ կենդանիներ:

 

Բացի դրանից՝ գիտարշավի մասնակիցները կարողացել են դիտարկել Սև անգղին, որը ներառված է ՀՀ Կարմիր գրքում և բնադրում է միայն «Խոսրովի անտառ» պետական արգելոցում, ինչպես նաև  վտանգման սպառնացող վիճակին մոտ գտնվող Բեզոարյան այծին:

 

Աստղիկ Ղազարյանը նշեց, որ ձայնագրող սարքերի օգնությամբ ձայնագրվել են այլ տեսակի չղջիկների ձայներ. «Արգելոցի մի քանի հատվածներում էլ տեղադրվել ենք ֆոտոթակարդներ, որոնք արձանագրել են Եվրոպական նապաստակին  և Աքիսին: Նկատել ենք նաև արջի հետքեր»:

 

Քնար Միսակյան

Այլ նորություններ
«ԺԱՄԱՆԱԿԱԿԻՑ ԱՇԽԱՐՀՈՒՄ ՄՐՑԱԿՑՈՒԹՅԱՆ ԴՈՄԻՆԱՆՏ ԱՌԱՐԿԱՆ ԱՅԼԵՎՍ ՆՅՈՒԹԱԿԱՆ ՀԻՄՔԸ ՉԷ». ԼԻԼԻԹ ՇԱՔԱՐՅԱՆ
ԵՊՀ սոցիալական աշխատանքի և սոցիալական տեխնոլոգիաների ամբիոնի դասախոս Լիլիթ Շաքարյանը հրատարակել է իր երկրորդ՝ «Հաղորդակցության մարտահրավերները տեղեկատվական հասարակությունում» գիրքը, որտեղ դիտարկվել են տեղեկատվական հեղափոխության դերն ու նշանակությունը մարդկության և հասարակական ոլորտների զարգացման գործընթացում: Տիկին Շաքարյանի հետ զրուցել ենք գրքի, դրանում արծարծված թեմաների ու առաջիկա ծրագրերի մասին:
«ԱՐՑԱԽԸ ԵՎ ՄԻՋԱԶԳԱՅԻՆ ՔՐԵԱԿԱՆ ԴԱՏԱՐԱՆԸ. ՆՈՐ ՀԵՌԱՆԿԱՐՆԵՐ». ԱՌՑԱՆՑ ՍԵՄԻՆԱՐ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի ՈՒԳԸ-ի նախաձեռնությամբ տեղի է ունեցել «Արցախը և միջազգային քրեական դատարանը. նոր հեռանկարներ» խորագրով առցանց սեմինար, որը վարել է Միջազգային քրեական դատարանի ավագ դատական ծառայող Էդուարդո Տոլեդոն։