08.04.2010 | 
Ուսանողական, Հասարակություն
21-ՐԴ ԴԱՐԻ ԺԱՆՏԱԽՏԸ
21-ՐԴ ԴԱՐԻ ԺԱՆՏԱԽՏԸ
Այսպես բնորոշեցին ահաբեկչությունն ապագա քաղաքագետները ԵՊՀ ռուսական կենտրոնում կազմակերպված քննարկման ժամանակ:

Ռուսական կենտրոնում «կլոր սեղաններն» արդեն ավանդույթի ուժ ունեն, երբ տարբեր ֆակուլտետների ուսանողներ հավաքվում են, զեկույցներ ներկայացնում իրենց հետաքրքրող թեմաների շուրջ ու քննարկումներ ծավալում: Այս անգամ հերթը Միջազգային հարաբերությունների ֆակուլտետի քաղաքական ինստիտուտների եւ գործընթացների ամբիոնինն էր, իսկ թեման` «Պայքարը միջազգային ահաբեկչության դեմ»:

 

«Մենք, իհարկե, չենք հավակնում որեւէ լուծումներ տալ բարձրացված հարցերին: Մեր նպատակն է, որ ուսանողները կարողանան հաղթահարել լեզվական պատնեշն ու իրենց հետաքրքրող թեմաների շուրջ զրուցեն նաեւ ռուսերեն»,- ասում է ԵՊՀ ռուսական կենտրոնի տնօրեն Արուսյակ Ներսեսյանը: Ի դեպ, այսօրվա քննարկմանը ներկա էին ոչ միայն Միջազգային հարաբերությունների ֆակուլտետի ուսանողներն ու դասախոսները, այլ նաեւ ուսանողներ Ժուռնալիստիկայի ֆակուլտետից:

 

Զեկույցներից մեկը ահաբեկչության դեմ պայքարի գործում հենց զանգվածային լրատվամիջոցների դերին էր վերաբերում: Ըստ զեկուցողի` շատ հաճախ, անդրադառնալով ահաբեկիչներին ու ահաբեկչական խմբավորումներին, լրագրողներն իրենք են նպաստում վախի մթնոլորտի ստեղծմանը, ինչն էլ հենց ահաբեկիչների նպատակներից մեկն է: «Երբեմն այնպիսի տպավորություն է ստեղծվում, թե երեւույթն ավելի շատ հետաքրքրում է լրագրողներին, քան ահաբեկիչներին»,- ասում է ԵՊՀ միջազգային հարաբերությունների ֆակուլտետի երկրորդ կուրսի ուսանողուհի Տաթեւիկ Սմբատյանը:

 

Ուսանողների հավաստմամբ` շատ հաճախ ահաբեկչությունը նույնացվում է մուսուլմանական երկրների հետ, բայց խոշոր ահաբեկչական խմբավորումներ առկա են նաեւ այնպիսի եվրոպական երկրներում, ինչպիսիք են Ֆրանսիան եւ Իսպանիան: Երեւույթի վտանգավորության եւ հեռանկարների մասին խոսելուց զատ, ապագա քաղաքագետները ներկաներին ներկայացրին նաեւ մի քանի տեսական բնորոշումներ, որոնք կարելի է օգտագործել ահաբեկչության մասին խոսելիս:

 

Մասնավորապես, նրանք ահաբեկչությունը բաժանեցին երկու հիմնական խմբի` անհատական եւ խմբակային, իսկ իր բնույթով այն երեք տեսակ է լինում` սոցիալական, ազգային եւ կրոնական: Ի դեպ, ուսանողներն ընդգծեցին, որ ահաբեկչությունը, իբրեւ կլոր սեղանի թեմա, ընտրել են` ելնելով Ռուսաստանի Դաշնությունում տեղի ունեցած վերջին ահաբեկչական գործողություններից, որոնք հերթական անգամ ապացուցում են թեմայի արդիականությունը մեր կյանքում:

Այլ նորություններ
ԸՆՏՐՈՒԹՅՈՒՆՆԵՐԻ ԵՎ ՀԱՆՐԱՔՎԵՆԵՐԻ ՆԿԱՏՄԱՄԲ ՄԻՋԱԶԳԱՅԻՆ ՀՍԿՈՂՈՒԹՅՈՒՆԸ. ՍԵՄԻՆԱՐ ԵՊՀ-ՈՒՄ
ԵՊՀ իրավագիտության ֆակուլտետի նախաձեռնությամբ դասախոսությամբ է հանդես եկել ԱՊՀ միջխորհրդարանական վեհաժողովի խորհրդի քարտուղարության ղեկավարի տեղակալ, Ժողովրդավարության, պառլամենտարիզմի զարգացման և ԱՊՀ երկրների քաղաքացիների ընտրական իրավունքների պաշտպանության մոնիթորինգի միջազգային ինստիտուտի տնօրեն Մուշկետ Իվան Իլիչը։
«ՄԵԾԱՊԵՍ ԱՐԺԵՎՈՐՈՒՄ ԵՄ ՇԱՐՈՒՆԱԿԱԿԱՆ ԿՐԹՈՒԹՅՈՒՆԸ, ԵՎ ԵԹԵ ՄԵՆՔ ԿԱՐՈՂԱՆԱՆՔ ՈՒՍԱՆՈՂՆԵՐԻՆ ԱՅԴ ՈՒՂՈՒ ՎՐԱ ԴՆԵԼ, ՄԵՐ ԱՌԱՔԵԼՈՒԹՅՈՒՆԸ ԿԱՐԵԼԻ Է ՀԱՋՈՂՎԱԾ ՀԱՄԱՐԵԼ ». ԼԻԼԻԹ ՍԱՐԳՍՅԱՆ
ԵՊՀ եվրոպական լեզուների և հաղորդակցության ֆակուլտետի անգլերենի թիվ 2 ամբիոնի դոցենտ Լիլիթ Սարգսյանը «Երևանի պետական համալսարանում դասավանդման գերազանցության մրցանակ» ամենամյա մրցույթի բանասիրական անվանակարգի հաղթողներից մեկն է: Տիկին Սարգսյանի հետ զրուցել ենք մանկավարժական ու գիտական գործունեության, կրթության և գիտության ոլորտների հիմնախնդիրների, դրանց լուծման ճանապարհների և այլ թեմաների մասին: