Грантовая программа «Американские исследования» в ЕГУ

Երևանի պետական համալսարանը ՀՀ-ում ԱՄՆ դեսպանատան կողմից ֆինանսավորվող «Ամերիկյան հետազոտություններ» («American Studies») դրամաշնորհային ծրագրի շրջանակում հայտարարում է ԵՊՀ ամերիկյան հետազոտությունների կենտրոնի հետազոտողների մրցույթ ամերիկագիտության կամ հարակից բնագավառների գիտահետազոտական ներուժի համախմբումը, համապատասխան գիտական միջավայրի ձևավորումը և զարգացումը, ամերիկագիտության ոլորտում գիտահետազոտական աշխատանքների կատարումը խթանելու նպատակով:

Մրցույթին մասնակցելու հնարավորություն ունեն ամերիկագիտության կամ հարակից ակադեմիական գիտակարգերի բնագավառում գիտահետազոտական հետաքրքրություններ և փորձ ունեցող հետազոտողներ։ 

Մրցույթի մասնակիցներին ներկայացվող պահանջներն են`

• առնվազն հինգ տարվա գիտահետազոտական փորձառություն ամերիկագիտության կամ հարակից բնագավառներում,

• գիտական աստիճան հասարակական գիտությունների ոլորտում,

• միջազգային ակադեմիական հետազոտական փորձառությունը կդիտվի որպես առավելություն:

Մրցույթին մասնակցելու համար անհրաժեշտ է ներկայացնել` 

• ինքնակենսագրական (CV),

• գիտական հետաքրքրությունների շրջանակի (Statement of Interests) նկարագրություն՝ 3-5 էջի սահմանում,

• ամերիկագիտության կամ հարակից ակադեմիական գիտակարգերի բնագավառին վերաբերող գիտական մեկ հոդվածի (կամ համապատասխան տեքստային հատվածի) օրինակ,

• հետազոտական առաջարկ (Research Proposal)` առավելագույնը 1500 բառի սահմաններում:

 Առաջարկվող թեմաներն են.

1. Արհեստական բանականությունը ռազմական ոլորտում. ԱՄՆ ներդրումները գլոբալ կառավարման և համապատասխանության գործում (Military AI and International Law: U.S. Contributions to Global Governance and Compliance)
2. ԱՄՆ-Ռուսաստան հարաբերությունները և ազդեցությունը տարածաշրջանային ռազմավարական համադրույթի վրա Եվրասիայի օրինակով (The U.S.- Russian relationships and impact on regional strategic landscape: the case of Eurasia)
3. ԱՄՆ-ի դերը միջազգային զարգացման մեջ (The Role of the U.S. in international development)

Մրցույթը հաղթահարած դիմորդների հետ կկնքվի պայմանագիր` վեց ամիս ժամկետով (լրացուցիչ երկարաձգման հնարավորությամբ):

Մրցույթի արդյունքներով ընտրված հետազոտողների ակնկալվող աշխատանքային արդյունքը մեկական գիտական հոդվածի տպագրումն է միջազգային պարբերականներում և «Բանբեր Երևանի համալսարանի» գիտական հանդեսում: Ընտրված հետազոտողները հնարավորություն կունենան նաև իրենց պայմանագրերի գործողության ժամկետում Ամերիկյան հետազոտությունների կենտրոնի շրջանակում անցկացնելու սեմինարների շարք:

Մրցույթի մասնակիցների դիմումների ընդունման վերջնաժամկետն է 2024 թվականի նոյեմբերի 21-ը: