Наука объединяет университеты мира: выпускница ЕГУ, исследователь Камеринского университета

Մեզ հետ զրույցում Ադանան վստահեցրեց, որ թեկնածուական ատենախոսության թեման համահունչ է իր գիտական հետաքրքրություններին, և դրանով քայլ առ քայլ մոտենում է գիտությունների դոկտոր դառնալու իր վաղեմի երազանքին։

Պատմում է Ադանա Քեշիշյանը:

Արտասահմանում երիտասարդներն ազատ են ուսմանն առնչվող իրենց որոշումներում

Արտերկրում գիտությունն ուղղված է առավել նորարարական և ժամանակակից մեթոդներով համաշխարհային հնչեղություն ունեցող խնդիրներին լուծում տալուն, ինչը դանդաղ, սակայն հաստատուն քայլերով ու տեսանելիորեն զարգանում է նաև Հայաստանում: Արտասահմանում երիտասարդներն ապահովված են ինչպես անհրաժեշտ նորագույն գրականությամբ, այնպես էլ այդ գրականությունն ուսումնասիրելու բազմաթիվ միջոցներով, ինչն էլ խթանում է մտքի ազատությունը և ցանկություն ստեղծում՝ մասնագիտության մեջ խորանալու: Արտասահմանում երիտասարդները գնահատված են և ազատ ուսմանն առնչվող որոշումներ կայացնելիս, այնինչ Հայաստանում այս ազատությունն ուսանողի համար դեռ այդքան էլ արտահայտված չէ:

Գիտական աշխատանքները՝ մարդկության խնդիրները լուծելու հնարավորություններ

Առհասարակ, երիտասարդներին պետք է սիրել ու գնահատել՝ հաշվի առնելով, որ երկրի զարգացման ներուժը հենց նրանք են: Իմ գերագույն նպատակներից են սեփական փորձս երիտասարդներին ներկայացնելը, նրանց աջակցելն ու օգնելը ուսումնական գործընթացում, իսկ Հայաստանի ապագայում իմ ներդրումը տեսնում եմ գիտելիքներս իմ հայրենիքին ծառայեցնելով: Գիտության  զարգացման համար անհրաժեշտ է պարբերաբար ներդրումներ կատարել, քանի որ հենց գիտական աշխատանքներն են լուծումներ առաջարկում ցանկացած ոլորտում առաջացող խնդիրներին:

Հաջողված հետազոտություն՝ թմրանյութերից կախվածության դեմ պայքարում

Թմրանյութերից կախվածության բուժման մեթոդների շուրջ հետազոտական մի շարք աշխատանքներ եմ կատարել: Ուսումնասիրություններիս օբյեկտը կենդանիներն են եղել, և նրանց օրինակով էլ կառուցել եմ թմրամոլության մոդելներ, ինչպես նաև մշակել դրանց բուժմանն ուղղված քայլեր, որոնք մեծավ մասամբ, հաջողությամբ են պսակվել: Սա նշանակում է, որ իմ աշխատանքներն ապագայում թմրամոլության բուժման համար առանցքային նշանակություն կարող են ունենալ:

Թեկնածուական ատենախոսություն գրելը՝ մասնագիտական կյանքի առանցքային որոշում

ԵՊՀ-ում բակալավրի աստիճան ստանալուց հետո որոշեցի ուսումս շարունակել հենց ԵՊՀ ֆարմացիայի ինստիտուտի մագիստրատուրայում: Այդ տարի ԵՊՀ-ն մասնակցում էր «ԱՊՀ երկրների ցանցային համալսարան» ծրագրին, և ես որոշեցի բաց չթողնել Ֆարմացիայի ինստիտուտը ներկայացնող ուսանողը դառնալու հնարավորությունը Ռուսաստանի ժողովուրդների բարեկամության համալսարանում (RUDN): Ծրագրի շրջանակում մեկնեցի Մոսկվա՝ մագիստրատուրայի առաջին կուրսում ուսանելու, և վերադարձա ԵՊՀ՝ շարունակելու ուսումս մագիստրատուրայի երկրորդ կուրսում՝ ուսումնառության ավարտին ստանալով  և՛ ԵՊՀ դիպլոմ, և՛ միջազգային դիպլոմ Ռուսաստանի ժողովուրդների բարեկամության համալսարանից: Մագիստրոսի կոչում ստանալուց հետո Հայաստանում երկու տարի աշխատել եմ  որպես դեղերի որակի հսկման փաստաթղթերի մենեջեր Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնում, ապա որոշել, որ պետք է իրագործեմ գիտությունների դոկտոր դառնալու վաղեմի երազանքս: Այդ իսկ պատճառով այժմ հետազոտություններ եմ կատարում Իտալիայում՝ հետևելով նպատակ դարձած իմ երազանքին: