«Здесь я действительно чувствую себя в безопасности». ЕГУ и Армения глазами американских студентов

Факультет русской филологии Ереванского государственного университета стал уникальным культурным перекрестком: в рамках различных международных программ студенты ведущих университетов мира приезжают на факультет для углубления своих знаний.

Վիսկոնսին-Մեդիսոնի համալսարանի (University of Wisconsin-Madison) ուսանողներ Քլեր Չայկովսկին և Ջեք Սմիթը Ամերիկյան խորհուրդների և ԵՊՀ-ի համագործակցությամբ իրականացվող «Ռուսաց լեզվի և տարածաշրջանի ուսուցում» («Russian Language and Area Studies») ծրագրի շրջանակում ԵՊՀ ռուս բանասիրության ֆակուլտետում երկու ամսով շարունակում են իրենց ուսումնառությունը:

Նրանք պատմել են, թե ինչու են ընտրել հենց ԵՊՀ-ն, ինչն է իրենց զարմացրել Երևանում և մասնագիտական ինչ երազանքներ ունեն։

«Ես ընտրեցի ԵՊՀ-ն, քանի որ այն արտերկրում ռուսաց լեզվի ուսումնառության վայրերից ամենահետաքրքիրն էր: Նախկինում երբևէ չէի ճանապարհորդել Կովկասում կամ դրան մոտ որևէ վայրում, ուստի ցանկացա ընտրել ինձ համար ամենահետաքրքիր և անծանոթ վայրը»,- պատմում է Քլեր Չայկովսկին։

Իսկ նրա համակուրսեցի Ջեք Սմիթն ընդգծում է, որ ԵՊՀ-ն համագործակցում է Ամերիկյան խորհուրդների հետ, և երկուսն էլ ԱՄՆ-ում հիանալի համբավ ունեն։

«Ես ցանկանում էի տեսնել Հայաստանը՝ միաժամանակ ստանալով լավագույն կրթություն։ Ինձ համար ԵՊՀ-ն հենց այդ լավագույն ընտրությունն է»,- ընդգծում է նա։

Ուսանողների ուսումնական ժամանակացույցը բավականին խիտ է ու հագեցած։ Նրանք սովորում են ռուսաց լեզվի քերականություն, ռուս գրականություն, հնչյունաբանություն, Ռուսաստանի աշխարհագրություն և այլ առարկաներ, ինչպես նաև ծանոթանում հայկական մշակույթին։ Բոլոր հիմնական դասախոսությունները բացառապես ռուսերենով են։ Իսկ Ջեքը, ռուսերենին զուգահեռ, սովորում է նաև հայոց լեզու։

Խոսելով դասավանդման մեթոդների մասին՝ ամերիկացի ուսանողները նշում են, որ ԵՊՀ դասախոսները բավականին պահանջկոտ են, ինչն իրենց օգնում է է՛լ ավելի հարստացնելու գիտելիքները։

«Մեր դասախոսները շատ ընդառաջող են, բայց, միևնույն ժամանակ, մեզնից պահանջում են ավելին՝ մարտահրավերներ նետելով մեզ»,- ասում է Քլերը։

Այն հարցին, թե արդյոք ռուսերենն արդիական է այսօր, երկու ուսանողներն էլ վստահորեն դրական պատասխանեցին՝ լեզուն դիտարկելով աշխարհաքաղաքական և մշակութային համատեքստում։

Քլերի խոսքով՝ այն անչափ կարևոր է միջազգային հարթակում, քանի որ շատ տարածված լեզու է: Ջեքն էլ փաստում է, որ Հայաստանում շատերն են խոսում ռուսերեն, որը, ըստ նրա, տարածված է նաև Մոլդովայում, Կոսովոյում, Վրաստանում, Ղազախստանում։ Ջեքի խոսքով՝ նշված երկրներն ունեն հարուստ մշակույթ, որն իրեն հետաքրքիր է նաև մասնագիտական տեսանկյունից:

Ուսանողների ապագայի պլանները բավականին հավակնոտ են. Քլերը ուսումնասիրում է միջազգային հարաբերություններ, քաղաքագիտություն, ռուսերեն և պատմություն: Նա ցանկանում է աշխատել միջազգային մարդասիրական օգնության և մարդու իրավունքների պաշտպանության ոլորտում: Իսկ Ջեքը սովորում է գերմաներեն, ռուսերեն, միջազգային հարաբերություններ, կրթական քաղաքականություն, համաշխարհային մշակույթներ և նպատակադրվել է մուտք գործել միջազգային իրավունքի դաշտ։

Հայաստան կատարած առաջին այցը մեծ տպավորություն է թողել ուսանողների վրա, ընդ որում՝ երբեմն շատ անսպասելի կողմերով։ Օրինակ՝ Քլերին ամենից շատ տպավորել է երևանցիների հագնվելու ոճը։

«Ինձ վրա մեծ տպավորություն է թողել այն, թե որքան գեղեցիկ են հագնվում մարդիկ այստեղ։ Նախապես գիտեի այդ մասին, բայց զարմացած էի, թե որքան պարզունակ էին թվում իմ տոնական հագուստներն այստեղի համեմատ»,- պատմում է նա։

Իսկ Ջեքին գրավել է մարդկանց ջերմությունն ու անվտանգության զգացումը։

«Իմ առաջին տպավորությունն այն է, թե որքան բարի են մարդիկ։ Ես ինձ այստեղ իսկապես անվտանգ եմ զգում»,- մատնանշում է նա։

ԱՄՆ-ից ժամանած ուսանողներն ի՞նչ կփոխեին ԵՊՀ-ում. եթե Ջեքն ամեն ինչ կթողներ նույնը, ապա Քլերը կցանկանար հաջորդ այցին շենքի ներսում տեսնել ցայտաղբյուրներ կամ ավտոմատ ջրալցման սարքեր: