«ՀԱՅԱՍՏԱՆՈՒՄ ԱՃՈՂ ՈՐՈՇ ԲՈՒՍԱՏԵՍԱԿՆԵՐ ՈՒՆԵՆ ՀԱԿԱՄԱՆՐԷԱՅԻՆ ԵՎ ՀԱԿԱՔԱՂՑԿԵՂԱՅԻՆ ՄԵԾ ԱԿՏԻՎՈՒԹՅՈՒՆ»․ Կ․Գ․Թ․ ՆԱԻՐԱ ՍԱՀԱԿՅԱՆ

Դասախոսության թեմայի հիմքում «Բուսական ծագմամբ միացությունների ներուժը սննդի և կերերի արտադրության կոնսերվանտների և նոր՝ կենսաբանորեն ակտիվ հավելումների մշակման ոլորտում» գիտական թեման էր, որի արտասահմանյան խորհրդատուն է Գդանսկի համալսարանի պրոֆեսորը։

Գիտական թեմայի ղեկավար, ավագ գիտաշխատող, կ.գ.թ. Նաիրա Սահակյանը մեզ հետ զրույցում անդրադարձավ դասախոսության թեմայի կարևորությանը` նշելով, որ հայկական բուսական աշխարհը քիչ է ուսումնասիրվել, սակայն բարձրավանդակում աճող մեծաքանակ բույսերը սինթեզում են կենսաբանորեն ակտիվ այնպիսի միացություններ, որոնք չեն սինթեզում այլ վայրերում աճող բուսատեսակները: Ն․ Սահակյանի խոսքով՝ քիչ պատրաստուկներ կան, որոնք ունեն բնական հիմքեր:

Ընդգծելով համատեղ կատարված ուսումնասիրությունների արդյունքները՝ գիտական թեմայի ղեկավարը նշեց․«Հետազոտությունը ցույց տվեց, որ Հայաստանում աճող որոշ բուսատեսակներ, դրսևորելով բարձր հակաօքսիդանտություն, միևնույն ժամանակ ունեն հակամանրէային և հակաքաղցկեղային մեծ ակտիվություն որոշ բջջային մոդելների վրա, նույնիսկ այնպիսի բջջային գծերի, որոնք կայունություն ունեն ստանդարտ քիմիաթերապևտիկ պատրաստուկների նկատմամբ»,- նշեց Ն. Սահակյանը:

Խոսելով ուսումնասիրության կիրառական նշանակությունից`ավագ գիտաշխատողն ընդգծեց. «Ուսումնասիրելով հակաբակտերիական ակտիվությունը՝ որոշեցինք դիտարկել նաև հակաքաղցկեղային ազդեցությունը կայուն բջջային գծերի վրա: Արդյունքներն այնպես են զարմացրել մեր գործընկերներին, որ նրանք պատրաստվում են, մեզ հետ համագործակցելով, ավելի խոր ուսումնասիրություններ կատարել: Հույս ունենք՝ դեղագետների հետ կհամագործակցենք համապատասխան պատրաստուկների մշակման շրջանակում»:

Մեզ հետ զրույցում Ն․ Սահակյանը կարևորեց միջազգային ճանաչում ունեցող գիտնականների հետ համագործակցությունը, ինչը, նրա խոսքով, փորձի փոխանակման մեծ հնարավորություն է ընձեռում:

Նշենք, որ դասախոսությանը ներկա էին ԵՊՀ կենսաբանության ֆակուլտետի՝ կենսաքիմիայի, մանրէաբանության և կենսատեխնոլոգիայի ամբիոնի աշխատակիցները, պրոֆեսորադասախոսական կազմի այլ ներկայացուցիչներ, ուսանողներ և ասպիրանտներ։