ԵՊՀ-ում քննարկվել են ՅՈՒՆԻՍԵՖ-ի հետ համագործակցության ընդլայնման հեռանկարները

ԵՊՀ միջազգայնացումը և գիտական առաջնահերթությունները

ԵՊՀ ռեկտոր Հովհաննես Հովհաննիսյանը ներկայացրել է համալսարանի զարգացման ռազմավարությունն ու առաջնահերթությունները: Ռեկտորը հատկապես կարևորել է բուհի թվայնացման գործընթացը, օտարերկրյա ուսանողների ներգրավումը, ինչպես նաև գիտահետազոտական աշխատանքների ծավալուն աճն ու միջազգային գրախոսվող ամսագրերում հրապարակումների թվաքանակի ավելացումը: 

«Մեր նպատակն է խորացնել միջազգային համագործակցությունը և ընդլայնել օտարալեզու կրթական ծրագրերի ցանկը: ԵՊՀ-ն ակտիվորեն համագործակցում է ՄԱԿ-ի տարբեր գործակալությունների հետ»,- նշել է Հովհաննես Հովհաննիսյանը: 

Որպես համագործակցության օրինակ՝ ռեկտորն անդրադարձել է ԵՊՀ-ի, ՄԱԿ-ի բնակչության հիմնադրամի (UNFPA) և ՀՀ աշխատանքի և բարեկեցության նախարարության համատեղ ջանքերով ստեղծված Ժողովրդագրական հետազոտությունների կենտրոնի գործունեությանը:

Նա ներկայացրել է նաև մարդու իրավունքների, միջազգային արբիտրաժի և հոգեբանական աջակցության ոլորտներում համալսարանի կենտրոնների աշխատանքն ու միջազգային ծրագրերը, ինչպես նաև անդրադարձել գիտության ոլորտում պետական ներդրումների աճին:

Երեխայի իրավունքների կենտրոնների ցանցը և ԵՊՀ ներգրավումը

Հայաստանում ՅՈՒՆԻՍԵՖ-ի ներկայացուցիչ Ղասսան Խալիլը ներկայացրել է տարբեր երկրների բուհերում երեխայի իրավունքների կենտրոնների ստեղծման փորձը և ԵՊՀ-ին առաջարկել միանալ այդ միջազգային ցանցին:

«Ակադեմիական ոլորտում երեխայի իրավունքների ինստիտուցիոնալացումը մեր առաջնահերթություններից է: 2020 թվականից ի վեր տարբեր երկրներում (Վրաստան, Հունաստան, Ալբանիա, Կամերուն և այլն) հիմնադրվել է ավելի քան 63 նմանատիպ կենտրոն: Այս կենտրոնները հենվում են երեք հիմնասյուների վրա՝ երեխայի իրավունքների խթանում, հետազոտություններ և ուսուցում»,- ընդգծել է Ղասսան Խալիլը: 

Նա առաջարկել է միանալ այս միջազգային ցանցին՝ համալսարանում հիմնելով Երեխայի իրավունքների կենտրոն, որը կմիավորի իրավագիտության, մանկավարժության, հոգեբանության և սոցիալական աշխատանքի ոլորտների մասնագետներին:

Անդրադառնալով առաջարկին՝ ԵՊՀ ռեկտոր Հովհաննես Հովհաննիսյանը նշել է, որ համալսարանում արդեն կան այս ուղղությամբ աշխատող մասնագետներ, կրթական մոդուլներ և հետազոտական փորձ:

«Տարբեր տարիների մեր գիտնականները կատարել են բազմաթիվ հետազոտություններ՝ նվիրված երեխաների կրթությանը, դասավանդման մեթոդաբանությանը, հոգեբանական խնդիրներին ու իրավունքների պաշտպանությանը»,- նշել է ռեկտորը:

Նա հավելել է, որ ուսանողները պարբերաբար պաշտպանում են երեխայի իրավունքներին առնչվող մագիստրոսական թեզեր և կատարում հետազոտություններ:

Ռեկտորի խոսքով՝ ԵՊՀ-ն կքննարկի կենտրոնի ստեղծման հնարավորությունները՝ դիտարկելով այն որպես միջգիտակարգային հարթակ, որը կմիավորի համալսարանի տարբեր ֆակուլտետների ու հետազոտական կենտրոնների ներուժը:

Միջազգային մեծ գիտաժողով 2027 թվականին․ Երևանը կընդունի 50 երկրների պատվիրակությունների

Հանդիպման ժամանակ Հայաստանում ՅՈՒՆԻՍԵՖ-ի պատվիրակության ներկայացուցիչներն անդրադարձել են 2027 թվականի հոկտեմբերին Երևանում կայանալիք «Ակադեմիայի դերը երեխայի իրավունքների առաջմղման գործում» («The role of academia in advancing child rights») խորագրով միջազգային գիտաժողովի անցկացմանը:

Ղասսան Խալիլը նշել է, որ նախորդ գիտաժողովին մասնակցել են 34 երկրների ներկայացուցիչներ, իսկ 2027 թվականի հայաստանյան գիտաժողովի նպատակն է համախմբել ավելի քան 50 երկրների ակադեմիական ոլորտի ներկայացուցիչներին: 

Ըստ նախանշված ձևաչափի՝ եռօրյա միջազգային գիտաժողովն անցկացվելու է ՀՀ ԿԳՄՍ նախարարության հովանու ներքո: Յուրաքանչյուր օրվա աշխատանքները նախատեսվում է կազմակերպել տարբեր բուհերում: Որպես հյուրընկալող բուհ դիտարկվում է նաև Երևանի պետական համալսարանը:

Ռեկտոր Հովհաննես Հովհաննիսյանը պատրաստակամություն է հայտնել ԵՊՀ ներուժը ներգրավելու գիտաժողովի կազմակերպական աշխատանքներում:

Հանդիպման ավարտին Ղասսան Խալիլը ԵՊՀ ռեկտորին է հանձնել երեխայի իրավունքների թեմայով իր հեղինակած աշխատությունը, որում ամփոփված է ոլորտում նրա բազմամյա ակադեմիական ու դասախոսական փորձառությունը:

Ի՞նչ է սպասվում առաջիկայում

Երկկողմ քննարկումների արդյունքում պայմանավորվածություն է ձեռք բերվել ձևավորելու համատեղ աշխատանքային խումբ՝ նախանշված ծրագրերն ու հետագա քայլերն իրականացնելու նպատակով: