1.ԸՆԴՀԱՆՈՒՐ ԴՐՈՒՅԹՆԵՐ

1.1. Սույն կարգով սահմանվում են «Երևանի պետական համալսարան» հիմնադրամում բակալավրի ԿԾ (կրթական ծրագիր) բարելավման համար դրամաշնորհի (այսուհետ՝ Դրամաշնորհ) հատկացման պահանջները և մրցույթի անցկացման կարգը: 

1.2. Դրամաշնորհի հատկացման նպատակը միջազգային չափանիշներին համապատասխան որակյալ կրթության տրամադրման և ԿԾ մրցունակության խթանումն է:

1.3. Դրամաշնորհի հատկացման և մրցույթի իրականացման գործընթացները կազմակերպում և համակարգում  է ԵՊՀ ուսումնամեթոդական վարչությունը  (այսուհետ՝ Վարչություն):

1.4. Դրամաշնորհի հայտի նախնական փորձաքննությունն իրականացնում է ԵՊՀ որակի ապահովման կենտրոնը:

2. ԴՐԱՄԱՇՆՈՐՀԻ ՀԱՏԿԱՑՄԱՆ ԿԱՆՈՆՆԵՐԸ

2.1. Դրամաշնորհի համար մրցույթին մասնակցելու հայտը՝ կից փաստաթղթերով, ուսումնական ստորաբաժանումը կարող է ներկայացնել Վարչություն յուրաքանչյուր տարվա մարտի 10-ից 30-ն ընկած ժամանակահատվածում՝ ուղարկելով այն education@ysu.am  էլ. փոստին:

Նշված ժամկետի ավարտից հետո ներկայացված հայտերը քննարկման ենթակա չեն:

2.2. Մրցութային փաթեթը պետք է ներառի հետևյալ փաստաթղթերը՝

1) ուսումնական ստորաբաժանման ղեկավարի զեկուցագիրը Դրամաշնորհին մասնակցելու վերաբերյալ,

2) ԿԾ վերանայման և բարելավման աշխատանքներում ներգրավված անձանց (ընդհանուր թիվը չպետք է գերազանցի 5-ը, այդ թվում՝ ծրագրի ղեկավարը, հրավիրյալ պրոֆեսոր, տվյալ ԿԾ դասախոս, ուսանող/շրջանավարտ) ինքնակենսագրությունները,

3) կրթական ծրագրի բարելավման անհրաժեշտության վերաբերյալ հիմնավորում՝  ստորագրված ԿԾ ղեկավարի կողմից,

4) ԿԾ վերլուծությունը, թերի կողմերի և հիմնական ռիսկերի նկարագրությունը՝ հիմնված ԿԾ մշտադիտարկման (մոնիթորինգի) արդյունքների վրա՝ ըստ սահմանված ձևաթերթի (կցվում է սույն կարգին),

5) ուսումնական ստորաբաժանման գիտական խորհրդի որոշման քաղվածքը՝ Դրամաշնորհին դիմելու երաշխավորման վերաբերյալ,

6) նախահաշիվը (կցվում է սույն կարգին):

2.3. Դրամաշնորհի հատկացման համար մրցույթի անցկացման և հայտերի փորձաքննության կազմակերպումը համակարգում է ԵՊՀ մեթոդական խորհուրդը (այսուհետ՝ Խորհուրդ):

2.4. Հայտերի ներկայացման վերջնաժամկետից հետո՝ 15 աշխատանքային օրվա ընթացքում, Խորհրդի կողմից կազմակերպվում են Դրամաշնորհի հայտերի փորձաքննություն (ներառյալ ՈԱԿ-ի նախնական փորձաքննությունը) և փորձաքննության արդյունքների հաստատում:

2.5. Խորհրդի նիստն իրավազոր է, եթե դրան մասնակցում է Խորհրդի անդամների ընդհանուր թվի 2/3-ը:

2.6. Խորհրդի որոշումներն ընդունվում են նիստին ներկա անդամների ձայների պարզ մեծամասնությամբ:

2.7. Խորհրդի կողմից ֆինանսավորման երաշխավորված կրթական ծրագրերի  ցանկը ներակայացվում է ռեկտորի հաստատմանը:

3. ԽՄԲԻ ԱՆԴԱՄՆԵՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ

3.1. Դրամաշնորհի ղեկավար կարող է լինել կրթական ծրագրի ղեկավարը:

3.2. Խմբի անդամներից առնվազն մեկը պետք է լինի հրավիրյալ պրոֆեսոր, ով ունի գիտական աստիճան և օտարերկրյա բուհում Դրամաշնորհին առնչվող կրթական գործունեություն է ծավալում:

3.3. Խմբի երրորդ անդամը պետք է լինի ԵՊՀ աշխատող և տվյալ ԿԾ-ում դասավանդի  առնվազն մեկ մասնագիտական դասընթաց:

3.4. Խմբում պետք է ընդգրկվի տվյալ ծրագրի ավարտական կուրսի ուսանող կամ շրջանավարտ, ում ՄՈԳ-ը առնվազն 18 է:

3.5. Ուսումնական ստորաբաժանման ղեկավարը և գրասենյակի ղեկավարը չեն կարող լինել խմբի անդամ։

3.6. Խմբում հասարակական կարգով կարող է ներգրավվել նաև տվյալ մասնագիտական ոլորտի գործատու, ով ունի առնվազն 5 տարվա աշխատանքային փորձ։

4. ԽՄԲՈՒՄ ԸՆԴԳՐԿՎԱԾ ՀՐԱՎԻՐՅԱԼ ՊՐՈՖԵՍՈՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ

4.1. Հրավիրյալ պրոֆեսոր կարող է լինել օտարերկրյա համալսարանում համապատասխան մասնագիտական ոլորտում գիտամանկավարժական  գործունեությամբ  զբաղվող այն անձը, ում Հիրշի ինդեքսն (h-index) ըստ «Scopus» գիտատեղեկատվական շտեմարանի տվյալների՝ առնվազն 3 է՝ հումանիտար և 5՝ բնագիտամաթեմատիկական ուղղությունների համար:

4.2. Աշխատանքների իրականացման ընթացքում պրոֆեսորն աշխատում է առցանց ձևաչափով (4 ամիս):

4.3. Պրոֆեսորն իր պաշտոնական էլեկտրոնային հասցեից Վարչության էլեկտրոնային հասցեին պետք է ուղարկի իր կենսագրական տվյալները և հաստատող նամակ՝ նշելով, որ ծանոթ է սույն կարգով նախատեսված իր պարտականություններին և գործառույթներին։

5. ԱԿՆԿԱԼՎՈՂ ԱՐԴՅՈՒՆՔԸ

5.1. Ծրագրի իրականացման ժամանակահատվածում ներկայացվում է 2 զեկույց՝ միջանկյալ և ամփոփիչ.

1) միջանկյալ զեկույց (ստորագրված ուսումնական ստորաբաժանման ղեկավարի կողմից), որը ներկայացվում է աշխատանքների իրականացման երկրորդ ամսվա ավարտին: Զեկույցում ներկայացվում են այդ փուլում կատարված աշխատանքների արդյունքները, ինչպես նաև հաշվետվություն՝ իրականացված բենչմարքի վերաբերյալ. բենչմարքինգի իրականացման համար հիմք է ծառայում ակադեմիական ուղղությունների համաշխարհային վարկանիշավորման ShanghaiRanking's Global Ranking (Շանհայի ցանկի`
(https://www.shanghairanking.com/rankings/gras/2024) կամ Times Higher Education (Թայմս Հայեր Էդուքեյշն) ակադեմիական ուղղությունների վարկանիշավորման ցանկում (https://www.timeshighereducation.com/world-university-rankings/by-subject) (մինչև 150-րդ դիրք) ընդգրկված արտասահմանյան որևէ բուհի բակալավրի համապատասխան կրթական ծրագիրը,

2) ամփոփիչ զեկույց, որը ներկայացվում է կարգով սահմանված ժամկետի ավարտին: Զեկույցում ներկայացվում են ծրագրի արդյունքները և բարելավված դասընթացների ցանկը,

3) ԿԾ հիմնական մասնագիտական դասընթացների (առնվազն 10 դասընթաց) վերանայված նկարագրիչներ և պլաններ,

4) վերջնարդյունքներին համապատասխան դասավանդման նոր մեթոդների և գնահատման արդյունահենք չափանիշների նկարագրություն վերանայվող դասընթացների համար։

6. ԱՅԼ ԴՐՈՒՅԹՆԵՐ

6.1. Դրամաշնորհի մրցույթը հայտարարվում է տարին մեկ անգամ։ Ծրագրի ընդհանուր տևողությունը 4 - 6 ամիս է։

6.2. Դրամաշնորհի ընդհանուր ֆինանսավորման սկիզբը հոկտեմբերի 1-ն է, ավարտը՝ մարտի 30-ը:

6.3. Դրամաշնորհի ֆինանսավորման առավելագույն չափը չի կարող գերազանցել 3.5 մլն ՀՀ դրամը:

6.4. Դրամաշնորհի իրականացման համար դրամաշնորհի ղեկավարը չի վարձատրվում:

6.5. Դրամաշնորհի ղեկավարի համար լրիվ աշխատանքային ծանրաբեռնվածություն է հաշվարկվում  600 ժամը:

6.6. Պրոֆեսորի աշխատանքի վարձատրության ընդհանուր գումարը 4 ամսվա համար չի կարող գերազանցել 1.5 մլն ՀՀ դրամը:

6.7. Դրամաշնորհի ֆինանսավորումը կատարվում է ստորև նշված ժամանակացույցին համապատասխան՝

1) Դրամաշնորհի ընդհանուր գումարի 50 տոկոսը տրվում է պայմանագրի կնքման ամսաթիվը ներառող ամսվա վերջին, իսկ մնացյալ 50 տոկոսը՝ Դրամաշնորհի կատարման վերաբերյալ միջանկյալ հաշվետվության արդյունքների հիման վրա։

2) Դրամաշնորհի մնացած գումարը բաշխվում է հավասարաչափ՝ ամսական վճարման սկզբունքով, մինչև դրամաշնորհի ժամկետի ավարտը:

6.8. Դրամաշնորհի կատարման ընթացքում սույն կարգով սահմանված պարտավորությունների ոչ պատշաճ կատարման դեպքում ֆինանսավորումը կարող է դադարեցվել, իսկ ուսումնական ստորաբաժանումը՝ երեք տարի ժամկետով զրկվել դրամաշնորհին դիմելու իրավունքից:

Ձևաթերթ.pdf

Նախահաշիվ_0.pdf