1.ԸՆԴՀԱՆՈՒՐ ԴՐՈՒՅԹՆԵՐ

1.1. Երևանի պետական համալսարանում (այսուհետ՝ ԵՊՀ)  ստացած  կրթությունից  շրջանավարտների  բավարարվածության վերաբերյալ հարցումների (այսուհետ` հարցում) կազմակերպման սույն կարգը սահմանում է ԵՊՀ շրջանավարտներին համալսարանում մատուցված կրթական ծառայությունների որակի գնահատման կարգն ու պայմանները: 

1.2. ԵՊՀ-ում ստացած կրթությունից շրջանավարտների բավարարվածության վերաբերյալ հարցումը ԵՊՀ որակի  ապահովման ներքին համակարգի կարևորագույն բաղադրիչներից է, որն  իրականացվում  է առցանց եղանակով: 

1.3. Սույն կարգը հաստատվում և դրանում փո­փո­խություններ ու լրացումներ կատարվում են ԵՊՀ գիտական խորհրդի որոշմամբ: 

2. ՀԱՐՑՄԱՆ ԱՆՑԿԱՑՄԱՆ ԿԱՐԳԸ

2.1. Հարցմանը մասնակցում են ԵՊՀ բակալավրիատի ու մագիստրատուրայի առկա և հեռակա ուսուցման համակարգի բոլոր շրջանավարտները: Հարցումն անցկացվում է յուրաքանչյուր տարվա փետրվար, հունիս, հուլիս ամիսներին:   

2.2. Հարցման գործընթացը կազմակերպում և վերահսկում են ԵՊՀ ուսումնամեթոդական վարչությունը և ֆակուլտետները: 

2.3. Հարցմանը շրջանավարտի մասնակցությունը պարտադիր է, որն իրականացնում է առցանց՝ շրջանավարտի համալսարանական էլեկտրոնային փոստի միջոցով:

2.4. Շրջանավարտին ԵՊՀ դիպլոմի հավելված տրամադրվում է միայն հարցմանը մասնակցելուց հետո։

2.5. Հարցումն անցկացվում է սույն կարգին կից ներկայացված գնա­հատման հարցաթերթով (Հավելված 1), որում առաջադրված հարցերին շրջանավարտը պատասխանում է գնահատման 0-5 միավորանոց սանդղակով։ Հարցաթերթի` կարծիքների և առաջարկների բաժնում, շրջանավարտը կարող է ներկայացնել նաև ԵՊՀ կրթական ծրագրերի բարելավմանն ուղղված առաջարկներ:

2.6. Հարցմանը մասնակցած շրջանավարտների անհատական տվյալների գաղտնիությունը երաշխավորվում է, իսկ հարցման արդյունքներն օգտագործվում են միայն ամփոփ ձևաչափով:

3.ՀԱՐՑՄԱՆ ԱՐԴՅՈՒՆՔՆԵՐԻ ՄՇԱԿՈՒՄՆ ՈՒ ՕԳՏԱԳՈՐԾՈՒՄԸ

3.1. Հարցման արդյունքները մշակվում են ԵՊՀ տեղեկատվական տեխ­նոլոգիաների կրթական և հետազոտական կենտրոնում:

3.2. Հարցման արդյունքների վերլուծությունն արտացոլվում է տա­րե­կան զեկույցում, որը պարունակում է եզրակացություններ ԵՊՀ-ում ստացած կրթու­թյունից շրջանավարտների բավարարվածության վերաբերյալ և ԵՊՀ ստորաբաժանումներին ուղղված առաջարկներ՝ կոնկրետ ուղղությամբ իրենց գործունեության բարելավման վերաբերյալ։ Տարեկան զեկույցում ներկայացված առաջարկները մեկամսյա ժամկետում քննարկվում են ֆակուլտետների գիտական խորհուրդներում և ԵՊՀ գիտական խորհրդում:

3.3. ԵՊՀ այն ստորաբաժանումները, որոնց գործունեության վերաբերյալ հարցման արդյունքում բացահայտվել են թերություններ, տարեկան զեկույցի հրապարակումից հետո երեք ամսվա ընթացքում ԵՊՀ ռեկտորին պետք է ներկայացնեն իրենց ստորաբաժանման աշխատանքի բարելավմանն ուղղված գործողությունների ծրագիր, որը ենթակա է պարտադիր կատարման:

3.4. Աշխատանքի բարելավման գործողությունների ծրագրի արդյունավետ և նպատակային իրականացման նկատմամբ վերահսկողությունն իրականացնում է ԵՊՀ որակի ապահովման կենտրոնը: 

Հավելված 1_8.pdf