Երևանի պետական համալսարանի անգլիական բանասիրության ամբիոնը Պյատիգորսկի պետական համալսարանի և Անգլերենի ուսումնասիրության հայկական ասոցիացիայի հետ համագործակցությամբ սիրով հրավիրում է գիտնականների, հետազոտողների, դասախոսների, ասպիրանտների, մագիստրատուրայի և բակալավրիատի ուսանողների մասնակցելու ԵՊՀ եվրոպական լեզուների և հաղորդակցության ֆակուլտետի հիմնադրման 35-ամյակին նվիրված «Իմաստների ներդաշնակում. լեզվաբանությունն ու հաղորդակցությունը՝ որպես մշակույթների բազմախոսության գործիքներ» խորագրով միջազգային գիտաժողովին։

Այսօր, երբ աշխարհն ավելի բազմալեզու է դառնում և թվային տեխնոլոգիաներով փոխկապակցված, լեզուն հանդես է գալիս որպես ժողովուրդների միջև փոխըմբռնման, մշակութային բազմազանության պահպանման և արդյունավետ հաղորդակցության կարևորագույն միջոց։ Գիտաժողովի նպատակն է ստեղծել միջազգային գիտական հարթակ՝ լեզվաբանության, հաղորդակցության, լեզվակրթության, գրականագիտության և միջմշակութային հաղորդակցության արդի հիմնախնդիրների քննարկման համար։

Գիտաժողովի նպատակներն են՝

• խթանել լեզվաբանության, հաղորդակցության, գրականագիտության և հարակից գիտակարգերի միջգիտակարգային հետազոտությունները,

• ուսումնասիրել բազմալեզու և բազմամշակութային հաղորդակցության տեսական և գործնական նոր մոտեցումները,

• վերլուծել լեզվի դերը ինքնության, մշակույթի և հանրային փոխազդեցության ձևավորման գործընթացներում,

• քննարկել դիսկուրսի վերլուծության, գործաբանության, հանրալեզվաբանության, ճանաչողական լեզվաբանության, կորպուսային լեզվաբանության և լեզվաքաղաքականության արդի զարգացումները,

• անդրադառնալ թարգմանագիտության, միջմշակութային հաղորդակցության և բազմալեզու կրթության ժամանակակից հիմնախնդիրներին,

• ուսումնասիրել թվային տեխնոլոգիաներով պայմանավորված արհեստական բանականության և մեդիա դիսկուրսի ազդեցությունը լեզվի և հաղորդակցության վրա,

• խրախուսել միջազգային գիտական համագործակցությունը և խթանել գիտական երկխոսությունը տարբեր լեզվամշակութային միջավայրեր ներկայացնող հետազոտողների միջև,

• հնարավորություն ընձեռել երիտասարդ հետազոտողներին ներկայացնելու իրենց աշխատանքները և ստանալու մասնագիտական արձագանքներ։

Գիտաժողովի թեմատիկ ուղղություններն ընդգրկում են (սակայն չեն սահմանափակվում հետևյալով)՝

• Տեսական և կիրառական լեզվաբանություն

• Միջմշակութային հաղորդակցություն

• Դիսկուրսի վերլուծություն և գործաբանություն

• Ճանաչողական և կորպուսային լեզվաբանություն

• Հանրալեզվաբանություն և լեզվաքաղաքականություն

• Թարգմանագիտություն

• Լեզու, ինքնություն և մշակույթ

• Գենդերային ուսումնասիրություններ

• Լեզվադիդակտիկա. անգլերենի դասավանդում և բազմալեզու կրթություն

• Թվային հաղորդակցություն և մեդիա դիսկուրս

• Արհեստական բանականություն և լեզվական տեխնոլոգիաներ

• Գրականագիտություն և մշակութային երկխոսություն

• Հաղորդակցությունը գլոբալ և բազմամշակութային համատեքստում

Անցկացման ժամկետը՝ ս.թ. նոյեմբերի 19-20

Անցկացման ձևաչափը՝ հիբրիդային (անցանց և առցանց)

Անցկացման վայրը՝ Երևան, Հայաստան

Աշխատանքային լեզուներ՝ հայերեն, ռուսերեն, անգլերեն

Զեկուցման տևողությունը՝ մինչև 30 րոպե (ներառյալ հարցուպատասխանը)

Ներկայացվող նյութերի ձևաչափը

Հայտում անհրաժեշտ է ներառել՝

• մասնակցի տվյալները՝ ազգանուն, անուն, հայրանուն, գիտական աստիճանը (կոչումը) և գիտակրթական հաստատությունը (աշխատավայրը/ուսման վայրը),

• զեկուցման վերնագիրը,

• ամփոփագիրը (մինչև 300 բառ, տառատեսակը՝ Times New Roman, տառաչափը՝ 12 pt),

• մասնակցության նախընտրելի ձևաչափը (անցանց կամ առցանց)։