«APPEAR»-ի կողմից ֆինանսավորվող «APPEAR Academic Project 373» դրամաշնորհային ծրագրի շրջանակում ԵՊՀ պատվիրակությունն այցելել է Վիեննայի համալսարան: Գործուղման ընթացքում անցկացվել են մեկնարկային աշխատաժողով և գիտական քննարկումներ «Հայաստանի անտառածածկ շրջանների միկորիզային և քսիլոտրոֆ սնկերի բազմազանության գնահատում և ԴՆԹ բարկոդավորում» թեմայով ծրագրում ընդգրկված արտասահմանյան գործընկերների մասնակցությամբ: Աշխատաժողովին ներկա է գտնվել նաև «OeAD-GmbH – Austria’s Agency for Education and Internationalisation» ծրագրի համակարգող Էլկե Ստինիգը:
Աշխատաժողովին ԵՊՀ աշխատակիցները մանրամասն ներկայացրել են ինչպես Կենսաբանության ֆակուլտետում, մասնավորապես բուսաբանության և սնկաբանության ամբիոնում կատարվող գիտական և կրթական աշխատանքների, այնպես էլ ԵՊՀ տարբեր գիտական և կրթական ծրագրերի վերաբերյալ տեղեկություններ: Կլոր սեղան-քննարկման շրջանակում անդրադարձ է կատարվել ծրագրով նախատեսված բոլոր աշխատանքներին, սահմանվել է գործողությունների ժամանակացույցը: Քննարկվել են ընդունող համալսարանի ուսումնական ծրագրերը, մանկավարժական մեթոդաբանությունը և լաբորատոր պարապմունքների անցկացման ձևաչափը:
«BioBarFungArm» նախագիծը խթանում է Վիեննայի համալսարանի և Երևանի պետական համալսարանի գիտակրթական համագործակցությունը՝ սնկերի բազմազանության հետազոտությունների և ԴՆԹ բարկոդավորման զարգացման ուղղությամբ: Նախագիծն ուղղված է ուժեղացնելու հետազոտական կարողությունները, խթանելու բարձրագույն կրթությունը և աջակցելու կայուն զարգացմանը։ Այն ամրապնդում է համագործակցությունը համալսարանների միջև՝ վերապատրաստելով երիտասարդներին, ծանոթացնելով նրանց ժամանակակից սնկաբանական և բուսաբանական հետազոտությունների նորագույն մեթոդներին:
«BioBarFungArm»-ը հավատարիմ է գենդերային բաղադրիչի ներառմանը՝ ապահովելով հավասար հնարավորություններ կանանց համար։ «APPEAR» ծրագրի շրջանակում նախագիծը համահունչ է Կայուն զարգացման 4-րդ, 5-րդ և 15-րդ նպատակներին՝ նպաստելով կենսաբազմազանության պահպանմանը և բնական ռեսուրսների կայուն օգտագործմանը։ Նախաձեռնությունն աջակցում է STEM կրթությանը, որը կարևոր է այնպիսի գլոբալ մարտահրավերների համար, ինչպիսիք են կլիմայի փոփոխությունը և թվայնացումը։ Այն նպաստում է նաև Հայաստանում բնական գիտությունների զարգացմանը։
Հայաստանում սնկաբանության և անտառային էկոհամակարգերի պահպանության ոլորտի մասնագետների պատրաստումը ծրագրի կարևոր ուղղություններից մեկն է:
Նախագիծն արդիականացնում է Երևանի պետական համալսարանի ուսումնական ծրագրերը՝ զարգացնելով շրջանավարտների գործնական հմտությունները և բարձրացնելով նրանց պահանջվածությունը գործատուների շրջանում: Միջազգային համագործակցության շրջանակում «BioBarFungArm»-ը կաջակցի գիտությանը և կրթությանը՝ ապագա սերունդներին ապահովելով բարձրորակ, միջազգային չափանիշներին համապատասխան կրթությամբ։
Ծրագրի համակարգող` Սիրանուշ Նանագյուլյան
Համակարգող կազմակերպություն` Երևանի պետական համալսարան
Ծրագրի տևողությունը` 24 ամիս (2025 թ․ մարտի 1-ից մինչև 2027 թ․ փետրվարի 28-ը)
