Лаборатория физико-химии ЕГУ будет обогащена новым оборудованием

ՀՀ ԿԳՄՍՆ բարձրագույն կրթության և գիտության կոմիտեի հայտարարած «Գիտական ստորաբաժանումների նյութատեխնիկական բազայի արդիականացման համար ֆինանսական աջակցության տրամադրում» մրցույթի շրջանակում ձեռք կբերվեն վերջին սերնդի ավտոմատ միկրոմածուցիկաչափ (Lovis 2000 M), անխափան սնուցման սարքեր և փոփոխական ծավալով մեխանիկական ճշգրիտ միկրոպիպետ: Սարքերը հնարավորություն կտան ապահովելու լաբորատորիայի անխափան աշխատանքը և կատարելու հետազոտություններ մածուցիկաչափական մեթոդով՝ ունենալով առավել ճշգրիտ գիտական արդյունքներ:

Կարևորելով լաբորատորիայի վերազինումը՝ ԵՊՀ քիմիայի ֆակուլտետի ֆիզիկական և կոլոիդների քիմիայի ամբիոնի դոցենտ, ք.գ.թ., ավագ գիտաշխատող Հասմիկ Սարգսյանը նշեց, որ հատկապես միկրոմածուցիկաչափի ձեռքբերումը խիստ անհրաժեշտություն էր լաբորատորիայի համար:

«Մինչ այժմ մենք աշխատել ենք ավելի վաղ շրջանի մածուցիկաչափերով (Օստվալդի և Ուբելոդեի մազանոթային մածուցիկաչափեր), որոնք, ի տարբերություն նոր սարքի, բավականին աշխատատար են, չեն բավարարում ներկայիս պահանջներին և զիջում են իրենց զգայունությամբ և չափման ճշգրտությամբ»,- ասաց Հասմիկ Սարգսյանը:

Նոր ավստրիական միկրոմածուցիկաչափն իր ամբողջական լրակազմով հնարավորություն կտա չափելու լուծույթների հարաբերական, բնութագրական, կինեմատիկ և դինամիկ մածուցիկությունները, ինչպես նաև պոլիմերների մոլեկուլային զանգվածները: Չափումները hնարավոր է կատարել ջերմաստիճանի (5°C-ից մինչև 100°C) և մածուցիկության (0.3-ից մինչև 10.000 մՊա•վ) լայն տիրույթներում: Պահանջվում է ուսումնասիրվող նմուշի փոքր քանակություն (0․1-0․8 մլ)։ Այն զբաղեցնում է փոքր տարածք: Չափումները կատարվում են շատ արագ. առաջին արդյունքները ստացվում են չափումից ընդամենը 30 վայրկյան հետո: Սարքը ցուցաբերում է բարձր կայունություն ագրեսիվ նմուշների նկատմամբ:

Դոցենտը շեշտեց. «Սարքի կիրառումը թույլ կտա ոչ միայն ուսումնասիրել կենսաբանական, կենսաբժշկական, քիմիական համակարգեր, այլև խթան կհանդիսանա ուսումնական գործընթացների բարելավման համար՝ կիրառվելով, օրինակ, մագիստրատուրայի դասընթացներում, մագիստրոսական թեզերի և թեկնածուական ատենախոսությունների համար կատարվող աշխատանքներում և այլն»:

Հասմիկ Սարգսյանն ընդգծեց, որ նոր միկրոմածուցիկաչափը հնարավորություն կտա զարգացնելու ամբիոնի՝ մածուցիկաչափական մեթոդով նախկինում կատարած ուսումնասիրությունները և կյանքի կոչելու գիտական նոր նախագծեր՝ խթանելով գիտական հրապարակումները և միջազգային գիտաժողովներին մասնակցությունը: