Август 05, 2025 | 14:00
Наука
Прием
Образование
«Центр приёма и работы с абитуриентами ЕГУ — это «вход» в университет». Ани Аветисян
Центр приёма и работы с абитуриентами ЕГУ действует в Ереванском государственном университете уже почти два десятилетия. Его приоритетная задача - содействовать профессиональной ориентации абитуриентов, а также стать связующим звеном между школой и университетом.
ԵՊՀ ընդունելության և դիմորդների հետ տարվող աշխատանքների կենտրոնի հիմնական նպատակն է ոչ միայն դիմորդներին ապահովել անհրաժեշտ տեղեկություններով, այլև դեռ դպրոցական տարիքից աջակցել նրանց մասնագիտական կողմնորոշման հարցում։ Նախանշված նպատակներն իրագործելու համար կենտրոնում գործում են Դիմորդների հետ տարվող աշխատանքների և Նախապատրաստական դասընթացների բաժիններ։
Կենտրոնի գործունեության, հիմնական նպատակների և առաջիկա ծրագրերի մասին զրուցել ենք Դիմորդների հետ տարվող աշխատանքների բաժնի վարիչ Անի Ավետիսյանի հետ։
Համալսարան-դպրոց փոխադարձ կապի արժևորումը
Դիմորդների հետ տարվող աշխատանքների բաժնի վարիչն ընդգծեց դպրոցականների և համալսարանականների փոխադարձ այցելությունների կարևորությունը։ Ըստ նրա՝ առաջիկայում նոր թափով կմեկնարկեն ԵՊՀ-դպրոց փոխայցելությունները։
«Այցելելով դպրոց՝ համալսարանականներն իրազեկում են ապագա դիմորդներին ԵՊՀ-ում գործող կրթական ծրագրերի, համալսարանի ընձեռած կրթական և գիտական հնարավորությունների մասին՝ դրանով իսկ կողմնորոշելով նրանց բուհի ընտրության հարցում։ Առաջիկա ուստարում նախատեսում ենք այցելություններ նախ՝ Երևանի, այնուհետև՝ ՀՀ մարզերի դպրոցներ։ Իսկ դպրոցականների՝ ԵՊՀ կատարած այցերի շրջանակում նրանք, ծանոթանալով տարբեր ֆակուլտետների գործունեությանը, առանձնահատկություններին և ընձեռած հնարավորություններին, արդեն կողմնորոշվում են մասնագիտության ընտրության հարցում»,- ասաց Անի Ավետիսյանը։
Նա նշեց նաև, որ ԵՊՀ որևէ ֆակուլտետ կամ լաբորատորիա այցելելու համար աշակերտը պետք է լրացնի առցանց հայտադիմումը՝ գրանցելով իր տվյալները և լրացնելով համապատասխան դաշտերը։ Հայտադիմումն ստանալուց հետո արդեն ԵՊՀ ընդունելության և դիմորդների հետ տարվող աշխատանքների կենտրոնի աշխատակիցները համակարգում և կազմակերպում են այցելությունները։
Բացի վերոհիշյալից՝ կենտրոնն ակտիվորեն աշխատում է տվյալների բազայի ստեղծման ուղղությամբ, որտեղ ընդգրկվում են դպրոցների ցանկը, համալսարան այցելած մասնակիցների տվյալներն ու հետագա ուսումնական գործընթացի ծրագիրը, ինչը հնարավորություն է տալիս վերլուծելու արդյունավետությունը և ձևավորելու թիրախային խմբեր։
Խրախուսանք՝ դեպի ԵՊՀ ճանապարհին
Խոսելով կենտրոնի նախաձեռնությամբ կազմակերպվող աշակերտական մրցույթներից՝ Անի Ավետիսյանն առանձնացրեց արդեն ավանդույթ դարձած ԵՊՀ աշակերտական օլիմպիադան, որն անցկացվում է ամեն տարի հանրակրթական և լրացուցիչ կրթական առարկաներից։ Այն նպատակ ունի ոչ միայն խթանելու դպրոցականների գիտական հետաքրքրությունները և բացահայտելու լավագույններին, այլև խրախուսելու նրանց հետագա ուսումնառությունը ԵՊՀ-ում։ Անի Ավետիսյանը շեշտեց՝ մրցույթի արդյունքում առաջին կարգի դիպլոմի արժանացած մասնակիցները ԵՊՀ վճարովի համակարգ ընդունվելու դեպքում առաջին կուրսում ստանում են 50%, երկրորդ կարգի դիպլոմի արժանացածները՝ 40%, երրորդ կարգի դիպլոմակիրները՝ 30% ուսման վարձի զեղչ։
Մասնագիտական կողմնորոշում՝ անձնային առանձնահատկությունների բացահայտման հիման վրա
Անի Ավետիսյանի խոսքով՝ կենտրոնի նոր նախաձեռնություններից է ԵՊՀ փիլիսոփայության և հոգեբանության ֆակուլտետի հետ համատեղ մշակվող ծրագիրը, որի միջոցով կատարվելու է դպրոցականների մասնագիտական կողմնորոշման գնահատում։ Սա հնարավորություն կտա դիմորդին հասկանալու՝ արդյո՞ք իր ընտրած մասնագիտությունը համապատասխանում է իր կարողություններին, թե՞ ոչ։
Բաց համալսարան բոլորի համար
Դիմորդների հետ տարվող աշխատանքների բաժնի վարիչն ընդգծեց, որ կենտրոնը կազմակերպում է բաց դռների օրեր, էքսկուրսիաներ դեպի ԵՊՀ լաբորատորիաներ (Ֆիզիկայի ինստիտուտ, Կենսաբանության և Քիմիայի ֆակուլտետներ և այլն), ինչպես նաև թեմատիկ աշխատարաններ՝ տնտեսագիտության, իրավագիտության և այլն։ Այցելելով համալսարան և գործնականում ծանոթանալով ակադեմիական միջավայրին՝ դիմորդները, որոնք դեռևս հստակ չեն որոշել՝ ինչ մասնագիտություն են ընտրելու, արդեն հաստատուն որոշում են կայացնում ապագա մասնագիտության ընտրության հարցում։
Առաջիկա ծրագրեր
Անդրադառնալով «Բանուգործ․ ԵՊՀ էքսպո» ամենամյա ցուցահանդեսում կենտրոնի ներգրավվածությանը՝ Ա․ Ավետիսյանը նշեց․ ««Բանուգործ․ ԵՊՀ էքսպո»-ի շրջանակում ԵՊՀ ընդունելության և դիմորդների հետ տարվող աշխատանքների կենտրոնը էքսպոյի մասնակիցներին է ներկայացնում տեղեկատվական թերթիկներ (բուկլետներ), որոնցում սովորաբար ընդգրկված է դիմորդի ուղեցույցը․ այնտեղ մանրամասնորեն նկարագրվում են համալսարանի գործունեությունը, դիմորդի ընտրած մասնագիտության ընձեռած կարիերայի հնարավորությունները»։
Այս համատեքստում մեր զրուցակիցը մատնանշեց, որ հաջորդ ուստարվա առաջնային նպատակներից է տեղեկատվական թերթիկներում ընդգրկել նաև ԵՊՀ շրջանավարտների հաջողության պատմությունները, գործակցային ծրագրերի և ընդունելության արդյունքների վերաբերյալ տեղեկություններ, որպեսզի մատուցվող տեղեկությունը առավելագույնս ծառայի իր նպատակին։
Նա ընդգծեց՝ կենտրոնի նպատակն է վերոնշյալ ծրագրերի միջոցով հասնել նրան, որ դիմորդը մասնագիտություն ընտրելիս կողմնորոշված ու ինքնորոշված որոշում կայացնի և ընտրի ոչ թե «նորաձև» մասնագիտություն, այլ հիմնվի իր կարողությունների և տվյալ մասնագիտության վերաբերյալ ունեցած լայն պատկերացումների վրա։ Մեծապես կարևորվում է նաև այն, որ դիմորդը հստակ պատկերացում ունենա, թե որտեղ է գալիս և ինչ գիտելիք է ստանալու։
Խոսելով ԵՊՀ ընդունելության և դիմորդների հետ տարվող աշխատանքների կենտրոնի առաքելության մասին՝ Անի Ավետիսյանը շեշտեց․ «Կենտրոնը «մուտքն» է դեպի համալսարան»։
