Состоялась презентация армяноязычного учебного пособия «Управление фармацевтической деятельностью. Организация и регулирование фармацевтической деятельности. Часть II»

Данное руководство может стать опорой в сфере фармацевтического образования, практической деятельности организаций здравоохранения, а также в процессах государственного регулирования и разработки фармацевтической политики.

Ուսումնական ձեռնարկի հեղինակը Ֆարմացիայի ինստիտուտի ֆարմտեխնոլոգիայի և ֆարմացիայի էկոնոմիկայի ու կառավարման ամբիոնի դոցենտ, դ.գ.թ. Ալբերտ Սահակյանն է:

Վերոնշյալ ձեռնարկը ոլորտային կրթական աշխատանքի շարունակությունն է, որի հիմքը դրվել է առաջին մասում՝ դեղագործական կառավարման հիմնարար սկզբունքների ներկայացմամբ:

Ֆարմացիայի ինստիտուտի դեղերի որակի հսկման և մոնիթորինգի գիտաուսումնական կենտրոնի փորձագետ Անի Չախոյանն ընդգծեց, որ ձեռնարկի առաջին մասում անդրադարձ է կատարվել դեղերի ստեղծմանը, դասակարգմանը, շրջանառությանը, կլինիկական ուղեցույցներին և ֆորմուլյարային համակարգերին, դեղագործական կադրերի պատրաստմանը, ինչպես նաև էթիկայի և դեոնթոլոգիայի խնդիրներին՝ ուսումնական կառուցվածքով, ինքնաստուգման հարցերով, ինչպես նաև թեստային օրինակներով։

«Ուսումնական ձեռնարկի երկրորդ մասն առանձնանում է իր կիրառական կառուցվածքով և համակարգված մոտեցմամբ։ Այն առաջին անգամ հայերենով ներկայացնում է Հայաստանի Հանրապետությունում դեղերի ապահովման և դեղատնային գործունեության կազմակերպման և կարգավորման ամբողջական շրջանակը»,- մատնանշեց նա։

«Դեղագործական գործունեության կառավարումը: Դեղագործական գործունեության կազմակերպումը և կարգավորումը։ Մաս II» ձեռնարկը բաժանված է թեմատիկ գլուխների, որոնցից յուրաքանչյուրում անդրադարձ է կատարվում ոլորտի կոնկրետ գործառույթներին, մասնավորապես դեղերի իրացմանը, ներմուծմանը, բաշխմանը, որակի հսկմանը, դեղատնային գործունեության կազմակերպման մոդելներին, պետական վերահսկողության պահանջներին, դեղերի պահպանման և հաշվառման տեխնիկական պահանջներին, հանրային առողջության և դեղագործության փոխկապակցվածությանը, ինչպես նաև միջազգային փորձի համադրմանը՝ տեղայնացված օրենսդրական հղումներով: Ձեռնարկի յուրաքանչյուր բաժնում առկա են գործնական օրինակներ, հղումներ ՀՀ օրենսդրությանը, ինչպես նաև ուսանողների համար նախատեսված առաջադրանքներ:

ԵՊՀ գիտական քարտուղար, ուսումնական ձեռնարկի խմբագիր Մերի Հովհաննիսյանը նշեց, որ գրքերի նկատմամբ սերն իրեն մղել է դեպի հրատարկչական ոլորտ, և տարիների ընթացքում ձևավորվել է կայուն համագործակցություն թե՛ ԵՊՀ, թե՛ այլ հրատարակչությունների հետ։

«Փորձում եմ այնպես անել, որ հարուստ բովանդակություն ունեցող այսօրինակ գրքերը ուսանողներին և, առհասարակ, ընթերցողներին ներկայանան գեղեցիկ հայերենով: Կարծում եմ՝ այն ջանքերը, որոնք ներդրել եմ նաև այս գրքում, ներդաշնակ և համարժեք կլինեն գրքի խորիմաստ բովանդակությանը»,- ասաց նա:

Մերի Հովհաննիսյանը հավելեց, որ այս գիրքն օգտակար է ոչ միայն ոլորտի մասնագետների, այլև ողջ հասարակության համար, քանի որ ընթերցողների շրջանում ձևավորվում է պատասխանատվություն սեփական առողջության նկատմամբ:

Ֆարմացիայի ինստիտուտի տնօրեն Աննա Մկրտչյանն էլ հույս հայտնեց, որ ինստիտուտի մյուս ամբիոններում ևս կձեռնարկվեն քայլեր՝ մայրենի լեզվով մասնագիտական առարկաների դասագրքեր ստեղծելու ուղղությամբ: Նրա համոզմամբ՝ գիտելիքն ի սկզբանե պետք է ձեռք բերել մայրենի լեզվով, ինչից հետո միայն կարելի է անդրադառնալ օտարալեզու գրականությանը:

Ձեռնարկի հեղինակ, Ֆարմացիայի ինստիտուտի ֆարմտեխնոլոգիայի և ֆարմացիայի էկոնոմիկայի ու կառավարման ամբիոնի դոցենտ, դ.գ.թ. Ալբերտ Սահակյանը գրքի հաջողությունը մեծապես պայմանավորեց այն հանգամանքով, որ ինքն ունի մասնագիտական պրակտիկ գործունեության երկար տարիների աշխատանքային փորձ: Նա նաև խորհուրդ տվեց այն մարդկանց, որոնք չունեն մասնագիտական պրակտիկ գործունեության աշխատանքային փորձ, սակայն պատրաստվում են գիրք գրել, անպայման սերտ համագործակցել պրակտիկ գործունեություն ծավալած անձանց հետ:

«Խորհրդային տարիների գրքերում, օրինակ, նկատել եմ մի շարք թերություններ: Դրանով պայմանավորված՝ ձեռնարկի առաջին մասը նվիրել եմ հանրային առողջապահության այն հասկացություններին, որոնք հավասարապես պետք են դեղագործներին և բժիշկներին: Դեղագործները, օրինակ, ծանոթ չեն հիվանդության սահմանումներին, առողջության վրա ազդող ռիսկի գործոններին: Խորհրդային գրքերում չկան այնպիսի հատվածներ, որոնք, օրինակ, վերաբերում են դեղային քաղաքականությանն ու դեղերի արդյունավետ կիրառմանը»,- ընդգծեց նա:

Ձեռնարկի հեղինակն օրինակներով անդրադարձավ նաև գրքի կիրառական նշանակությանը դեղագործական կրթության, առողջապահության կազմակերպման և պետական կարգավորման ոլորտներում:

Նշենք, որ միջոցառմանը ներկա էին ոլորտի առաջատար մասնագետներ, պրոֆեսորադասախոսական կազմի ներկայացուցիչներ և ուսանողներ՝ դեղագործական կրթության ու գործնական փորձի տարբեր հարթակներից: