Կրթությունն ու արդյունաբերությունը՝ համագործակցության առանցքում․ ԵՊՀ-ն համագործակցության հուշագիր է կնքել

Հուշագրի շրջանակում կողմերը նախատեսում են համատեղել համալսարանի գիտակրթական ներուժն ու «Ավտո Գելլրի»-ի ոլորտային փորձը՝ նպաստելով բարձր որակավորում ունեցող մասնագետների պատրաստմանը և ժամանակակից տեխնոլոգիական ուղղություններով հետազոտությունների զարգացմանը։

Համագործակցության առանցքում հատկապես էներգետիկ տեխնոլոգիաների, էներգիայի կուտակման համակարգերի, մարտկոցային տեխնոլոգիաների և էլեկտրատեխնիկական առաջադեմ լուծումների ոլորտներն են։ 

Նախատեսվում է նաև ստեղծել միջառարկայական կրթական մոդուլներ՝ համադրելով ֆիզիկան, նյութագիտությունը, էլեկտրոնիկան և էներգետիկ ճարտարագիտությունը։

Հուշագրի կարևոր բաղադրիչներից է ԵՊՀ ֆիզիկայի ինստիտուտի կոնդենսացված վիճակի ֆիզիկայի ամբիոնի «Պինդմարմնային նանոֆիզիկա և նանոնյութեր» մագիստրոսական կրթական ծրագրի ուսանողներին աջակցության տրամադրումը։ Համագործակցության շրջանակում «Ավտո Գելլրի» ընկերությունը յուրաքանչյուր տարի կփոխհատուցի առնվազն չորս ուսանողի ուսման վարձը։

Համագործակցությունը ներառում է նաև արդյունաբերության կարիքներին համապատասխան մագիստրոսական և դոկտորական հետազոտական թեմաների մշակման աջակցություն, հրավիրված դասախոսությունների ու մասնագիտացված դասընթացների կազմակերպում, համատեղ գիտական հրապարակումների պատրաստում և դրամաշնորհային առաջարկների ներկայացում։

Միաժամանակ, «Ավտո Գելլրի»-ի աշխատակիցները հնարավորություն կունենան ներգրավվելու համապատասխան մասնագիտական աշխատաժողովներում և գիտաժողովներում՝ նպաստելով համալսարանի և ոլորտի մասնագետների միջև գիտելիքի ու փորձի փոխանակմանը։

ԵՊՀ-ն իր հերթին ուսումնական ծրագրերում կներդնի նպատակային դասընթացներ և սահմանված կարգով կապահովի պրոֆեսորադասախոսական կազմի ներգրավումը դասընթացների ու համատեղ նախագծերի իրականացման գործընթացում։