Փետրվարի 11-ը նշվում է որպես Գիտության ոլորտում կանանց և աղջիկների միջազգային օր, որը սահմանվել է ՄԱԿ-ի գլխավոր ասամբլեայի 2015 թվականի դեկտեմբերի 22-ի բանաձևով։ Տոնը նշվում է 2016 թվականից և նպատակ ունի ընդգծելու գիտության ոլորտում կանանց ներուժի օգտագործման, գիտությամբ զբաղվելու համար հավասար իրավունքների և հնարավորությունների ապահովման կարևորություն։

Ս.թ. փետրվարի 11-ին Երևանի պետական համալսարանում տեղի կունենա «Կանայք գիտության մեջ՝ հավասար իրավունքներով, հավասար հնարավորություններով» խորագրով միջոցառումը՝ ուղղված գիտության ոլորտում կանանց և աղջիկների ներգրավվածության վերաբերյալ իրազեկման բարձրացմանը, առկա խնդիրների քննարկմանը, ինչպես նաև երիտասարդ աղջիկների շրջանում գիտության հանդեպ հետաքրքրության մեծացմանը: 

Այդ օրվա շրջանակում ԵՊՀ-ում նախատեսվում են մի շարք միջոցառումներ (պանելային քննարկումներ, աշխատարաններ, գիտական խաղեր)՝ ուղղված երկու հիմնական նպատակների իրականացմանը․

1. Ոգեշնչել աղջիկներին՝ նրանց հետաքրքրասիրությունը վերածելու գիտական հետազոտությունների և հայտնագործությունների։

2. Խթանել զրո խտրականության մշակույթը՝ բարձրաձայնելով և քննարկելով գիտության ոլորտում դեռևս առկա սոցիալական, տնտեսական, աշխարհագրական և այլ անհավասարությունները։

Գիտության ոլորտում կանանց և աղջիկների միջազգային օրվան նվիրված միջոցառումը բաց է լինելու հանրության համար և ներառելու է մի շարք բաղադրիչներ՝

• բացման խոսքեր,

• հիմնական զեկույց/խոսնակ (գիտության ոլորտում կանանց և աղջիկների ներգրավվածության խնդիրների ու մարտահրավերների մասին Հայաստանում),

• զուգահեռ պանելային քննարկումներ (քաղաքականություն, ինչո՞ւ զբաղվել գիտությամբ, կին գիտնականների խնդիրներ),

• կանանց ոգեշնչող պատմությունների ներկայացում,

• աշխատարաններ և ցուցադրություններ, այդ թվում՝ աշակերտական խմբերի համար,

• դպրոցականների համար գիտական խաղեր։