2026 թվականի հոկտեմբերի 7-9 ԵՊՀ տնտեսագիտության և կառավարման ֆակուլտետում կանցկացվի «Փոխակերպվող տնտեսություն. «կանաչ» վերափոխում, ինստիտուտների որակ և արժեքի ստեղծում» խորագրով միջազգային 3-րդ գիտաժողովը:
Գիտաժողովը կազմակերպվում է Երևանի պետական համալսարանի տնտեսագիտության և կառավարման ֆակուլտետի և Տարածաշրջանային գիտության ակադեմիայի համագործակցության շրջանակում:
Գիտաժողովի նպատակն է ապահովել հարթակ նորարարական հետազոտությունների արդյունքների տարածման համար՝ խթանելով համագործակցությունը աշխարհի տարբեր գիտակրթական հաստատությունների հետազոտողների, պրակտիկ մասնագետների և քաղաքականություն մշակողների միջև:
Տնտեսությունները կանգնած են կառուցվածքային վերափոխումների անհրաժեշտության առաջ՝ պայմանավորված գլոբալ «կանաչ» օրակարգի իրականացման, կլիմայական քաղաքականությունների խստացման, ինչպես նաև ինստիտուտների փոխակերպման և կառավարման մոդելների արդիականացման հրամայականով։ Գիտաժողովը նպատակ ունի ուսումնասիրելու, թե ինչ դեր ունեն ինստիտուտների բարեփոխումները, և ինչպես կարող են կառուցվածքային վերափոխումները, «կանաչ» տեխնոլոգիաներն ու կայուն զարգացման սկզբունքներն արդյունավետորեն ինտեգրվել ազգային և տարածաշրջանային զարգացման քաղաքականությունների մեջ և ապահովել ավելի մրցունակ, ներառական և կայուն տնտեսական միջավայր՝ վերաիմաստավորելով արժեքի ստեղծման մեխանիզմները։
