Կրթությունից դեպի աշխատաշուկա․ ուսանողի հայացքը մասնագիտական զարգացման հնարավորություններին

- Արիա՛նա, Ձեր կարծիքով՝ որքանո՞վ է կարևոր, որ բարձրագույն կրթությունը համապատասխանի աշխատաշուկայի պահանջներին։

- Կրթությունը պետք է սերտորեն կապված լինի աշխատաշուկայի պահանջների հետ։ Միայն գիտելիքի փոխանցումը բավարար չէ․ կարևոր է, որ ուսանողը կարողանա ձեռք բերած գիտելիքը կիրառել իրական մասնագիտական միջավայրում և պատկերացում կազմի այն հմտությունների ու կարողությունների մասին, որոնք անհրաժեշտ են աշխատաշուկայում հաջողելու համար։

- Ի՞նչ դեր կարող են ունենալ այսօրինակ միջոցառումները ուսանողների մասնագիտական կողմնորոշման և ապագա կարիերայի ձևավորման գործընթացում։

- Նման միջոցառումները ուսանողներին հնարավորություն են տալիս անմիջականորեն ծանոթանալու մասնագիտական տարբեր ուղղությունների, կազմակերպությունների և հնարավորությունների։ Դրանք կարող են օգնել երիտասարդներին ավելի հստակ պատկերացնելու իրենց մասնագիտական հետաքրքրությունները, շփվելու ոլորտի ներկայացուցիչների հետ և կողմնորոշվելու կարիերայի հարցում։

- Մասնագիտական գիտելիքներից բացի՝ ի՞նչ հմտություններ են այսօր առավել պահանջված երիտասարդ մասնագետների շրջանում։

- Հատկապես կարևոր են հաղորդակցական հմտությունները։ Մասնագիտական գիտելիքն անհրաժեշտ հիմք է, սակայն ժամանակակից աշխատաշուկայում կարևոր են նաև մարդկանց հետ արդյունավետ հաղորդակցվելու, թիմում աշխատելու, սեփական մտքերը հստակ ներկայացնելու և տարբեր իրավիճակներում համագործակցելու կարողությունները։

- Ինչպե՞ս կարող է համալսարան-գործատու համագործակցությունն օգնել ուսանողի ստացած գիտելիքը իրական մասնագիտական փորձի վերածելուն։

- Այդ նպատակին հասնելու արդյունավետ ճանապարհներից մեկը համալսարանների և գործատուների համատեղ ծրագրերի իրականացումն է։ Ուսանողների համար կարևոր է հնարավորություն ստեղծել ոչ միայն տեսական գիտելիք ստանալու, այլև գործնական միջավայրում այն կիրառելու, մասնագետների հետ շփվելու և իրական աշխատանքային գործընթացներին ծանոթանալու համար։

- Ձեր կարծիքով՝ ո՞րն է ամենամեծ մարտահրավերը, որին այսօր բախվում են ուսանողները աշխատաշուկա մտնելիս։

- Հիմնական մարտահրավերներից մեկը աշխատանքային փորձի պակասն է։ Երիտասարդներից շատերն ունեն անհրաժեշտ տեսական գիտելիքներ, սակայն աշխատանքի առաջին փուլում դժվարանում են դրանք գործնականում կիրառել։ Այս համատեքստում կարևոր են համալսարանների և գործատուների համատեղ ծրագրերը, որոնք կարող են ուսանողներին հնարավորություն տալ դեռևս ուսումնառության ընթացքում ձեռք բերելու գործնական փորձ և ավելի պատրաստված մտնելու աշխատաշուկա։

- Որքանո՞վ են կարևոր ուսանողների համար ոչ ֆորմալ կրթությունը, կամավորությունը և նախագծային աշխատանքը։

- Կարևոր է, որ երիտասարդը հնարավորություն ունենա տարբեր ոլորտներ փորձելու։ Նա կարող է մասնակցել տարբեր ծրագրերի, իրականացնել նախագծեր, ներգրավվել կամավորական աշխատանքներում, շփվել տարբեր մարդկանց հետ՝ հասկանալու, թե որ ուղղությամբ է ցանկանում զարգանալ։ Նման գործունեության միջոցով ձևավորվում են պատասխանատվության, համագործակցության և ինքնուրույն գործելու կարողություններ։ Շատ հաճախ սեփական ճանապարհը գտնում ենք ոչ թե միայն մտածելով, այլև փորձելով ու գործելով։

- Ձեր կարծիքով՝ ի՞նչ պետք է վերցնի իր հետ այսօրվա «ԲանՈՒԳործ» էքսպոյից յուրաքանչյուր ուսանող՝ բացի նոր ծանոթություններից և նոր տեղեկություններից։

- Կարծում եմ՝ յուրաքանչյուր ուսանող այստեղից պետք է վերցնի գոնե մեկ կոնկրետ հաջորդ քայլ։ Դա կարող է լինել ինքնակենսագրական ուղարկելը, որևէ նոր ոլորտ փորձելը, որևէ կազմակերպության հետ կապ հաստատելը կամ պարզապես հասկանալը, թե ինչ ուղղությամբ է ցանկանում զարգանալ։ Ի վերջո, հնարավորությունը արժեքավոր է դառնում այն ժամանակ, երբ մենք ինքներս որոշում ենք օգտագործել այն։