«Համալսարանական լինելն արժեհամակարգ է»․ ԵՊՀ ֆիզիկայի ինստիտուտի տնօրեն Խաչատուր Ներկարարյան

- Պարո՛ն Ներկարարյան, ինչպե՞ս եք գնահատում շրջանավարտների հետ կապի դերակատարումը համալսարանի համար։

- Շրջանավարտների հետ կապը միայն հուշերով ապրելու կամ հպարտանալու միջոց չէ․ դա գործնական անհրաժեշտություն է։ Երբ մենք կապ ենք պահում շրջանավարտների հետ, ավելի լավ ենք հասկանում, թե որ ուղղությունները պետք է զարգացնել, ինչ պահանջներ ունի աշխատաշուկան։ Նրանք, ովքեր հաջողության են հասել տարբեր ոլորտներում, կարող են մեզ համար դառնալ կարևոր գործընկերներ։ Նրանց օգնությամբ կարող ենք կապ հաստատել կազմակերպությունների հետ, որոնք հետաքրքրված են մեր ուսանողներով։ Ունենք արդեն դրական օրինակներ՝ կազմակերպություններ, որոնք մեր շրջանավարտների ջանքերով են ստեղծվել և այսօր համագործակցում են մեզ հետ։

- Ըստ Ձեզ՝ ի՞նչ է նշանակում լինել համալսարանական։

- Համալսարանական լինելն արժեհամակարգ է։ Աշխարհի բազմաթիվ երկրներում, օրինակ՝ Մեծ Բրիտանիայում, ԱՄՆ-ում, համալսարանի շրջանավարտ լինելը հպարտություն է և մեծ դերակատարում ունի հասարակական ու քաղաքական կյանքում։ Պատկերացրե՛ք՝ Հայաստանում որոշումների կայացման մակարդակում մարդիկ առաջնորդվեին իրենց համալսարանական ինքնությամբ․ դա միավորող սկզբունք է, ոչ թե բաժանող։ Ուզում եմ հավատալ, որ մի օր այդ սկզբունքը մեզ մոտ ևս կընդունվի։

- Այդուհանդերձ, փաստ է, որ Հայաստանում բուհերի և շրջանավարտների միջև կապը միշտ չէ, որ պահպանվում է։ Ինչո՞վ է դա պայմանավորված։

- Ցավոք, այդ ավանդույթը մեզ մոտ ամբողջապես չի ձևավորվել։ Ուսումնասիրելով այլ երկրների փորձը՝ տեսնում ենք, որ այնտեղ համալսարանները ձևավորում են քաղաքական և տնտեսական էլիտան։ Այդ գիտակցությունը մեզ մոտ դեռ պետք է արմատավորվի։ Գուցե մեծամտություն թվա, բայց կարծում եմ՝ մեր երկրի էլիտան պետք է ձևավորի հենց ԵՊՀ-ն։ Այդպես է եղել պատմության ընթացքում, այդպես էլ պիտի շարունակի լինել։

- Ի՞նչ աշխատանքներ է կատարում Ֆիզիկայի ինստիտուտը շրջանավարտների հետ կապի պահպանման ուղղությամբ։

- ԵՊՀ ֆիզիկայի ինստիտուտը մշտապես փորձել է կապ պահպանել շրջանավարտների հետ։ Վերջին տարիներին հատկապես ակտիվ շփումներ ենք ունեցել պատերազմների մասնակից շրջանավարտների հետ։ Նրանք իրենց ստացած գիտելիքներով կարողացել են աջակցել մեզ գիտակրթական ոլորտում։ Ունենք նաև սերտ կապեր արտերկրում բնակվող շրջանավարտների հետ։ Սակայն կցանկանայի, որ այդ կապերն է՛լ ավելի խորանային՝ դառնալով առավել համակարգված և ամուր։

- Պարո՛ն Ներկարարյան, ս.թ. մայիսի 15-ին և 16-ին Երևանի պետական համալսարանում առաջին անգամ կանցկացվի ԵՊՀ շրջանավարտների ֆորում, որը կհամախմբի համալսարանի շրջանավարտներին։ Ի՞նչ սպասելիքներ ունեք այս միջոցառումից։

- Շատ դրական ակնկալիքներ ունեմ այս կարևոր նախաձեռնությունից։ Շրջանավարտների ֆորումը կարող է դառնալ այն հարթակը, որը կամրապնդի կապը ԵՊՀ-ի և շրջանավարտների միջև։ Սա բացառիկ հնարավորություն է՝ վերամիավորվելու, վերագնահատելու համալսարանական անցյալը և ստեղծելու համագործակցության նոր ձևաչափեր։ Հուսով եմ, որ ֆորումը կամուրջներ կստեղծի գիտության և կրթության միջև՝ միավորելով այն անհատներին, որոնք տարիներ առաջ հենց ԵՊՀ-ից են սկսել իրենց մասնագիտական ուղին։ Ֆորումի շրջանակում կտեսնենք հաջողակ մասնագետների, գործարարների, գիտնականների, մշակույթի գործիչների, որոնք կարող են և պատրաստ են աջակցելու համալսարանին՝ նոր սերնդի կրթման և զարգացման ճանապարհին։ Շրջանավարտների ֆորումը նաև շատ կարևոր ուղերձ է այսօրվա ուսանողներին՝ ցույց տալու, որ համալսարանական ընտանիքը մեծ ու կայուն կառույց է, որի անդամ լինելը պատիվ է, բայց միևնույն ժամանակ՝ պատասխանատվություն։ Հուսով եմ, որ այս նախաձեռնությունը կլինի շարունակական և կդառնա ԵՊՀ ավանդույթներից մեկը։

- Ի՞նչ ուղերձ կհղեք համալսարանական համայնքին։

- Ուղերձս պարզ է. մենք մի ամբողջություն ենք։ Եվ եթե մեր ամբողջ կյանքում չենք կրում համալսարանականի կոչումը, դա վկայում է այն մասին, որ մի բան սխալ ենք անում։ Համալսարանական լինելը պատիվ է և պարտականություն։ Մենք պետք է լրջորեն վերաբերվենք իրար աջակցելու, համագործակցելու գաղափարին։ Հակառակ դեպքում՝ մեր հասարակությունն ու երկիրը շատ բան կկորցնեն։