Հունիսի 25-ին լրացավ ՀՀ գիտության վաստակավոր գործիչ, ճանաչված մեխանիկոս, հոծ միջավայրի մեխանիկայի ամբիոնի երկարամյա վարիչ, ֆիզիկամաթեմատիկական գիտությունների դոկտոր, պրոֆեսոր, ՀՀ ԳԱԱ ակադեմիկոս Վլադիմիր Սարգսի Սարգսյանի (1935-2013 թթ.) 90-ամյակը։
Վ․Ս․ Սարգսյանն իր գիտամանկավարժական գործունեությամբ նշանակալի ներդրում ունի համալսարանական կրթության կազմակերպման և հայրենական գիտության զարգացման բնագավառում: Նրա գիտաուսումնական գործունեությունը ամբողջովին կապված էր Երևանի պետական համալսարանի հետ:
1986 թվականին անվանի գիտնականն ընտրվում է ՀՀ ԳԱԱ թղթակից անդամ, իսկ 1996-ին՝ ՀՀ ԳԱԱ ակադեմիկոս:
Մեխանիկայի ֆակուլտետի հիմնադիր դեկան Վ.Ս. Սարգսյանի գիտակրթական գործունեությունը լիարժեք դրսևորվել է մեխանիկամաթեմատիկական ֆակուլտետի հոծ միջավայրի մեխանիկայի ամբիոնում՝ ղեկավարելով ամբիոնը 25 տարի շարունակ:
Մեծ է Վ.Ս. Սարգսյանի ավանդը Հայաստանում դեֆորմացվող պինդ մարմնի մեխանիկայի զարգացման գործում: Գիտական աշխարհում նա ճանաչված էր որպես պինդ մարմնի մեխանիկայի բնագավառում հմուտ մասնագետ և արդյունավետ հետազոտող: Վ.Ս. Սարգսյանի գիտական հետաքրքրություններն ընդգրկում էին նաև ավելի լայն շրջանակ՝ էական ներդրում ունենալով ժամանակի գիտատեխնիկական խնդիրների արդիական հարցերի պարզաբանման հետ սերտ կապված գիտական ոլորտների զարգացման մեջ: Նա գիտական հետազոտությունների հիմնական արդյունքները բազմիցս ներկայացվել է միջազգային գիտաժողովներում, կոնգրեսներում:
Ակադեմիկոս Վ. Սարգսյանը ստեղծել է անհամասեռ, անիզոտրոպ մարմնի առաձգականության տեսության գիտական դպրոց: Հետազոտությունները վերաբերում են ժամանակակից այնպիսի հարցերի, ինչպիսիք են կոմպոզիտ նյութերից պատրաստված կառուցվածքների ամրությունը, դրանց ձևի ու նյութի օպտիմալ նախագծումը, անհամասեռ անիզոտրոպ սալերի և թաղանթների տատանումները և կայունությունը, ոլորման և ծռման մաթեմատիկական տեսությունները, առաձգական վերադիրներով առաձգական մարմինների կոնտակտային խնդիրները: Վերոնշյալ հարցերի ու խնդիրների լուծման համար էական նշանակություն են ունեցել նրա առաջարկած ու ընդհանրացրած ֆիզիկական և երկրաչափական փոքր պարամետրերի մեթոդները, ինտեգրադիֆերենցիալ հավասարումների և ֆունկցիոնալ անալիզի կիրառությունների հիման վրա կառուցված մոտավոր լուծման եղանակը: Գիտական նոր սերնդի պատրաստման գործում պրոֆեսորի մեծ ավանդի մասին է խոսում այն փաստը, որ նրա անմիջական ղեկավարությամբ և խորհրդատվությամբ պաշտպանվել են մեր և այլ երկրների երիտասարդ գիտնականների 50-ից ավելի թեկնածուական և դոկտորական ատենախոսություններ:
Ակադեմիկոս Վ.Ս. Սարգսյանի գիտական ձեռքբերումներն ամփոփված են նրա մենագրություններում՝ «Անիզոտրոպ մարմնի առաձգականության մաթեմատիկական տեսության մի քանի խնդիրներ», «Կոնտակտային խնդիրներ առաձգական վերադիրներով կիսահարթությունների և շերտերի համար», «Առաձգականության տեսության նոր դասի խնդիրներ», «Կառուցվածքների օպտիմալ նախագծում», և ներկայացված հեղինակավոր պարբերականներում հրապարակված բազմաթիվ գիտական հոդվածներում: Նա հրատարակել է մեխանիկայի տարբեր բնագավառներին նվիրված մի շարք դասագրքեր և ուսումնական ձեռնարկներ:
Պրոֆեսոր Վ.Ս. Սարգսյանի գիտական վաստակը բարձր է գնահատվել հայրենիքում և արտերկրում: 1981 թվականին Վ.Ս. Սարգսյանն արժանացել է ՀԽՍՀ գիտության վաստակավոր գործչի կոչման, 1999 թվականին պարգևատրվել է «Անանիա Շիրակացի» պետական մեդալով: Միջազգային գիտական կապերի ամրապնդման և կադրերի պատրաստման գործում կատարած աշխատանքների համար արժանացել է Բրատիսլավայի համալսարանի ոսկե մեդալի, Եգիպտոսի Մանսուրայի համալսարանի մեդալի: 2009 թվականին կրթության ու գիտության բնագավառներում ներդրած նշանակալի ավանդի համար ակադեմիկոսը պարգևատրվել է ՀՀ վարչապետի հուշամեդալով:
