«Ո՞վ է ուզում մեկ գործարքից վաստակել 100․000 ԱՄՆ դոլար». գործարար Գևորգ Սաֆարյանի հարցը ԵՊՀ ուսանողներին

ԵՊՀ շրջանավարտների ֆորումի ժամանակ Տնտեսագիտության և կառավարման ֆակուլտետի շրջանավարտ Գևորգ Սաֆարյանը հանդես եկավ «Հայաստանում ստեղծված տեխնոլոգիաները աշխարհի համար» թեմայով բանախոսությամբ՝ խոսելով այն մասին, թե ինչպես է Հայաստանում փոքր ռեսուրսներով հիմնել բիզնես, որն այսօր իր արտադրանքը արտահանում է տարբեր երկրներ։

2007 թ․ գործարարներից մեկը Գևորգ Սաֆարյանին հարցրեց, թե ինչու նրանք հերթի կառավարման համակարգեր չեն ներմուծում Հայաստան։ Նա ընդգծեց՝ ընդամենը մեկ ժամվա ընթացքում ինքն ու ընկերը որոշում են նախաձեռնել արտադրություն հենց Հայաստանում․ այդ ժամանակ Գևորգ Սաֆարյանը դեռ 23 տարեկան էր։

«Քննարկումներից մեկի ժամանակ հարց հնչեց՝ արդյո՞ք ռեսուրսների պակասը կարող է խոչընդոտ լինել ձեռնարկություն սկսելու համար։ Ես այստեղ եմ հենց դրա մասին պատմելու համար, թե ինչպես մենք ամեն ինչ սկսեցինք գրեթե զրոյից՝ հիմնելով մեր առաջին բիզնեսը՝ «Lime Tech» ընկերությունը»,- ընդգծեց Գևորգ Սաֆարյանը՝ մատնանշելով, որ ընկերությունը հիմնադրել են՝ ապավինելով գաղափարին, գիտելիքներին, ընկերական ու ընտանեկան օժանդակությանը։

Նրանց հաջողվեց Հայաստանում արտադրել հերթի կառավարման համակարգի կտրոն տպող առաջին տերմինալը։ Բիզնեսի մեկնարկից ընդամենը վեց ամիս անց թիմը կարողացավ վաստակել իր առաջին 100․000 ԱՄՆ դոլարը։ Գ․ Սաֆարյանը վստահեցրեց, որ յուրաքանչյուր ուսանող կարող է հասնել նման արդյունքի, եթե կարողանա համադրել իր գաղափարն ու նախաձեռնողականությունը։ Նրա խոսքով՝ հաճախ հենց ամենապարզ բաներն ենք շրջանցում, մինչդեռ դրանք կարող են վերածվել իրական արտադրանքի և հաջողության պատմության։

«Ես ուզում եմ ապացուցել ձեզ, որ այս լսարանում գտնվողներից յուրաքանչյուրը կարող է կազմակերպել այս սարքի արտադրությունը։ Եկե՛ք այս պահին շատ արագ պատկերացնենք հետևյալը․ ինչպե՞ս ենք արտադրում այս սարքը»,- ասաց նա, և նրա հարցին ուսանողները պատասխանեցին՝ սենսորային էկրան, մետաղակաղապար, ծրագրային ապահովում, տպիչ սարք, թուղթ, համակարգիչ։

Գործարարը ուսանողներին պատմեց, որ անհրաժեշտ բաղադրիչները ձեռք բերելուց հետո կատարվել է սարքի ծրագրային ապահովում ընդամենը 500 ԱՄՆ դոլարով։

Առաջին սարքը, որին սկսնակ գործարարները հանդիպել են, տեղադրված է եղել ՀՀ բանկերից մեկում։ Երբ հետաքրքրվել են, պարզել են, որ նմանատիպ սարք բանկը գնել է 12․000 ԱՄՆ դոլարով, մինչդեռ իրենց սարքի ինքնարժեքը կազմել է ընդամենը 2․000 ԱՄՆ դոլար։ Նրանք որոշել են սարքը վաճառել շուկայական արժեքից մատչելի։ Դրանից հետո տարբեր ընկերություններ, բանկեր սկսել են հետաքրքրվել և պատվիրել այս սարքերը։

Առաջին հաջող փորձից հետո ընկերությունը զարգացրել է արտադրությունը՝ ընդլայնելով սարքերի տեսականին։ Նրանք արտադրել են տարբեր տեսակի ինքնասպասարկման սարքեր, ինչպես նաև VR տերմինալներ՝ մարդկանց օգնելով նաև կյանքի կոչել իրենց գաղափարները։

«Մենք ծառայում ենք մեր տնտեսությանը, մեր երկրին, և ես այն կարծիքին եմ, որ մեզնից յուրաքանչյուրը տնտեսության «զինվոր է», որը ոչ պակաս կարևոր է մեր հզոր լինելու ճանապարհին»,- շեշտեց բանախոսը։

Ընկերության արտադրանքների և ընկերությունների ստեղծման պատմությունների մասին ավելին՝ տեսանյութում։