Апреля 17, 2026 | 14:55
Կրթական ծրագրեր
Միջազգային համագործակցություն
Մաթեմատիկական կրթությունը ԵՊՀ-ում՝ միջազգային չափանիշներով. 6 կրթական ծրագրեր ստացել են միջազգային հավատարմագրում
Երևանի պետական համալսարանի մաթեմատիկայի և մեխանիկայի ֆակուլտետի բակալավրիատի և մագիստրատուրայի վեց կրթական ծրագրեր ստացել են միջազգային հավատարմագրում գերմանական հեղինակավոր «ASIIN» գործակալության կողմից։ Այս գործընթացը տևել է շուրջ մեկ տարի և պահանջել ծավալուն աշխատանք:
Մաթեմատիկայի և մեխանիկայի ֆակուլտետի դեկան Արթուր Սահակյանն ընգծեց, որ հավատարմագրվել են «Մաթեմատիկա», «Կիրառական վիճակագրություն և տվյալների գիտություն» ու «Ակտուարական և ֆինանսական մաթեմատիկա» բակալավրի, ինչպես նաև «Մաթեմատիկա և կիրառություններ», «Կիրառական վիճակագրություն և տվյալների գիտություն» և «Ֆինանսական մաթեմատիկա» մագիստրոսական կրթական ծրագրերը:
Հավատարմագրման գործընթացը պահանջել է մանրակրկիտ նախապատրաստություն։
«Մոտ մեկ տարի ֆակուլտետի կրթական ծրագրերի ղեկավարները լծված էին այդ գործին, ինչի արդյունքում կազմվեց բավականին մեծ փաստաթուղթ»,- նշեց Արթուր Սահակյանը՝ ընդգծելով, որ գերմանական կողմը հաշվի է առել ամեն ինչ՝ ուսանողների ու դասախոսների քանակը, կրթական միջավայրը, ծրագրերի կառուցվածքը և այլն:
ԵՊՀ որակի ապահովման կենտրոնի տնօրեն Արմեն Բուդաղյանն ընդգծեց, որ հավատարմագրման գլխավոր նպատակը կրթական ծրագրի որակի շարունակական բարելավումն է։ Շուրջ մեկ տարի տևած գործընթացի շրջանակում կատարվել է ծրագրերի բովանդակային վերանայում՝ դրանք համապատասխանեցնելով եվրոպական որակավորումների պահանջներին։
Ըստ Ա․ Բուդաղյանի՝ հավատարմագրումն ուղղակիորեն բարձրացնում է շրջանավարտների մրցունակությունը։
«Ուսանողների դիպլոմի հավելվածում կլինի գերմանական «ASIIN» գործակալության դրոշմը, ինչը հավաստում է, որ կրթությունը համապատասխանում է եվրոպական չափանիշներին: Այս գործընթացով մենք հեշտացնում ենք ուսանողների համար թե՛ ուսումը շարունակելու, թե՛ աշխատանքի անցնելու հնարավորությունները Հայաստանում և արտերկրում»,- ասաց նա:
Ա․ Բուդաղյանի խոսքով՝ միջազգային հավատարմագրումը բուհի համար ունի ռազմավարական նշանակություն․ մի կողմից՝ այդ ծրագրերն առավել գրավիչ են դառնում թե՛ տեղի, թե՛ օտարերկրյա դիմորդների համար, իսկ մյուս կողմից՝ բուհը հնարավորություն ունի վերանայելու ուսման վարձերը։
«Պետությունը ոչ հավատարմագրված կրթական ծրագրերի համար սահմանել է վարձի առավելագույն շեմ, մինչդեռ հավատարմագրված ծրագրերի դեպքում համալսարանը կարող է սահմանել ցանկացած շեմ՝ ելնելով շուկայի պահանջարկից»,- մատնանշեց նա:
Սկզբնական շրջանում նկատված որոշ թերությունների պատճառով գերմանական ընկերությունը Մաթեմատիկայի և մեխանիկայի ֆակուլտետի նշված կրթական ծրագրերի հավատարմագրումը տվել էր մեկ տարով, սակայն դրանք շտկելուց հետո այն երկարաձգվել է մինչև 2030 թվականի սեպտեմբերը: Սա առավելագույն ժամկետն է առաջին անգամ հավատարմագրվող ծրագրերի համար:
Արմեն Բուդաղյանը հավելեց, որ միջազգային հավատարմագրման գործընթացը ԵՊՀ-ում շարունակական է։
«Ներկայում աշխատանքներ են տարվում Իրավագիտության, Տնտեսագիտության և կառավարման ֆակուլտետների 10 կրթական ծրագրերի հավատարմագրման ուղղությամբ։ Այս դեպքում համագործակցում ենք գերմանական մեկ այլ՝ «FIBAA» գործակալության հետ, որը մասնագիտացած է համապատասխան ոլորտներում, այդ թվում՝ բիզնեսի, տնտեսագիտության և իրավագիտության»,- շեշտեց Որակի ապահովման կենտրոնի տնօրենը:
Նշենք, որ ավելի վաղ միջազգային հավատարմագրում էին ստացել նաև ԵՊՀ ֆարմացիայի ինստիտուտի «Ֆարմացիա» բակալավրի և մագիստրոսական կրթական ծրագրերը, ինչպես նաև կենսաբանության ֆակուլտետի «Կենսաքիմիա և կենսատեխնոլոգիա» բակալավրի, «Ընդհանուր և բժշկական կենսաքիմիա» մագիստրոսական կրթական ծրագրերը:
