Տոպոլոգիական Կազիմիրի էֆեկտ Ռինդլերի տարածաժամանակում կոմպակտ չափումներով

Նախագիծը նվիրված է քվանտային դաշտերի վակուումային հատկությունների կախվածության ուսումնասիրմանը տարածաժամանակի երկրաչափությունից և տոպոլոգիայից։ Հետազոտվելու են սկալյար և ֆերմիոնային վակուումների լոկալ բնութագրերը կոմպակտ տարածական չափերով Ռինդլերի տարածաժամանակում։ Որպես կարևոր բնութագրեր կդիտարկվեն դաշտի քառակուսու և էներգիա-իմպուլսի թենզորի միջինները։ Դրանք մասնավորապես ներառում են վակուումային էներգիայի խտությունը և վակուումային լարվածությունները։ Վակուումային միջիններից կառանձնացվեն տոպոլոգիական ներդրումները և կհետազոտվի դրանց կախվածությունը արագացումից, կոմպակտ չափերի երկարությունից և դրանց ուղղությամբ դրվող քվազիպարբերականության պայմաններում փուլերից։ Օգտագործելով Ռինդլերի տարածաժամանակի կոնֆորմ կապը հաստատուն բացասական կորությամբ տարածության, Միլնի տիեզերքի և դե Սիտտերի տարածաժամանակի միջև, կքննարկվեն վակուումային միջինները այդ երկրաչափություններում զրոյական զանգվածով կոնֆորմ կապված դաշտերի համար։ Կդիտարկվեն նաև համապատասխան դրսևորումները սև խոռոչների հորիզոնին մերձակա տիրույթներում։