«Карьерный компас: найди свой путь». В ЕГУ стартовала новая программа, направленная на развитие карьеры студентов

Центр выпускников и карьеры ЕГУ запустил новую программу под названием «Карьерный компас: найди свой путь», призванную помочь студентам и недавним выпускникам сделать первые шаги в своей карьере с большей уверенностью и повысить свою конкурентоспособность на рынке труда. Мероприятие, открывшее программу, представляло собой панельную дискуссию под названием «Первые шаги в карьере: ожидания работодателей», целью которой было обсуждение текущих тенденций на рынке труда, отправных точек карьеры, использования ИИ при подготовке к собеседованиям и других практических вопросов.

ԵՊՀ շրջանավարտների և կարիերայի կենտրոնի փոխտնօրեն Տաթևիկ Հովհաննիսյանն ասաց, որ ծրագիրը շարունակական զարգացող նախաձեռնություն է՝ միտված ԵՊՀ ուսանողների, շրջանավարտների և մարդկային ռեսուրսների կառավարման մասնագետների միջև համագործակցության արդյունավետ հարթակ ձևավորելուն։ Այն բաղկացած է երկու հիմնական բաղադրիչից՝ խմբային և անհատական խորհրդատվություններից։

Խմբային ձևաչափի շրջանակում գործընկեր կազմակերպությունների մարդկային ռեսուրսների կառավարման մասնագետները հանդես կգան որպես փորձառու խորհրդատուներ՝ կիսվելով ոլորտի գործնական գիտելիքներով և ներկայացնելով այն հմտությունները, որոնք այսօր առավել պահանջված են աշխատաշուկայում։ Այս հանդիպումները հնարավորություն կտան ուսանողներին համադրելու համալսարանում ստացած տեսական գիտելիքները գործատուների իրական պահանջների հետ և ստանալու անմիջական պատասխաններ իրենց հետաքրքրող հարցերին։

Ծրագրի երկրորդ բաղադրիչը անհատական խորհրդատվություններն են, որոնք անցկացվելու են առավել կիրառական ձևաչափով և ուղղված են յուրաքանչյուր ուսանողի մասնագիտական կայացմանը և ինքնաներկայացման հմտությունների զարգացմանը։

Այս փուլում նախատեսվում է անցկացնել հարցազրույցներ, վերլուծել մասնակիցների ուժեղ և թույլ կողմերը, մշակել և խմբագրել ինքնակենսագրականներն ու մոտիվացիոն նամակները, աջակցել անձնական և թվային մասնագիտական իմիջի ձևավորմանը, ինչպես նաև ուղղորդել կարիերայի անհատական քարտեզի մշակմանը։

Անհատական խորհրդատվությունները կանցկացվեն ԵՊՀ «Մարդկային ռեսուրսների կառավարում» մագիստրոսական ծրագրի ուսանողների ներգրավմամբ՝ Շրջանավարտների և կարիերայի կենտրոնի թիմի մասնագիտական աջակցությամբ։

Ծրագրի մասնակից կազմակերպությունների համար ևս նախաձեռնությունը ստեղծում է համագործակցային կարևոր հարթակ։ «Կարիերայի առաջին քայլերը. գործատուների սպասելիքները» թեմայով պանելային քննարկման շրջանակում խոսելով հարցազրույցների պատրաստվելիս ԱԲ գործիքների կիրառման մասին՝ «HR Drone» և «M-One» ընկերությունների համահիմնադիր Նարեկ Հակոբյանը նշեց՝ արհեստական բանականության կիրառումը հարցազրույցի պատրաստվելու գործընթացում կարող է արդյունավետ լինել ոչ միայն դիմորդի, այլև ընդունող կազմակերպության համար։ Նրա խոսքով՝ ԱԲ գործիքների միջոցով ձևավորված պատասխաններն ինքնին տեսանելի են գործատուների համար, սակայն կարևորվում է դրանց ճիշտ կիրառությունը։

«Եթե դիմորդը կարողանում է ճիշտ հրահանգների և գործիքների կիրառման միջոցով ստանալ իրեն անհրաժեշտ պատասխանը, ապա դա լիովին ողջունելի է։ Կարևորն այն է, թե ինչպես է կիրառվում գործիքը»,- մատնանշեց նա։

Սոֆթ Կոնստրակտ Հոլդինգ ընկերության հավաքագրման խմբի մենեջեր Էմմա Մարգարյանը փաստեց՝ ԵՊՀ շրջանավարտների և կարիերայի կենտրոնի հետ արդյունավետ համագործակցության շնորհիվ ընկերության բազմաթիվ հաստիքներ համալրվել են ԵՊՀ ուսանողներով և շրջանավարտներով։

«Երբ ստանում եմ ԵՊՀ ուսանողի ինքնակենսագրականը, արդեն վստահություն եմ ունենում, որ տվյալ թեկնածուն ունի ամուր մասնագիտական հիմք թե՛ տեսական, թե՛ գործնական գիտելիքների առումով։ Համալսարանական կրթությունը սահմանափակված չէ նեղ մասնագիտական շրջանակով»,- ընդգծեց նա։

ԵՊՀ շրջանավարտները հաջողությամբ կարողանում են աշխատանք գտնել իրենց մասնագիտական ոլորտում․ այդ մասին են փաստում «Ինեկոբանկ» ՓԲԸ ՄՌԿ դեպարտամենտի տաղանդների ներգրավման և վերապատրաստման ծառայության ղեկավար Հեղինե Միքայելյանի և «Վիվա Արմենիա» ՓԲԸ ՄՌԿ վարչության ղեկավար Մարիանա Էդիլյանի ներկայացրած տվյալները, ըստ որոնց՝ նշյալ ընկերությունների աշխատակիցների զգալի մասը ԵՊՀ շրջանավարտներ են։

«Մեր ընկերությունում աշխատում է շուրջ 1000 աշխատակից, որոնցից ավելի քան 25 տոկոսը ԵՊՀ շրջանավարտներ կամ ներկայիս ուսանողներ են։ Եթե դիտարկենք վերջին երկու տարվա տվյալները, ապա ավելի քան 120 ուսանող աշխատանքի է անցել մեզ մոտ։ Հատկանշական է նաև այն, որ յուրաքանչյուր հաջորդ տարի մոտ 50 տոկոսով ավելանում է աշխատանքի ընդունվող ԵՊՀ շրջանավարտների թիվը, ինչը խոսում է համալսարանի պատրաստած մասնագետների պահանջված լինելու մասին»,- շեշտեց Հեղինե Միքայելյանը։

Մինչ աշխատանքի անցնելը ԵՊՀ ուսանողները հնարավորություն են ունենում փորձնակություն անցնելու գործընկեր կազմակերպություններում։ Փորձնակության տարբեր ծրագրեր է առաջարկում «Կոկա-Կոլա ՀԲՔ Արմենիա» ընկերությունը, որի հետ ԵՊՀ շրջանավարտների և կարիերայի կենտրոնը տևական ժամանակ է, ինչ համագործակցում է։

«ԵՊՀ-ի հետ ունենք երկարամյա համագործակցություն փորձնակության ծրագրերի շրջանակում։ Շատ ուսանողներ գալիս են մեզ մոտ որպես փորձնակ և հաջողությամբ շարունակում իրենց մասնագիտական ճանապարհը մեր կազմակերպությունում»,- նշեց «Կոկա-Կոլա ՀԲՔ Արմենիա» ընկերության ՄՌԿ բաժնի տնօրեն Նելլի Փուրթոյանը։

ԵՊՀ շրջանավարտ, HR մասնագետ Գոռ Գրիգորյանի համար այս նախաձեռնությունը գործնական կարևոր նշանակություն ունի։ Ըստ նրա՝ պանելային քննարկման ընթացքում ներկայացված խորհուրդներն ու ուղեցույցները կարող են օգտակար լինել երիտասարդների համար։

ԵՊՀ եվրոպական լեզուներ և հաղորդակցություն ֆակուլտետի «Միջմշակութային հաղորդակցություն» կրթական ծրագրի 4-րդ կուրսի ուսանող Արմենուհի Հովակիմյանի խոսքով՝ այս միջոցառմանը մասնակցելը չափազանց հետաքրքիր փորձառություն էր։ Ըստ նրա՝ մասնագետների խորհուրդները, հատկապես՝ ճիշտ ինքնակենսագրական կազմելու, հարցազրույցի ընթացքում ճիշտ դրսևորվելու և կարիերայի առաջին քայլերը ճիշտ կատարելու վերաբերյալ, շատ կարևոր են ուսանողների համար, քանի որ օգնում են ավելի հստակ պատկերացնելու մասնագիտական ուղին։

«Armenian Card» ՓԲԸ ՄՌԿ բաժնի պետ Ռիմա Զաքարյանի խոսքով այս ծրագիրն իսկապես շատ լավ նախաձեռնություն է թե՛ ուսանողների, թե՛ գործատուների համար․ «Այն նպաստում է երիտասարդների զարգացմանն ու մասնագիտական աճին, ինչպես նաև հնարավորություն է տալիս գործատուներին ավելի լավ ճանաչելու ապագա մասնագետներին և ներգրավելու նրանց իրենց թիմերում։ Համոզված եմ՝ ուսանողները նոր շունչ և նոր գաղափարներ կբերեն յուրաքանչյուր կազմակերպություն»։

ԵՊՀ «Մարդկային ռեսուրսների կառավարում» մագիստրոսական ծրագրի ղեկավար Աննա Մաքսուդյանը, կարևորելով նախաձեռնության շարունակական բնույթը, ասաց. «Սա մեկնարկային ծրագիր է, և լիահույս եմ, որ այն երկարաժամկետ ընթացք կունենա՝ ծառայելով համալսարանի ուսանողների և շրջանավարտների մասնագիտական կայացման գործընթացին»։

Ակնկալվում է, որ ծրագրի արդյունքում ուսանողներն ու շրջանավարտները կդառնան առավել վստահ իրենց մասնագիտական ոլորտում, ավելի հստակ կպատկերացնեն իրենց կարիերայի զարգացման ուղին, իսկ գործատուները հնարավորություն կունենան բացահայտելու իրենց պահանջներին համապատասխան երիտասարդ մասնագետների։