Կենսաբանը, պատմաբանը, սոցիոլոգն ու ծրագրավորողը՝ մեկ թիմում. Ծաղկաձորում անցկացվել է «ԲանՈՒԳործ» ամառային դպրոց-աշխատարանը

Հուլիսի 15-17-ն իրականացված ծրագիրը միավորել էր 30 ուսանողի, կազմակերպիչների և ոլորտային փորձագետների՝ քննարկելու գաղափարներ, համադրելու տարբեր մասնագիտական մոտեցումներ և դրանք վերածելու կիրառելի նախագծերի։

Ընդհանուր գաղափարները՝ տարբեր «աշխարհների» հատման կետում

Ամառային դպրոցի հիմքում չորս «աշխարհներ» էին՝ բնություն, տեխնոլոգիա, հասարակություն և մշակույթ։ Մասնակիցները դիտարկեցին ոչ միայն յուրաքանչյուր ուղղության առանձին խնդիրներն ու հնարավորությունները, այլև դրանց հատման կետերը՝ հասկանալու, թե ինչպես կարող են տարբեր գիտակարգեր լրացնել միմյանց։

Բնության ուղղության շրջանակում ուշադրության կենտրոնում էին կենսաբազմազանությունն ու Հայաստանում կայանալիք «COP-17» համաժողովը, տեխնոլոգիայի ուղղությամբ՝ թվային գործիքներն ու կրթական նորարարությունները, հասարակության ուղղությամբ՝ համայնքային խնդիրներն ու հանրային ազդեցությունը, իսկ մշակույթի ուղղությամբ՝ ինքնությունն ու մշակութային ժառանգությունը։

Ակնկալիքների ձևակերպումից մինչև մտագրոհ 

Ծրագրի առաջին օրը սկսվեց մասնակիցների ծանոթությամբ և ակնկալիքների ձևակերպմամբ։ ԵՊՀ միջազգային կապերի, զարգացման և նորարարությունների գծով պրոռեկտոր Միքայել Հովհաննիսյանը ներկայացրեց «ԲանՈՒԳործ»-ը, աշխատարանի և ծրագրի նպատակներն ու աշխատանքային տրամաբանությունը, իսկ ԵՊՀ շարունակական կրթության կենտրոնի տնօրեն Լուսինե Խառատյանը վարեց մասնակիցների ծանոթացման և ակնկալիքների գրանցման հանդիպումը։

Օրվա առանցքային հատվածը «Աշխարհների մտագրոհն» էր, որի ընթացքում ուսանողները SWOT վերլուծության միջոցով առանձին խմբերով ընդգծեցին յուրաքանչյուր «աշխարհի» խնդիրները, ռեսուրսները, առաջնահերթություններն ու մարտահրավերները։ Այնուհետև յուրաքանչյուր խումբ ներկայացրեց իր աշխատանքը՝ գտնելով այդ «աշխարհներում» նմանվող և տարբերվող հնարավորություններն ու ուժեղ կողմերը, ինչպես նաև խնդիրներն ու մարտահրավերները։

Խնդրից հասնելով ծրագրային առաջարկի

Երկրորդ օրը «աշխարհները» խաչվեցին։ Մտագրոհի միջոցով առանձնացված և ընտրված գաղափարների շուրջ ձևավորվեցին 6 միջգիտակարգային թիմեր, որտեղ «բնությունը» հանդիպեց «հասարակությանը», «մշակույթը»՝ «տեխնոլոգիային», իսկ տեխնոլոգիական լուծումները՝ համայնքային կարիքներին։ Մասնակիցները սովորեցին խնդրից հասնել ծրագրային առաջարկի՝ ձևակերպելով նպատակը, գործողությունները, ակնկալվող արդյունքներն ու անհրաժեշտ ռեսուրսները։ Այդ նպատակով մասնակիցներն անցան տրամաբանական շրջանակի («Logical Framework») մշակման վերապատրաստում՝ քայլ առ քայլ մշակելով իրենց ծրագրերը։

Մշակած նախագծերը՝ փորձագիտական դիտանկյունից

Երրորդ օրը թիմերն ամփոփեցին իրենց նախագծերը, պատրաստեցին դրանք նախնական շնորհանդեսի («pitching») և ներկայացրին փորձագետներին՝ ստանալով դիտարկումներ ու մասնագիտական խորհրդատվություն։ Նրանց հետ աշխատեցին ԵՊՀ ներկայացուցիչներ Գոռ Ալեքսանյանը (ԵՊՀ աշխարհագրության և երկրաբանության ֆակուլտետի գրասենյակի ղեկավար-դեկանի տեղակալ, Սերվիսի ամբիոնի դոցենտ), Ռուզաննա Ծատուրյանը (Հնագիտության և ազգագրության ամբիոնի դասախոս), Ռուբեն Գևորգյանը (ԵՊՀ բիզնես ինկուբատորի տնօրեն, Տնտեսագիտության մեջ մաթեմատիկական մոդելավորման ամբիոնի պրոֆեսոր), Տիգրան Հայրապետյան (ԵՊՀ կենսաբանության ֆակուլտետի դասախոս) և «Դի-Վի-Վի Ինթերնեյշնալ» հայաստանյան գրասենյակի տնօրեն Էսթեր Հակոբյանը։

Գաղափարից՝ կիրառելի նախագծեր. «ԲանՈՒԳործ-2026»-ը՝ նոր հնարավորությունների հարթակ

«ԲանՈՒԳործ» ամառային դպրոց-աշխատարանի նպատակը միայն նոր գաղափարներ ձևավորելը չէ։ Այն նաև ուսանողների համար անծանոթ մասնագիտական «լեզուների» ու մոտեցումների հետ աշխատելու, թիմում որոշումներ ընդունելու և գաղափարը քայլ առ քայլ իրագործելի նախագծի վերածելու հնարավորություն է։

Ամառային դպրոց-աշխատարանի ավարտին թիմերն արդեն ունեն մշակված նախագծային առաջարկներ, որոնք հետագայում կատարելագործելու են մենթորների ու կազմակերպիչների աջակցությամբ։ Այս ծրագրերը հետագայում ներկայացնելու են «ԲանՈՒԳործ-2026» էքսպոյի ժամանակ՝ գործընկերներից ֆինանսական աջակցություն ստանալու և նախագծերն իրականացնելու նպատակով։