Հայ-չինական կրթական համագործակցության նոր հեռանկարներ. ԵՊՀ-ում էր Հայաստանում Չինաստանի դեսպան Լի Սինվեյը

ԵՊՀ ռեկտորն ընդգծեց, որ Երևանի պետական համալսարանի միջազգայնացման քաղաքականության կարևոր առաջնահերթություններից է Չինաստանի հետ կրթագիտական, մշակութային համագործակցությունների ընդլայնումն ու ամրապնդումը: Այս համատեքստում Չինաստանի Ժողովրդական Հանրապետության հետ ծավալվում են բազմակողմ հարաբերություններ՝ գիտագործնական հանդիպումներ, միջազգային գիտաժողովներ, սեմինարներ, փոխայցեր և այլն: Գործընկեր համալսարանների թվում են Սոցիալական գիտությունների չինական ակադեմիան, Շանհայի համալսարանը, Պեկինի տեխնիկական համալսարանը, Կոնֆուցիոսի ինստիտուտը և ոչ միայն: Ռեկտորի խոսքով՝ ԵՊՀ չինարենի և չինական մշակույթի կենտրոնը Հայաստանում չինարենի տարածման լավագույն հենակետերից մեկն է, որտեղ պարբերաբար կազմակերպվում են չինարենի ուսուցման դասընթացներ և այլ միջոցառումներ՝ նվիրված Չինաստանի պատմությանը, մշակույթին: Բացի դրանից՝ ԵՊՀ միջազգային հարաբերությունների ֆակուլտետը Սոցիալական գիտությունների չինական ակադեմիայի հետ համագործակցության շրջանակում պարբերաբար նախաձեռնում է քաղաքագիտական, վերլուծական տարբեր գիտաժողովներ: Ընթացիկ տարվա սեպտեմբերին նույն ակադեմիայի հետ նախատեսվում է կազմակերպել հերթական միջազգային հանդիպում-քննարկումը:

«Վերջին տարիներին պետական ծրագրով հատկացված քառասուն և ավելի տեղերի շնորհիվ մեր բազմաթիվ ուսանողներ Չինաստանում ուսանելու հնարավորություն են ունեցել»,- ընդգծեց Հ. Հովհաննիսյանը:  

Այս առումով ոգևորիչ է Հայաստանում տարեցտարի աճող հետաքրքրությունը Չինաստանի նկատմամբ, որը հնարավոր է նոր մակարդակի հասցնել ԵՊՀ-ի հետ կրթագիտական խորքային և համակարգային համագործակցության միջոցով:

Հ. Հովհաննիսյանը մատնանշեց, որ վերջին տարիներին պետական խոշոր ներդրումների շնորհիվ համալսարանում ստեղծվել են ժամանակակից նորարարական տեխնոլոգիաներ ու լաբորատորիաներ: Հայ-չինական գործակցության զարգացման նպատակով ԵՊՀ զգալի ներուժը կարելի է օգտագործել ոչ միայն հումանիտար, այլև ճշգրիտ գիտությունների բնագավառներում՝ ֆիզիկա, ֆարմացիա, կենսաբանություն:

ԵՊՀ միջազգային կապերի, զարգացման և նորարարությունների գծով պրոռեկտոր Միքայել Հովհաննիսյանը հավելեց, որ ԵՊՀ-ն՝ իբրև ՀՀ դասական և առաջատար կրթագիտական հաստատություն, բաց է բոլոր ուղղություններով համագործակցությունների համար:

«Համագործակցության հնարավորություն կա նաև ռուսաց լեզվի ուսուցման տեսակետից, քանի որ ԵՊՀ-ն մեծ ավանդույթ և հնարավորություններ ունի այդ առումով»,- նշեց Մ. Հովհաննիսյանը:

Արժանահիշատակ է, որ ԵՊՀ-ում տևական ժամանակ գործում է բացառիկ մի ծրագիր, որի շրջանակում ամեն տարի Չինաստանից ժամանած 2 կուրսանտներ ռուսաց լեզվի մագիստրոսական մեկամյա ծրագրով կրթություն ստանալու հնարավորություն են ստանում:

«Վերջին տարիներին չինաստանյան գործընկերներից առաջարկ-նամակներ ենք ստանում չինացի ուսանողների համար 3+1 կամ 4+1 (3 կամ 4 տարի՝ ՀՀ-ում, մեկ տարի՝ Չինաստանում) տարբերակով կրթական ուսուցում կազմակերպելու համար: Այս առումով ևս ԵՊՀ-ն բաց է համագործակցությունների առջև»,- հավելեց ԵՊՀ միջազգային համագործակցության վարչության պետ Ալեքսանդր Մարգարովը:

Չինաստանի Ժողովրդական Հանրապետության դեսպան Լի Սինվեյը նշեց, որ առկա են ԵՊՀ-ի հետ համագործակցության հարուստ հիմքեր:

Մերձավորարևելյան վերջին իրադարձություններով պայմանավորված՝ Չինաստանում հետզհետե բարձրանում է տարածաշրջանի նկատմամբ հետաքրքրությունն ինչպես կրթության, այնպես էլ մշակութային և զբոսաշրջային առումներով: Հայաստանը՝ որպես հնագույն քաղաքակրթություն ունեցող երկիր, գործակցություններ զարգացնելու մեծ հնարավորություններ ունի: Դեսպանի խոսքով՝ հայաստանյան կրթական համակարգի նկատմամբ հետաքրքրություն կարող է առաջացնել ակադեմիական քաղաքի ստեղծումը ևս, որն ինքնին նորություն է Հայաստանի համար:

Կրթագիտական կանոնավոր համագործակցությունների համատեքստում դեսպան Լի Սինվեյը կարևորեց Սինդիանի և Պանտոնի համալսարանների հետ համագործակցության հնարավորությունը: Պայմանավորվածություններ ձեռք բերվեցին վերոնշյալ համալսարանների և ԵՊՀ-ի միջև արդյունավետ փոխգործակցության զարգացումը խթանելու ուղղությամբ:

Չինաստանի Ժողովրդական Հանրապետության արտակարգ և լիազոր դեսպան Լի Սինվեյը ԵՊՀ ռեկտորի ուղեկցությամբ այցելեց նաև ԵՊՀ գիտական լաբորատորիաներ, չինարենի և չինական մշակույթի կենտրոն՝ ծանոթանալով ԵՊՀ կրթական, տեխնոլոգիական հնարավորություններին: