Կոնֆլիկտների խաղաղ կարգավորման հմտություններ՝ ԵՊՀ նոր կրթական ծրագրի շրջանակում

ԵՊՀ շարունակական կրթության կենտրոնի մշակած ծրագիրը կառուցված էր փոխկապակցված երեք հիմնական դասընթացների շուրջ, որոնք հնարավորություն են տվել մասնակիցներին խորությամբ ուսումնասիրելու կոնֆլիկտների հետազոտության մեթոդները, դրանց վերլուծության և կարգավորման մոտեցումները, ինչպես նաև գործնական հաշտարարության մեխանիզմները։ Այս համադրության շնորհիվ մասնակիցները ձեռք են բերել անհրաժեշտ գործիքակազմ՝ մասնագիտական և հասարակական տարբեր միջավայրերում առաջացող կոնֆլիկտային իրավիճակներում կողմնորոշվելու, դրանք վերլուծելու և արդյունավետ կարգավորելու համար։

ԵՊՀ միջազգային կապերի, զարգացման և նորարարությունների գծով պրոռեկտոր Միքայել Հովհաննիսյանի գնահատմամբ՝ ծրագիրը կարևոր է համալսարանի կրթական միջավայրի զարգացման տեսանկյունից։ 

«Համալսարանում քննարկվում է ծրագրի հետագա զարգացումը մագիստրոսական բաղադրիչով, սակայն կարևոր է նաև պահպանել հավաստագիր տրամադրող ծրագրի ձևաչափը, ինչը հնարավորություն է տալիս մասնակցելու ծրագրին նաև այն մասնագետներին, որոնք տարբեր պատճառներով չեն կարող ընդգրկվել երկարաժամկետ կրթական ծրագրերում»,- նշեց նա։

Միքայել Հովհաննիսյանն ընդգծեց նաև ծրագրի նշանակությունը ուսանող-դասախոս համագործակցության նոր մշակույթի ձևավորման և կրթական միջավայրի բազմազանեցման տեսանկյունից՝ այն դիտարկելով որպես օրինակելի նախաձեռնություն համալսարանական կրթական գործընթացների զարգացման համար։

ԵՊՀ շարունակական կրթության կենտրոնի տնօրեն Լուսինե Խառատյանի խոսքով՝ ծրագրի ստեղծման գաղափարը ձևավորվել է հասարակության իրական կարիքների գնահատման հիման վրա։ 

«Պատերազմից հետո հատկապես ակնհայտ դարձավ, որ գտնվելով կոնֆլիկտային տարածաշրջանում՝ մեր հասարակությունն ունի խորքային սոցիալական և հոգեբանական խնդիրներ, որոնք հաճախ կապված են կոնֆլիկտների հետ, սակայն դրանց կարգավորման համար անհրաժեշտ հմտությունները բավարար չափով ձևավորված չեն։ Այս պայմաններում կրթության միջոցով ոչ բռնի հաղորդակցության, հաշտարարության և կոնֆլիկտների կարգավորմանն առնչվող տեսական և գործնական գիտելիքների և կարողությունների զարգացումը դառնում է հասարակական կարևոր պահանջ, ինչն էլ ծրագիրը մշակելու հիմք է դարձել»,- մատնանշեց Լուսինե Խառատյանը:

Ծրագրի մեկնարկին նախ հայտարարվել էր բաց մրցույթ՝ դասախոսների ընտրության համար։ Նրանց մասնակցությամբ մշակվել է ամբողջական կրթական բովանդակությունը, իսկ դրանից հետո կազմակերպվել է բաց ընդունելություն ծրագրի մասնակիցների համար։ Ստացված շուրջ 60 հայտերից ընտրվել են տասնյոթ մասնակիցներ՝ մասնագիտական և տարիքային տարբեր խմբերից, որոնց թվում՝ ինչպես արդեն աշխատանքային փորձ ունեցող մասնագետներ, այնպես էլ ուսանողներ։ Դասընթացներն անցկացվել են համակցված՝ անցանց և առցանց ձևաչափերով, իսկ ձևավորված ուսումնական խումբը առանձնացել է մասնագիտական բարձր հետաքրքրվածությամբ և ակտիվ ներգրավվածությամբ։

Ծրագիրը կարող է օգտակար լինել այն մասնագետների համար, որոնք հետաքրքրված են հաշտարարության, կոնֆլիկտների կարգավորման, խաղաղաշինության, հասարակագիտական ուսումնասիրությունների, դիվանագիտության, միջազգային կազմակերպությունների և քաղաքացիական հասարակության ոլորտներում գործունեությամբ։ Այն նպաստում է ոչ միայն մասնագիտական կարողությունների զարգացմանը, այլև համայնքներում համագործակցության և փոխըմբռնման մշակույթի ձևավորմանը՝ կոնֆլիկտները վերափոխելով զարգացման հնարավորությունների։

Ծրագրի մասնակից Նանոր Հովհաննիսյանի գնահատմամբ՝ այն կարևոր հնարավորություն է դարձել կոնֆլիկտաբանության և խաղաղաշինության ոլորտում համակարգված գիտելիք ձեռք բերելու, ինչպես նաև հետագա գիտական հետաքրքրությունները զարգացնելու հիմք ստեղծելու առումով։ Նրա խոսքով՝ ծրագիրը հնարավորություն է տվել ձևավորելու գիտական և գործնական այն անհրաժեշտ հենքը, որը հնարավորություն կտա հետագայում շարունակելու հետազոտական աշխատանքը տվյալ ուղղությամբ։

Մասնակից Նվեր Սարգսյանը, որն ունի մարդու իրավունքների ոլորտում միջազգային երկարամյա փորձ, ընդգծեց, որ ծրագիրը կարևոր աջակցություն է ինչպես մասնագիտական գործունեության, այնպես էլ անձնական հաղորդակցական հմտությունների զարգացման տեսանկյունից։ Նրա համոզմամբ՝ հաշտարարության գործիքակազմի կիրառումը հատկապես կարևոր է կոնֆլիկտներից տուժած մարդկանց աջակցելու և հասարակության շրջանում խաղաղ հաղորդակցության մշակույթ ձևավորելու համար, իսկ նման ծրագրերի զարգացումը կարող է ունենալ հասարակական մեծ նշանակություն նաև կրթական ավելի վաղ փուլերում դրանց ներառման տեսանկյունից։

Ծրագրի մանրամասներին հնարավոր է ծանոթանալ այստեղ։