Ընթացիկ ուստարվա հունիսի 2-ին տեղի ունեցավ ԵՊՀ գերմանական բանասիրության ամբիոնի վարիչ, դոցենտ Գ. Սավոյանի և դասախոս, Գյոթեի անվան ինստիտուտի վերապատրաստող և «Էրնսթ Քլեթ» («Ernst Klett») հրատարակչության մեթոդական խորհրդատու Մ. Նավասարդյանի այցը Արարատի մարզի Մրգավետի միջնակարգ դպրոց։
Այցը կազմակերպվել էր Երևանի պետական համալսարանի և Մրգավետի միջնակարգ դպրոցի տնօրեն Արևիկ Թարվերդյանի օժանդակությամբ։ Առանձնահատուկ նշանակության հանդիպումը մեծապես նպաստեց մարզային կրթական հաստատությունների հետ համագործակցության ամրապնդմանը։ Այցելությունը հետապնդում էր մի շարք նպատակներ՝ դպրոց-մայր բուհ կապերի սերտացում, գերմաներենի ուսուցիչների առջև ծառացած արդի մարտահրավերների քննարկում, ինչպես նաև գերմանական բանասիրության ամբիոնի աշխատարանի անցկացում հանրակրթական դպրոցներին՝ հարմարեցված «Էրնսթ Քլեթ» հրատարակչության դասագրքերով:
Այցի ընթացքում ներկայացվեցին հրատարակչության ուսումնական այլ նյութեր ևս, որոնք կարող են էական ներդրում ունենալ գերմաներենի իմացության զարգացման և խորացման գործում։ Հատուկ ուշադրություն դարձվեց ժամանակակից թվային ռեսուրսներին, որոնք հասանելի են «Էրնսթ Քլեթ» հրատարակչության դասագրքերի համատեղ կիրառման, ինչպես նաև դրանց՝ գերմաներենի դասավանդման գործընթացում գործնական օգտագործման դեպքում։
Մարզի տարբեր դպրոցներից ժամանած գերմաներենի ուսուցչուհիների հետ աշխույժ և բովանդակալից քննարկումները կարևոր քայլ դարձան դպրոցի և համալսարանի միջև համագործակցության ամրապնդման ճանապարհին։ Հանդիպումը ուսուցիչների համար միաժամանակ մասնագիտական փորձի փոխանակման և փոխադարձ ոգեշնչման արժեքավոր հարթակ էր։ Նվիրված և նախաձեռնող ուսուցիչները, որոնք մեծ պատասխանատվությամբ, նվիրվածությամբ և մասնագիտական բարձր պատրաստվածությամբ իրականացնում են իրենց առաքելությունը, կարևորագույն նախապայման են Հայաստանում գերմաներենի (և ոչ միայն) հաջող զարգացման և որակյալ կրթության համար։ Արարատի մարզի Մրգավետի միջնակարգ դպրոցի ուսուցիչների աշխատանքը նշանակալի ներդրում է Հայաստանի կրթական համակարգի զարգացման և մասնավորապես գերմաներենի տարածման գործում։
Գերմանական բանասիրության ամբիոնը մեծապես կարևորում է Հայաստանի մարզերի դպրոցների հետ համագործակցությունը։ Նման հանդիպումները ոչ միայն նպաստում են մասնագիտական երկխոսության զարգացմանը, այլև ստեղծում են նոր հնարավորություններ համատեղ ծրագրերի և նախաձեռնությունների իրականացման համար։ Մենք ուրախությամբ ենք սպասում Արարատի մարզի դպրոցների հետ համագործակցության շարունակությանը և գերմաներենի ուսուցման զարգացմանն ուղղված նոր նախաձեռնություններին։
Մրգավետում կայացած հանդիպումը ևս մեկ անգամ ցույց տվեց, թե որքան կարևոր է դպրոցի և համալսարանի միջև անմիջական երկխոսությունը։ Միայն համատեղ ջանքերով հնարավոր կլինի շարունակաբար բարձրացնել գերմաներենի ուսուցման որակը և երիտասարդ սերնդի մեջ խթանել հետաքրքրությունը գերմաներենի և գերմանական մշակույթի նկատմամբ։
