May 02, 2024 | 14:01
Partners
Career
Education
Employment opportunity for best students participating in courses of "BostonGene" company at YSU
Hayk Hovhannisyan, Candidate of Medical Sciences, Director of the laboratory at the American biotechnology company "BostonGene", a member of the American College of Medical Genetics and Genomics, discoursed at YSU. The purpose of the meeting was to introduce students to professional opportunities and work areas.
Բանախոսության ժամանակ Հայկ Հովհաննիսյանը խոսեց մասնագիտական իր անցած ուղուց՝ ուսանողներին տեղեկացնելով, թե ԵՊՀ-ում ուսումն ավարտելուց հետո ինչ հեռանկարներ են նախանշվում: Նա նաև մանրամասներ ներկայացրեց որոշ գեների, հիվանդությունների, բուժման մեթոդների, գեների մուտացիաները հետազոտելու սարքերի մասին:
Խոսելով ԵՊՀ-ում դասախոսելու և ընտրված թեմայի մասին՝ Հայկ Հովհաննիսյանը նշեց. «Շատ ուրախ եմ, որ առիթ ունեմ բանախոսելու այստեղ, միշտ հպարտությամբ եմ նշում, որ ԵՊՀ շրջանավարտ եմ, և հաջողություններիս հիմքում համալսարանական դասախոսներիս փոխանցած համակողմանի գիտելիքներն են»:
Դասընթացին մասնակցեցին Կենսաբանության ֆակուլտետի և Ֆարմացիայի ինստիտուտի ուսանողները, թեմայով հետաքրքրված այլ անձինք:
ԵՊՀ կենսաբանության ֆակուլտետի «Կենսաֆիզիկա, կենսաինֆորմատիկա» կրթական ծրագրի մագիստրատուրայի 1-ին կուրսի ուսանող Սոնյա Աբրահամյանը ընդգծեց, որ դասախոսությունը հագեցած էր, հետաքրքիր ու մոտիվացնող:
«Շատ հետաքրքիր էր ծանոթանալ հայ գիտնականի կյանքին և անցած ուղուն: Ես ևս մեկ անգամ համոզվեցի, որ հաջողության հասնելու համար պետք է պարզապես գործել: Շատ կցանկանայի, որ Հայկ Հովհաննիսյանի դասախոսությունները լսելու հնարավորություն կրկին ունենամ, և այս գործակցությունը լինի շարունակական»,- ասաց Սոնյան:
Ուսանողների և Հայկ Հովհաննիսյանի հանդիպումը կազմակերպվեց ԵՊՀ շրջանավարտների և կարիերայի կենտրոնի նախաձեռնությամբ:
Համալսարանի և «BostonGene» ամերիկյան կենսատեխնոլոգիական ընկերության գործակցությունը գրեթե 2 տարվա պատմություն ունի, որի շրջանակում կազմակերպվել են համատեղ տարբեր ծրագրեր:
«Գործակցությունը սկսվել է կենսաբանությամբ և ինֆորմատիկայով հետաքրքրված ուսանողների փոքր խմբերի հետ հանդիպումներով՝ կարճաժամկետ դասընթացների շարքի միջոցով: Դրան նախորդել է ընկերության մասին ուսանողների շրջանում իրազեկվածության մակարդակի բարձրացումը՝ ներկայացնելով աշխատանքի անցնելու և մասնագիտական աճի հնարավորություններ»,- պատմեց ԵՊՀ շրջանավարտների և կարիերայի կենտրոնի փոխնտօրեն Կարինե Նազարյանը:
Այնուհետև սկսվել է երկու հաստատությունների առավել երկարաժամկետ գործակցություն:
«Հաշվի առնելով կողմերի հետաքրքրվածությունն ու միասին աշխատելու պատրաստակամությունը՝ քննարկեցինք առավել նեղ առարկայական դասընթացների շարք սկսել Կենսաբանության ֆակուլտետի և Ֆարմացիայի ինստիտուտի ուսանողների համար: «BostonGene»-ի մեր գործընկերների առաջարկով սկսվեց տասներկուշաբաթյա դասընթացների շարք, որի արդյունքը կլինի դասընթացին մասնակից 10 լավագույն ուսանողներին աշխատանքի առաջարկը»,- ներկայացրեց Կարինե Նազարյանը:
«BostonGene» ամերիկյան կենսատեխնոլոգիական ընկերության լաբորատորիայի տնօրեն Հայկ Հովհաննիսյանը պատմեց, որ ԵՊՀ-ի հետ գործակցությունը կարևոր է երկու կողմերի համար. «Մեր ընկերությունը ընտրել է ԵՊՀ-ն, քանի որ հետաքրքրված է որակյալ կադրեր գտնելու հարցով, իսկ ԵՊՀ-ն այսպիսով հնարավորություն է ստանում իր ուսանողներին առաջարկելու աշխատանք, ինչպես նաև թարմ մոտեցմամբ նորարար մեթոդներ ու գիտելիքներ»:
«Մոլեկուլային և ճշգրիտ ուռուցքաբանություն» տասներկուշաբաթյա դասընթացը մեկնարկել է մարտի 11-ին: Դասախոսությունները վարում են «BostonGene» ընկերության «Ճշգրիտ ուռուցքաբանության» բաժանմունքի առաջատար մասնագետները՝ շաբաթը մեկ պարբերականությամբ, երկուշաբթի օրերին:
Դասընթացի շրջանակում քննարկվում են՝
մոլեկուլային և բջջային կենսաբանության այն թեմաները, որոնք այսօր առավել լայնորեն կիրառվում են բժշկության մեջ,
ժամանակակից անհատականացված ուռուցքաբանության ոլորտում գրանցված հաջողությունները,
ոլորտի հեռանկարային և զարգացող ուղղությունները,
անհատականացված ուռուցքաբանական տվյալների բազաները, տեղեկատվական աղբյուրները, ստանդարտները և այլն։
Հավելենք, որ «BostonGene»-ը ամերիկյան կենսատեխնոլոգիական ընկերություն է, որը մասնագիտացած է ուռուցքների և ուռուցքային միկրոմիջավայրի համապարփակ փորձարկումներում՝ օգտագործելով Whole Exome Sequencing (WES) & RNA sequencing (RNA seq) տեխնոլոգիաները: Ընկերության հիմնական նպատակն է ուռուցքաբաններին տրամադրել գենետիկ և մոլեկուլային համապարփակ բնութագրեր՝ հնարավորություն ընձեռելով մշակելու յուրաքանչյուր հիվանդի եզակի կենսաբանական պրոֆիլին համապատասխան բուժման ռազմավարություն:
