«ՏԵՍԱԼՍՈՂԱԿԱՆ ՄԵԴԻԱՅԻ ՄԱՍԻՆ» ՕՐԵՆՔԻ ՆԱԽԱԳԾԻ ԱՌՑԱՆՑ ՔՆՆԱՐԿՈՒՄ ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏՈՒՄ

Քննարկմանը մասնակցում էին ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանը, ԱԺ պատգամավոր, օրենքի նախագծի համահեղինակ Վահագն Թևոսյանը, Նոր մեդիայի և հաղորդակցության ամբիոնի վարիչ Դավիթ Պետրոսյանը, Տպագիր և հեռարձակվող լրատվամիջոցների ամբիոնի վարիչ Մուշեղ Հովսեփյանը, ֆակուլտետի դասախոսներ Աստղիկ Ավետիսյանը, Վարդուհի Պետրոսյանը, Դավիթ Ալավերդյանը, Անահիտ Մենեմշյանը, Վանիկ Հակոբյանը, Քրիստինե Ալագուլյանը, Հարություն Ծատուրյանը և ֆակուլտետի այլ ներկայացուցիչներ:

ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանը շնորհակալություն հայտնեց քննարկման մասնակիցներին և նշեց, որ մասնակիցների բոլոր դիտարկումներն ու առաջարկությունները փոխանցվելու են օրենքի նախագծի հեղինակներին:

Հեռավար հանդիպման մասնակից դասախոսները հակիրճ ներկայացրին իրենց փորձագիտական կարծիքն օրենքի թերությունների և բացթողումների վերաբերյալ:

ԵՊՀ ժուռնալիստիկայի ֆակուլտետի դասախոս Վարդուհի Պետրոսյանը, ողջունելով օրենքի հեռավար քննարկման նախաձեռնությունը և հին օրենքը նորով փոխարինելու անհրաժեշտությունը, հանդես եկավ մի քանի նկատառումներով, որոնք վերաբերում էին օրենքի բովանդակային և տեխնիկական կողմերին:

Հանդես գալով առաջարկություններով՝ վերջինս նշեց, որ օրենքում տեղ գտած մի շարք իրավական ոչ հստակ ձևակերպումներ կարիք ունեն վերանայման:

Ֆակուլտետի դասախոս Վանիկ Հակոբյանն ընդհանուր դրույթներով անդրադարձավ օրենքում տեղ գտած մի շարք ձևակերպումների, որոնք, ըստ պարոն Հակոբյանի, ունեն իրավական որոշակիացման խնդիր:

Անդրադառնալով օրենքի նախագծում տեղ գտած ‹‹Ստուգված փաստի կամ իրադարձության մասին անկողմնակալ տեղեկացումը›› կետին՝ Վանիկ Հակոբյանը հանդես եկավ դիտարկմամբ՝ ասելով, որ նմանաբնույթ ձևակերպումը բավականին բարդ և կամայական մեկնաբանությունների առիթ տվող ձևակերպում է, քանի որ անկողմնակալության չափանիշն իրավական և էթիկական տիրույթում անչափելի է:

Պատասխանելով դիտարկմանը՝ Վահագն Թևոսյանը խոստացավ համապատասխան փոփոխություններն իրականացնել օրենքի նախագծում:

Վահագն Թևոսյանը շեշտեց նաև, որ օրենքի նախագծում ‹‹մահկաներ›› փնտրելը ճիշտ մոտեցում չէ, քանի որ դատարանի միջոցով միշտ էլ կարելի է լուծել առաջացած խնդիրները:

Ըստ նրա՝ շատ կարևոր է նախագծում տեղ գտած փոփոխությունների կոնցեպտը պատկերացնել, իսկ իրավական ձևակերպումները միշտ էլ կարելի է բարեփոխել:

Օրենքի նախագծի քննադատությամբ հանդես եկավ Ժուռնալիստիկայի ֆակուլտետի դասախոս Դավիթ Ալավերդյանը:

Նրա խոսքով, տպավորություն է ստեղծվում, թե այս օրենքով հեղինակները ցանկանում են պայքարել կեղծ նորությունների դեմ, ինչը, ամենայն հավանականությամբ, չի հաջողվի․ ‹‹Կեղծ նորությունների դեմ պայքարում է ամբողջ աշխարհը, բայց առայժմ որևէ երկիր այդ հարցում հաջողության չի հասել, այս նախագիծն էլ բացառություն չի լինելու››:

Վահագն Թևոսյանն էլ նշեց, որ նոր օրենքի նախագիծն ամենևին էլ նպատակ չունի պայքարել կեղծ նորությունների դեմ, այն ընդամենը ստեղծվել է դաշտը կարգավորելու համար․ ‹‹Այս օրենքի ստեղծման հիմնական նպատակն իշխանությանը և ընդդիմությանը մեդիահարթակում հավասար ներկայանալու իրավունք տալն է, ինչպես նաև փաստի ու պարզապես կարծիքի հստակ տարբերակումները, որոնց չտարբերակումը կարող է խնդիր դառնալ արդեն իրավական դաշտում››:

Օրենքում տեղ գտած ձևակերպումների և եզրույթների խրթինությանն անդրադարձավ նաև Ժուռնալիստիկայի ֆակուլտետի դասախոս Աստղիկ Ավետիսյանը: Նրա դիտարկմամբ, կարիք կա օրենքում տեղ գտած մի քանի եզրույթներ փոխարինել համարժեք բառերով, ինչպես նաև ամբողջականացնել որոշ ձևակերպումներ:

Հանդիպման վերջում Վահագն Թևոսյանը շնորհակալություն հայտնեց նախաձեռնության մասնակիցներին ու խոստացավ անպայման անդրադառնալ հնչեցված դիտողություններին և առաջարկություններն ուղարկել ԱԺ:

Հարկ է նշել, որ ‹‹Տեսալսողական մեդիայի մասին›› նոր օրենքի նախագիծը սահմանում է տեսալսողական մեդիածառայությունների, տեսալսողական տեղեկատվություն տարածողների կարգավիճակը, կանոնակարգում է լիցենզավորման, թույլտվության տրամադրման, ծանուցումների ստացման կարգը, իրավունքների ու պարտականությունների առաջացման հիմքերը, գործունեության ընթացքում ծագող հարաբերությունները:

Անի Պողոսյան