«ՄԱՐԶԱԿԱՆ ԽԱՂԵՐԻՆ ԵՊՀ-Ն ՆԵՐԿԱՅԱՑՆԵԼԸ ՄԻՇՏ ԷԼ ՄԵԾԱԳՈՒՅՆ ՊԱՏԻՎ Է». ԵՊՀ ՀՐԱՁԳՈՒԹՅԱՆ ԹԻՄԸ ՀԱՂԹՈՒՄ Է 5-ՐԴ ԱՆԳԱՄ

ԵՊՀ հրաձգության թիմը, որի մարզիչն է Ֆիզիկական դաստիարակության և սպորտի ամբիոնի վարիչ, պրոֆեսոր, ֆիզիկական կուլտուրայի և սպորտի պատվավոր աշխատող Վլադիմիր Ավագիմյանցը, հետևյալ կազմով գրավեց առաջին հորիզոնականը՝ Տելեմակ Թադևոսյան, Եղիշե Ավագյան (Ռադիոֆիզիկայի ֆակուլտետ), Հակոբ Ավետիսյան (Քիմիայի ֆակուլտետ), Կարեն Գիժլարյան, Դավիթ Յանիկյան (Ինֆորմատիկայի և կիրառական մաթեմատիկայի ֆակուլտետ), Նվարդ Գաբրիելյան (Աշխարհագրության և երկրաբանության ֆակուլտետ), Դանիելա Գաբրիելյան (Միջազգային հարաբերությունների ֆակուլտետ), Անգելինա Սայադյան (Կենսաբանության ֆակուլտետ), Անտոնյան Լիլիթ (Կենսաբանության ֆակուլտետ), Միլենա Սաֆարյան (Ֆիզիկայի ֆակուլտետ):

Հարկ է նշել, որ աղջիկների անհատական պայքարում հրաձիգներ Նվարդ Գաբրիելյանը և Անտոնյան Լիլիթը գրավել են 1-ին և 2-րդ մրցանակային տեղերը:

Հրաձգության թիմի գրանցած հաղթանակների մասին զրուցել ենք ԵՊՀ ֆիզիկական դաստիարակության և սպորտի ամբիոնի վարիչ, մարզիչ Վլադիմիր Ավագիմյանցի հետ:

- Պարո՛ն Ավագիմյանց, ինչպե՞ս հինգ տարի անընդմեջ կերտել հաղթանակի պատմություն:

- Ինչպես գիտեք, մեր թիմում հավաքվել են ուսանողներ տարբեր կուրսերից և ֆակուլտետներից:

2016 թվականից հրաձիգ ուսանողների թիվն անընդհատ փոփոխվում է՝ ամեն տարի համալրվելով նոր ուսանողներով, որոնց աշխատասիրության ու նվիրումի շնորհիվ մենք շարունակում ենք նորանոր հաղթանակներ գրանցել:

Մեր թիմում գրեթե բոլոր ուսանողները կրթությունը համատեղում են աշխատանքի հետ, չնայած այդպիսի զբաղվածությանը՝ հասցնում են հրաձգության դասերին հաճախել, լինել պատասխանատու և նվիրումով մոտենալ այս մարզաձևին:

ԵՊՀ-ի պատիվը բարձր պահելու նրանց ցանկությունն ինձ համար մեծ նշանակություն ունի, և մեզ համար մեծագույն պատիվ է համալսարանը ներկայացնել հանրապետական ամենահեղինակավոր մարզական մրցաշարերից մեկին և բարձր արդյունքներ գրանցել:

Կարծում եմ, որ հենց այս «լիցքն» է մեզ օգնում ամեն անգամ նոր հաղթանակներ գրանցել:

Բացի դրանից՝ թիմում փոխօգնության, տարբեր իրավիճակներում միմյանց կողքին կանգնելու, աջակցելու մթնոլորտ է ձևավորվել, ինչն ինձ էլ ավելի է ուրախացնում:

- Ինչպե՞ս կգնահատեք աղջիկների ցուցաբերած ակտիվությունն այս սպորտաձևում:

- Կարող ենք արձանագրել, որ տարիների ընթացքում այդ ակտիվությունն ավելացել է:

Հիմա արդեն տղաներն ու աղջիկները հավասար մասնակցում են մարզումներին, իսկ երբեմն էլ աղջիկների մասնակցությունը կարող է գերազանցել տղաներինը:

Այս ամենից զատ՝ ինձ ուրախացնում են մրցաշարերի ժամանակ աղջիկների գրանցած բարձր արդյունքներն ինչպես թիմային, այնպես էլ անհատական պայքարում:

- Ի՞նչ խորհուրդ կտաք բոլոր այն ուսանողներին, որոնք նույնպես ցանկանում են հրաձգությամբ զբաղվել:

- Ես խորհուրդ կտամ ուսանողներին առաջին հերթին լսել սեփական սրտի ձայնին և ընտրել այն մարզաձևը, որի շարժումն ու դինամիկան ամենից շատ են սիրում:

Միայն այդ դեպքում է հնարավոր նշանակալի հաջողություններ գրանցել՝ անկախ նրանից, թե խոսքը որ մարզաձևի մասին է:

Պետք է նշեմ նաև, որ առանձնահատուկ կարևորություն ունեն այն բոլոր սպորտաձևերը, որոնք սովորեցնում են մարդուն պաշտպանել իր ունեցած ամենաթանկ բանը՝ սեփական կյանքը:

Մենք ունենք ուսանողներ, որոնք, չնայած իրենց խիտ գրաֆիկին, միշտ ժամանակ են գտնում հրաձգության համար, և ես հույս ունեմ, որ այդ սիրո ու նվիրումի շնորհիվ այդ մարդիկ վաղը դառնալու են բարձրակարգ մասնագետներ՝ մարդկային բարձր արժեքներով օժտված: