ՀՀ ԳԱԱ երկրաբանական գիտությունների ինստիտուտը (ՀՀ ԳԱԱ ԵԳԻ) հիմնադրվել է 1935 թ. և այժմ Երկրի մասին գիտությունների ոլորտում ամենամեծ կառույցն է Հայաստանում: Ինստիտուտն ունի 140 աշխատակից, այդ թվում՝ 71 գիտաշխատող: 

Ինստիտուտում հետազոտությունները կատարվում են կառուցվածքային 12 ստորաբաժանումներում՝ 10 լաբորատորիա, երկրաբանական թանգարան, գիտական 1 խումբ: ՀՀ ԳԱԱ երկրաբանական գիտությունների ինստիտուտը, ըստ գիտաչափական ցուցանիշների, Երկրի մասին գիտությունների բնագավառի խոշոր և առաջատար գիտական կազմակերպությունն է Հայաստանում: Ինստիտուտի կողմից  երկրաբանական և հարակից գիտությունների բնագավառներում կատարվում է հիմնարար և կիրառական հետազոտությունների լայն սպեկտր, մասնավորապես․

 հիմնական գիտական ուղղություններ՝

• երկրադինամիկա, ակտիվ տեկտոնիկա,

• հրաբխագիտություն, երկրաջերմային էներգիա, 

• ռեգիոնալ երկրաբանություն և նստվածքաբանություն, 

• մետաղական և ոչ մետաղական օգտակար հանածոներ, 

• օգտակար հանածոների որոնման երկրաքիմիական մեթոդներ,

• ստրատեգիական մետաղներ,

• վտանգավոր երկրաբանական երևույթներ, 

• սեյսմոլոգիա և սեյսմոտեկտոնիկա,

• գեոմոնիթորինգ, երկրաֆիզիկա,

• գեոարխեոլոգիա և արխեոմետրիա,

• հնէաբանություն և շերտագրություն, 

• պետրոլոգիա և իզոտոպային երկրաբանություն, 

• երկրաբանական տեղեկատվություն, գեոինֆորմատիկա, 

• հիդրոերկրաբանություն և հիդրոերկրաքիմիա:

Ինստիտուտն ակտիվորեն հրատարակում է իր հետազոտությունների արդյունքները արտասահմանյան գիտական ամսագրերում, որոնք ունեն ազդեցության գործակիցներ, ՀՀ ԿԳՄՍՆ ԲՈԿ-ի ցուցակում ներառված ամսագրերում, մենագրություններում և ժողովածուներում ինչպես Հայաստանում, այնպես էլ արտերկրում: Ինստիտուտի աշխատակիցների տպագրած հոդվածների գումարային միջազգային ազդեցության գործակիցը 2013-2023 թթ. ընթացքում կազմում է 271,8: 

Ինստիտուտում ՀՀ ԳԱԱ ԳԿՄԿ-ի շրջանակում գործում է Երկրաբանության ամբիոնը, որն իրականացնում է մագիստրոսների և ասպիրանտների մասնագիտական ուսումնառություն։

Ինստիտուտում գործում է 054 մասնագիտական Գիտական խորհուրդը, որը միակն է Հայաստանում և իրավասու է շնորհելու գ․թ․ և գ․դ․ աստիճաններ ԻԴ 01․01․ Երկրաբանություն մասնագիտությամբ։

Կոնտակտներ

Հիմնադրման տարեթիվը՝ 1935 թ․

Տնօրեն՝ երկրաբանական գիտությունների դոկտոր Խաչատուր Բորիսի Մելիքսեթյան

Հասցե՝ ք.Երևան, Մարշալ Բաղրամյան պ., 24ա, 

Հեռ.՝ (+374 10) 524 426

Էլհասցե՝ igs@sci.am

Կայքէջ՝ https://www.geology.am/