February 08, 2023 | 11:34
Գիտություն
Կրթություն
ՀԵՏԱԶՈՏԱԿԱՆ ԱՇԽԱՏԱՆՔԻ ԿԱՏԱՐՈՒՄԸ ԵՊՀ ԲԱԿԱԼԱՎՐԻ ԿՐԹԱԿԱՆ ԾՐԱԳՐԵՐՈՒՄ. ՈՒՂԵՑՈՒՅՑ
Երևանի պետական համալսարանում շարունակաբար քայլեր են կատարվում ուսանողի անհատական և խմբային հետազոտություն կատարելու ունակությունները խթանելու, ինչպես նաև մասնագիտական հմտությունների ու կարողությունների զարգացմանը նպաստելու համար:
ԵՊՀ ուսանողների հետազոտահենք մտածողությունը զարգացնելու նպատակով մասնագիտական դասընթացներում ներառվում է հետազոտական աշխատանքի բաղադրիչը։ Այդ դասընթացների ցանկը սահմանում է կրթական ծրագրի ղեկավարը և հաստատում տվյալ ստորաբաժանման (ֆակուլտետ, ինստիտուտ, կենտրոն) գիտական խորհուրդը: Հաստատումից հետո այն ընդգրկվում է համապատասխան կրթական ծրագրի մասնագրում:
Հետազոտական աշխատանքն անմիջականորեն առնչվում է տվյալ մասնագիտական դասընթացի առարկային ու խնդիրներին:
Երևանի պետական համալսարանում հետազոտական աշխատանք կատարում է ուսանողը կամ ուսանողների խումբը՝ կազմված առավելագույնը 4 ուսանողից, դասընթացը վարող դասախոսի ղեկավարությամբ, գիտական ու հետազոտական ժամանակակից մեթոդների կիրառմամբ:
Հետազոտական աշխատանքը գնահատվում է ինչպես անհատական, այնպես էլ խմբային աշխատանքների կատարման արդյունքում: Վերջինիս դեպքում գնահատումը կատարվում է՝ դասախոսի ընտրած գնահատման մեթոդաբանության համապատասխան:
Աշխատանքում գրագողության հայտնաբերման դեպքում այն գնահատվում է անբավարար:
Դասընթացի հետազոտական բաղադրիչի գնահատումը կատարվում է հետևյալ չափանիշներով.
- հետազոտական թեմայի արդիականության հիմնավորում ու կատարման ինքնուրույնություն,
- ստացված արդյունքների հիմնավորվածություն ու հավաստիություն,
- ստացված արդյունքների որակական և (կամ) քանակական վերլուծություն,
- աշխատանքի բանավոր ներկայացում (հիմնականում սահիկաշարի ուղեկցությամբ),
- համապատասխան եզրակացությունների առկայություն:
Հետազոտական աշխատանքի գնահատումը կարող է կատարվել նաև այլ դասախոսների ներգրավմամբ՝ կախված դասընթացը վարող դասախոսի դիրքորոշումից:
Նշենք, որ հետազոտական աշխատանքը դասախոսին ներկայացվում է տպագիր կամ էլեկտրոնային տարբերակով (որոշում է դասախոսը) նրա սահմանած ժամկետում:
Կարինե Հովհաննիսյան
