«ԵՊՀ-Ն ՍՈՎՈՐԵՑՐԵԼ Է ՏԱՐԲԵՐ ՈԼՈՐՏՆԵՐԻ ՄԱՍԻՆ ԽՈՍԵԼ ԳԻՏՈՒԹՅԱՆ ԼԵԶՎՈՎ». ԳԱՅԱՆԵ ԼԱԼԱՅԱՆ

Մրցույթի նշանակալի դերը

«Այս մրցույթը կարծես ուսանողական տարիներին իմ դրսևորած ակտիվ գործունեության և բարձր առաջադիմության ամփոփիչ գնահատականը լիներ»,- մեզ հետ զրույցում պատմում է լավագույն ուսանողն ու հավելում. «Հաղթանակիս գրավականը դասախոսներիս տված մեծարժեք գիտելիքն է»:                                              

Գայանեն նշում է, որ իրենց աշխատանքն անմնացորդ նվիրումով կատարող դասախոսների շնորհիվ ուսանողները համակողմանի ուսումնասիրում են իրենց ընտրած ոլորտը, ոգեշնչվում դառնալու աշխատաշուկայում պահանջված մասնագետներ:   

Վերապատրաստումները օտարերկրյա համալսարաններում

Գայանեն մասնագիտական գիտելիքների փոխանակման նպատակով մասնակցել է վերապատրաստման միջազգային դասընթացների Աախենի Ռեյնիշ-Վեստֆելիշեի տեխնիկական համալսարանում, Միջազգային հաղորդակցության ինստիտուտում (Գերմանական ակադեմիական փոխանակման ծառայության (DAAD) շրջանակում) և Սանկտ Պետերբուրգի պետական համալսարանում («Երիտասարդ գիտնականների աջակցության ծրագրի» շրջանակում)։

Գիտական գործունեությունը  

Գայանեն հեղինակել է գիտական հինգ հոդված: Ասում է` գիտության հանդեպ սերն առաջացել է երկրորդ կուրսից, և այդ գործում առանձնակի կարևոր է եղել ԵՊՀ ուսանողական գիտական ընկերության դերը:

Լավագույն ուսանողի  հետաքրքրությունները

«Իմ հետաքրքրության շրջանակն ընդգրկում է հոգեֆիզիոլոգիան: Վերջերս մեր ֆակուլտետը ձեռք է բերել կենսաբանական հետադարձ կապ ապահովող սարք, ինչն ուսանողներին հնարավորություն է տալիս գործնականում կիրառելու տեսական գիտելիքները: Սարքի ձեռքբերումը և դրանով կատարվող հետազոտական աշխատանքները ևս մեկ անգամ ընդգծեցին ոլորտի զարգացման գործում ԵՊՀ նշանակալի դերակատարումը։ Համալսարանում ստացած կրթության շնորհիվ ես այժմ աշխատում եմ սպորտի հոգեբանության բնագավառում։ Սպորտը ձգտում է քայլել գիտությանը համընթաց, իսկ ԵՊՀ-ն սովորեցրել է տարբեր ոլորտների մասին խոսել գիտության լեզվով»,- ընդգծում է Գայանեն, ապա՝ հույս հայտնում. «Հետագայում ստանալով ասպիրանտական կրթություն և գործադրելով սպորտի հոգեբանության ու հոգեֆիզիոլոգիայի զարգացմանն ուղղված ջանքերս՝ կփորձեմ նպաստել Հայաստանում այդ ոլորտների զարգացմանը…»: 

Մարինե Մկրտչյան