ԵՊՀ շրջանավարտների և կարիերայի կենտրոնի, Հայաստանի Հանրապետությունում Շվեդիայի դեսպանության և Շվեդիայի շրջանավարտների ցանցի համագործակցությամբ համալսարանում անցկացվեց «Electionville» կրթական ինտերակտիվ խաղը։ Շվեդական ինստիտուտի մշակած կրթական այս խաղի հիմնական նպատակն է երիտասարդներին ծանոթացնել ժողովրդավարական արժեքներին և ընտրական գործընթացներին՝ նրանց հնարավորություն տալով գործնականում ընկալելու տեղական ժողովրդավարության, ռեսուրսների բաշխման ու որոշումների կայացման մեխանիզմները։
Խաղի ընթացքում մասնակից ուսանողները «Electionville» մտացածին քաղաքի խորհրդի անդամների դերերով փորձեցին իրենց ուժերը՝ քննարկելով քաղաքային խնդիրները, ընդունելով որոշումներ և բաշխելով սահմանափակ ռեսուրսներ՝ հասարակության տարբեր խմբերի խնդիրներին առավել արդյունավետ լուծումներ առաջարկելու համար։ Այս ձևաչափը հնարավորություն տվեց ուսանողներին տեսնելու, թե ինչպես է գործում ժողովրդավարությունը տեղական մակարդակում և որքան կարևոր են փոխզիջումը, լսելու և համագործակցելու կարողությունը։Միջոցառումն անցկացվեց Շվեդական ինստիտուտի մշակած գլոբալ գործիքակազմի շրջանակում, որը կիրառվել է աշխարհի բազմաթիվ երկրներում և հասանելի է եղել հազարավոր երիտասարդների՝ նպաստելով նրանց քաղաքացիական և քաղաքական կրթությանը։
ԵՊՀ զարգացման և նորարարությունների գծով պրոռեկտոր Միքայել Հովհաննիսյանը շեշտեց նմանատիպ նախաձեռնությունների կարևորությունը՝ ասելով. «Սա մեզ համար հերթական, բայց շատ կարևոր համագործակցություն է։ Այսօրինակ միջոցառումները, որոնք ունեն ուսուցողական-խաղային ձևաչափ, քաղաքացիական կրթության համատեքստում ունեն առաջնահերթ նշանակություն։ Դրանք կրթության խաղարկայնացման տեսանկյունից շատ արդյունավետ են, քանի որ օգնում են կրթական գործընթացը առավել հետաքրքիր, ներգրավող և գործնական դարձնելուն»։
ԵՊՀ շրջանավարտների և կարիերայի կենտրոնի տնօրեն Աստղիկ Մնացականյանը ևս կարևորեց նախաձեռնությունը՝ ընդգծելով կրթական և հմտությունների զարգացման բաղադրիչները։
«Շվեդիայի դեսպանության և շրջանավարտների ցանցի հետ համատեղ իրականացվող այս ինտերակտիվ ծրագիրը նպատակ ունի խաղային եղանակով ուսանողներին ծանոթացնելու տեղական ժողովրդավարությանը, որոշումների կայացման գործընթացներին և իրենց ներգրավման հնարավորություններին։ Նման ոչ ֆորմալ կրթական ձևաչափերը շատ արդյունավետ են, քանի որ հնարավորություն են տալիս իրական փորձի միջոցով ձեռք բերելու արժեքավոր գիտելիքներ։ Մասնակիցների մեծ մասը ԵՊՀ միջազգային հարաբերությունների ֆակուլտետի ուսանողներն են, որոնց մասնագիտական ուղղվածությունը լիովին համապատասխանում է նախաձեռնության բովանդակությանը»,- նշեց նա։
Շվեդիայի զարգացման համագործակցության ղեկավարի տեղակալ, շրջակա միջավայրի և կլիմայի հարցերով ծրագրի մասնագետ Սառա Հուպերը ևս ընդգծեց ժողովրդավարական կրթության և երիտասարդների մասնակցության կարևորությունը։
«Շվեդիայում մենք մեծ ուշադրություն ենք դարձնում ժողովրդավարական մշակույթի ձևավորմանը դեռ երիտասարդ տարիքից։ Լիահույս ենք, որ խաղային և մասնակցային ձևաչափերով նման նախաձեռնությունները լավագույն միջոցն են՝ երիտասարդներին ներգրավելու քաղաքացիական կյանքում։ Շատ ուրախ ենք տեսնելու, որ այս գաղափարը իր տեղն ունի նաև Հայաստանում, և վստահ ենք, որ այն կնպաստի ավելի իրազեկ և ակտիվ երիտասարդների ձևավորմանը»,- մատնանշեց նա։
Հայաստանում Շվեդիայի շրջանավարտների միության խորհրդի նախագահ Արման Գասպարյանը իր հերթին նշեց. «Մեծ պատիվ է այս խաղն անցկացնել ԵՊՀ ուսանողների հետ։ Այն մշակվել և տարածվում է ամբողջ աշխարհում՝ Շվեդական ինստիտուտի նախաձեռնությամբ։ Հայաստանում խաղը անցկացվում է երկրորդ անգամ, և մենք վստահ ենք, որ այն կդառնա շարունակական՝ ընդգրկելով ուսանողական ավելի լայն շրջանակներ»։
Միջոցառման ավարտին մասնակիցները փաստեցին, որ խաղը ոչ միայն հնարավորություն տվեց ծանոթանալու ժողովրդավարության գործնական կողմերին, այլև ստեղծեց միջավայր, որտեղ թիմային աշխատանքը, քննարկումները և պատասխանատվությունը դարձան իրական փորձի մաս։
