1.   ԸՆԴՀԱՆՈՒՐ ԴՐՈՒՅԹՆԵՐ

1. Սույն ընթացակարգը սահմանում է «Երևանի պետական համալսարան» հիմնադ­րամի (այսուհետ՝ ԵՊՀ) համահամալսարանական կամ կառուցվածքային ստորաբաժանման (ինստիտուտ, ֆակուլտետ, այլ ստորաբաժանում) կազմում գործող ամբիոնի վարիչի (այսու­հետ՝ ամբիոնի վարիչ) թափուր պաշտոնի համալրման կարգն ու պաշտոնի հավակնորդին ներ­կայացվող պահանջները:

(1-ին կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

2. Ամբիոնի վարիչ կարող է ընտրվել այն անձը, որն ունի.

1) ամբիոնի ուղղվածությանը համապատասխան կամ հարակից մասնագիտությամբ գիտական աստիճան, 

2) առնվազն երեք տարվա ակադեմիական աշխատանքի ստաժ, 

3) վերջին հինգ տարիների ընթացքում ունի միջազգային գիտատեղեկատ­վական շտեմարաններում (ՄԳՇ) հրապարակված առնվազն երկու գի­տա­կան աշխատանք (հոդված) և բացի դրանից՝ ունի նաև սույն ենթակետով սահմանված կարգով հաշվարկված գիտահետազոտական ու ուսումնա­մեթոդական գործունեության առնվազն վեց միավոր.

(2-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

3. Ամբիոնի վարիչն ընտրվում է սույն ընթացակարգով սահմանված կարգով, բաց մրցույթի հիման վրա՝ փակ, գաղտնի քվեարկությամբ ու հինգ տարի ժամկետով:

Նույն անձն իրավունք ունի ամբիոնի վարիչի պաշտոնն զբաղեցնելու ոչ ավելի, քան երկու անգամ անընդմեջ, այդ թվում՝ կառուցվածքային փոփոխության դեպքում։ 

Ամբիոնի վարիչ չի կարող ընտրվել կամ սույն ընթացակարգի 32-րդ կետով սահմանված կարգով ամբիոնի վարիչի ժամանակավոր պաշտոնակատար չի կարող նշանակվել այն անձը, որի 65 տարին լրացել է:

Ընտրված ամբիոնի վարիչի լիազորությունները դադարեցվում են ռեկտորի որոշմամբ, եթե լրացել է նրա 65 տարին։

Ամբիոնի վարիչի աշխատանք ակադեմիական աշխատանք է:

(3-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

4. Կառուցվածքային ստորաբաժանման կազմում գործող ամբիոնի վարիչն ընտրվում է  կառուցվածքային ստորաբաժանման գիտական խորհրդում: Գիտական խորհրդի ընդունած որոշումը (մրցութային ընտրության արդյունքները) հաստատվում է ԵՊՀ գիտական խորհրդում՝ բաց քվեարկությամբ: 

5. Համահամալսարանական ամբիոնի վարիչն ընտրվում է ԵՊՀ գիտական խորհրդում:

2. ԸՆՏՐՈՒԹՅԱՆ ՆՇԱՆԱԿՄԱՆ ՈՒ ՊԱՇՏՈՆԻ ՀԱՎԱԿՆՈՐԴԻ ԱՌԱՋԱԴՐՄԱՆ ԿԱՐԳԸ

6. Ամբիոնի վարիչի մրցութային ընտրությունը նշանակվում է ռեկտորի հրամանով, և այդմասին հայտարարությունը հրապա­րակ­վումէ ԵՊՀ կայքէջում:

Ամբիոնի վարիչի աշխատանքային գործունեության ժամկետի ավարտից առնվազն 40 օր առաջ ռեկտորի հրամանով նշանակվում է նոր ընտրություն:

7. Ընտրությանը մասնակցելու փաստաթղթերի ընդունման համար սահմանվում է 15-օրյա ժամկետ:

Պաշտոնի հավակնորդը հայտարարությամբ սահմանված ժամկետում ԵՊՀ անձնա­կազմի կառավարման ստորաբաժանմանն է ներկայացնում հետևյալ փաստաթղթերը՝

1) դիմում՝ ռեկտորի անունով,

2) ինքնակենսագրություն (CV),

3) բարձրագույն կրթության վկայականի (դիպլոմի), գիտական աստիճանի դիպլոմի, պատճենները, 

4) վերջին հինգ տարիների ընթացքում հրատարակված գիտահետազոտական ու ուսումնամեթոդական աշխատանքների ցանկը: 

5) հավակնորդի նախաձեռնությամբ գիտամանկավարժական գործունեությունը բնու­թագ­րող այլ փաստաթղթեր:

(7-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

8. Անձնակազմի կառավարման ստորաբաժանումը փաստաթղթերի ընդունման վերջ­նա­ժամկետի ավարտից անմիջապես հետո հավակնորդների դիմումները կից փաստաթղթերով ուղարկում է ԵՊՀ գիտական քարտուղարին, որը եռօրյա ժամկետում դրանք ուղարկում է ԵՊՀ-ում գործող որակավորման մանդատային հանձնաժողովին (այսուհետ՝ հանձնաժողով): 

Հանձնաժողովի անվանական կազմը հաստատվում է ռեկտորի հրամանով:

(8-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

9. Հավակնորդի փաստաթղթերը հանձնաժողովի կողմից եռօրյա ժամկետում ուսում­նասիրվում են և համապատասխան եզրակացությամբ ներկայացվում են ռեկտորին:

Հավակնորդի դիմումը հանձնաժողովի կողմից ենթակա է մերժման, եթե նրա տվյալները չեն բավարարում մրցույթի պայմաններին, կամ չի պահպանվել դիմումի ներկայացման ժամկետը:

10. Ռեկտորը մրցույթի պայմաններին բավարարող հավակնորդի դիմումն ուղարկում է կառուցվածքային ստորաբաժանման ղեկավարին (համահամալսարանական ամբիոնի դեպ­քում՝պրոռեկտորին), որը եռօրյա ժամկետում կազմակերպում է համապատասխան ամբիոնում հավակնորդի թեկնածությունը քննարկելու և ստորաբաժանման (ԵՊՀ) գիտական խորհրդի մրցութային հանձնաժողովին մասնագիտական կարծիք ներկայացնելու գործըն­թացը: 

Ամբիոնի մասնագիտական կարծիքում նշվում են հավակնորդի մասնագիտական որակների ու գիտամանկավարժական գործունեության բնութագիրը, ամբիոնի նիստի բաց քվեարկության արդյունքները:

3. ԸՆՏՐՈՒԹՅԱՆ ԿԱԶՄԱԿԵՐՊՄԱՆ ՈՒ ԱՆՑԿԱՑՄԱՆ ԿԱՐԳԸ

11. Կառուցվածքային ստորաբաժանման (ԵՊՀ) գիտական խորհրդի մրցութային հանձնաժողովը եռօրյա ժամկետում ուսումնասիրում է հավակնորդի փաստաթղթերի փա­թեթը և եզրակացություն է ներկայացնում ստորաբաժանման (ԵՊՀ) գիտական խորհրդի նա­խա­գահին: 

Գիտական խորհրդի նախագահը հնգօրյա ժամկետում ամբիոնի վարիչի ընտրության օրակարգով հրավիրում է գիտական խորհրդի նիստ: Նույն նիստում կարող է անցկացվել մի քանի ընտրություն:

12. Գիտական խորհրդի նախագահողը, բացելով նիստը, հրապարակում է ընտրությամբ համալրվող պաշտոնների ցանկը, պաշտոնի հավակնորդների տվյալները:

13. Հավակնորդի ծրագրային ելույթի, հարց ու պատասխանի, քննարկումների (ներառյալ ելույթների), հավակնորդի ամփոփիչ ելույթի տևողությունըսահմանում է գիտական խորհուրդը:

14. Գիտական խորհրդի նիստին պաշտոնի հավակնորդի ներկայությունը պարտադիր է: 

Հավակնորդի բացակայության դեպքում գիտական խորհուրդը որոշում է կայացնում նրա թեկ­նածությունը չքննարկելու ու քվեաթերթիկում չընդգրկելու մասին:

15. Նախագահողը ծրագրային ելույթի համար, ըստ ազգանունների այբբենական հերթա­կա­նության, ձայն է տալիս տվյալ պաշտոնի հավակնորդներին: 

16. Յուրաքանչյուր հավակնորդի ելույթից հետո նախագահողի առաջարկությամբ գիտա­կան խորհրդի անդամները կարող են հարցեր տալ, ելույթ ունենալ ու ծավալել քննարկում:  Վերջում հավակնորդին տրվում է ամփոփիչելույթի հնարավորություն: 

17. Քննարկման ավարտից հետո ինքնաբացարկ չհայտնած հավակնորդների անուններն ընդգրկվում են քվեաթերթիկում:

18. Փակ, գաղտնի քվեարկություն անցկացնելու ու արդյունքներն ամփոփելու նպատակով նախա­գահողի առաջարկով գիտական խորհրդի անդամներից ընտրվում է 3 անդամից կազմ­ված հաշվիչ հանձնաժողով: Հավակնորդը չի կարող լինել հաշվիչ հանձնաժողովի ան­դամ: Հաշվիչ հանձնաժողովն իր կազմից ընտրում է հանձնաժողովի նախագահ: Հանձնա­ժողովի որոշումներն ընդունվում են անդամների ձայների պարզ մեծամասնությամբ:

Հաշվիչ հանձնաժողովը պարտավոր է ապահովել ընտրության գաղտնիությունն ու համա­պա­­տասխանությունը սույն ընթացակարգի պահանջներին:

19. Մեկ հավակնորդի դեպքում քվեաթերթիկում նշվում են հավակնորդի անունը, «կողմ» ու «դեմ» բառերը (Հավելված 1): 

Մեկից ավելիհավակնորդների դեպքում քվեաթերթիկում այբբենական կարգով նշվում են հավակնորդներիանունները, վերջում՝ «բոլորին դեմ եմ» արտահայտությունը (Հավելված 2):

20. Գիտական խորհրդի յուրաքանչյուր անդամ ստորագրում է անվանացանկում ու ստա­նում է մեկքվեաթերթիկ: Փակ, գաղտնի քվեարկությունից հետո քվեարկողը այն գցում է քվեա­տուփի մեջ և հեռանում է ընտրության սրահից:

21. Վավեր է համարվում այն քվեաթերթիկը, որում՝

1) «կողմ» կամ «դեմ» բառերից որևէ մեկի դիմաց (միակ հավակնորդի քվեարկության դեպքում) կատարված է V նշումը,

2) քվեարկված է միայն մեկ հավակնորդի կամ «բոլորին դեմ եմ»-ի օգտին (մեկից ավելի հավակնորդների քվեարկության դեպքում): Որևէ հավակնորդի կամ «բոլորին դեմ եմ»-ի օգտին քվեարկելու համար համապատասխան տողի վանդակում կատարվում է V նշումը:

Քվեաթերթիկում այլ նշումների, ընդգծումների ու նշանների առկայության դեպքում քվեաթերթիկը համարվում է անվավեր:

Քվեաթերթիկն անվավեր ճանաչելու որոշումը կայացնում է հաշվիչ հանձնաժողովը ձայ­ների պարզ մեծամասնությամբ: Եթե քվեաթերթիկն անվավեր ճանաչելն ազդում է ընտ­րութ­յան արդյունքների վրա, և այդ հարցի առնչությամբ առկա է հանձնաժողովի անդամի հատուկ կարծիք, ապա այն անվավեր ճանաչելու հարցը քննարկվում է գիտական խորհրդի կողմից, և կայացվում է համապատասխան որոշում:

22. Քվեարկությունն ավարտվելուց հետո հաշվիչ հանձնաժողովն ամփոփում է քվեար­կության արդյունքները և կազմում արձանագրություն (Հավելված 3): 

23. Ամբիոնի վարիչի պաշտոնում ընտրված է համարվում այն հավակնորդը, որը ստացել է գիտական խորհրդի ձայների ընդհանուր թվի մեծամաս­նութ­յունը:

24. Հաշվիչ հանձնաժողովի նախագահը գիտական խորհրդին է ներկայացնում քվեար­կութ­յան արդյունքները (նշելով յուրաքանչյուր հավակնորդի ստացած քվեները), որից հետո գիտական խորհուրդն ընդունում է հետևյալ որոշումներից որևէ մեկը՝

1) առաջադրված պաշտոնում հավակնորդի ընտրվելու մասին,

2) կրկնակի քվեարկություն անցկացնելու մասին,

3) ընտրությունները չկայացած ճանաչելու մասին:

 (24-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

25. Եթե հավակնորդների թիվը երեք կամ ավելի է, և որևէ մեկը չի ստանում անհրա­ժեշտ «կողմ» քվեները, ապա նույն նիստում կազմակերպվում է կրկնակի քվեարկություն, որին մասնակցում են առավելագույն «կողմ» քվեներ ստացած երկու (հավասար «կողմ» քվեների դեպքում՝ երկուսից ավելի) հավակնորդները:

(25-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

26. Կրկնակի քվեարկությունը կազմակերպվում է սույն ընթացակարգով սահմանված կարգով:

(26-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ)

27. Ընտրությունը համարվում է չկայացած, եթե.

1) պաշտոնի միակ հավակնորդը չի ստացել գիտական խորհրդի ձայների ընդհանուր թվի մեծամասնությունը, 

2) կրկնակի քվեարկության արդյունքով որևէ հավակնորդ չի ստացել գիտական խորհրդի ձայների ընդհանուր թվի մեծամասնությունը:

28. Ընտրության գործընթացի վերաբերյալ բոլոր փաստաթղթերը կցվում են գիտական խորհրդի նիստի արձանագրությանը և արխիվացվում են գիտական խորհրդի քարտուղա­րութ­յունում:

29. Ամբիոնի վարիչի մրցութային ընտրության գործընթացում Հայաստանի Հանրա­պե­տության օրենքների, իրավական այլ ակտերի, ԵՊՀ կանոնադրության, ներքին իրավական այլ ակտերի և սույն ընթացակարգի խախտումներ հայտնաբերելու դեպքում ռեկտորը տասնօրյա ժամկետում կառուցվածքային ստորաբաժանման (ԵՊՀ) գիտական խորհրդում նշանակում է կրկնակի քննարկում ու քվեարկություն:

30. Ամբիոնի վարիչի պաշտոնում ընտրված անձը հրավիրվում է ԵՊՀ գիտական խորհրդի նիստին, և խորհրդի անդամներն իրավունք ունեն նրան հարցեր տալու:

(30-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

31. ԵՊՀ գիտական խորհրդի որոշումն ուժի մեջ մտնելուց հետո՝ եռօրյա ժամկետում, ռեկտորն ընդունում է անհատական իրավական ակտ (կնքում է աշխատանքային պայ­մանագիր) և ընտրված անձին նշանակում ամբիոնի վարիչի պաշտոնում 5 տարի ժամկետով:

32. Ամբիոնի ստեղծման, վերակազմակերպման (կամ նման գործընթացի առկայության), ամբիոնի վարիչի լիազորության վաղաժամկետ դա­դա­­րեցման, ամբիոնի վարիչի թափուր պաշտոնի համալրման համար հայտարարված ընտրությանը մաս­նա­կիցների բացա­կա­յութ­յան, ընտրությունը չկայանալու կամ բացառիկ այլ դեպքերում ռեկտորն իրավասու է մինչև 6 ամիս ժամկետով ամբիոնի վարիչի ժամանակավոր պաշտոնա­կատար նշանակել ամբիոնի ուղղությանը համապատասխանող գիտական աստիճան ունեցող անձի և այդ ժամկետի ավարտից առնվազն 40 օր առաջ նշանակել ու անցկացնել նոր ընտրություն:

(32-րդ կետը փոփոխվել է ԵՊՀ գիտական խորհրդի 18.12.2025 թ. թիվ 7/2 որոշմամբ):

Հավելված 1_2.pdf

Հավելված 2_2.pdf

Հավելված 3_1.pdf