ԵՊՀ-Ն 100 ՏԱՐԵԿԱՆ Է. ՏԵՂԻ է ՈՒՆԵՑԵԼ ԳԻՏԽՈՐՀՐԴԻ ՀԱՆԴԻՍԱՎՈՐ ՆԻՍՏ

ԵՊՀ գիտական խորհրդի հանդիսավոր նիստին մասնակցում էին  ՀՀ ԱԺ նախագահ Արարատ Միրզոյանը, ՀՀ ԿԳՄՍ նախարար Արայիկ Հարությունյանը, ԵՊՀ ղեկավարությունը, տարբեր ստորաբաժանումների ղեկավարներ, ֆակուլտետների դեկաններ, պրոֆեսորադասախոսական կազմի ներկայացուցիչներ, ուսանողներ և հյուրեր:

Նիստի սկզբում ԵՊՀ ռեկտորի ժամանակավոր պաշտոնակատար Գեղամ Գևորգյանը նշեց, որ բացի ժամանած հյուրերի շնորհավորանքներից և մաղթանքներից, ԵՊՀ-ն 100-ամյակի կապակցությամբ շնորհավորական ուղերձներ է ստացել գործընկեր այլ բուհերից, որոնց ներկայացուցիչները չեն կարողացել մասնակցել պաշտոնական միջոցառումներին:

ԵՊՀ գիտական քարտուղար Լևոն Հովսեփյանն ընթերցեց ակադեմիական ազատության մասին հռչակագիրը, որը այն հիմնարար սկզբունքների և արժեքների արտացոլումն է, որոնց վրա խարսխված է համալսարանների գործունեությունը:

ՀՀ ԱԺ նախագահ Արարատ Միրզոյանը, շնորհավորելով բոլորին, ասաց, որ մարդկության զարգացման պատմությունը նախևառաջ կրթության զարգացման պատմությունն է, քանի որ կրթությունն է յուրաքանչյուր առաջընթացի կարևորագույն նախադրյալը և նախապայմանը:

«Այդ մասին քաջ գիտակցել են մեր նախահայրերը, որի լավագույն ապացույցը դժվարին պայմաններում Հայաստանում համալսարանների հիմնադրումն է եղել: Այդպես էր նաև 1919 թվականին, երբ բարդագույն աշխարհաքաղաքական, պատերազմի, սովի և համաճարակի պայմաններում նախարարների խորհուրդը որոշում կայացրեց հիմնել պետական համալսարան, ինչը Հայաստանի առաջին հանրապետության ամենաշրջադարձային և կարևոր էջերից մեկն էր»,- ասաց Արարատ Միրզոյանը:

Նա փաստեց, որ 100 տարիների ընթացքում համալսարանը եղել է ոչ միայն երկրի գիտակրթական, այլև հասարակական-քաղաքական մտքի կենտրոնը:

Արարատ Միրզոյանը ԵՊՀ 100-ամյակի կապակցությամբ համալսարանի մի շարք աշխատակիցների հանձնեց պետական պարգևներ և կոչումներ՝ գիտության և կրթության զարգացման գործում ներդրած նշանակալի ավանդի համար:

Նախագահի հրամանագրով ԵՊՀ ակադեմիկոս Հրանտ Թամրազյանի անվան հայ գրականության պատմության ամբիոնի պրոֆեսոր, բան. գիտ. դոկտոր Վազգեն Սաֆարյանը պարգևատրվեց «Մովսես Խորենացի» մեդալով, Հանրահաշվի և երկրաչափության ամբիոնի պատվավոր վարիչ, ֆիզմաթ. գիտ. դոկտոր, պրոֆեսոր Յուրի Մովսիսյանն ու Տեղեկատվական տեխնոլոգիաների կրթական և հետազոտական կենտրոնի ղեկավար, ՀՀ ԳԱԱ ակադեմիկոս, ֆիզմաթ. գիտ. դոկտոր, պրոֆեսոր Սամվել Շուքուրյանը՝ «Անանիա Շիրակացի» մեդալներով:

ԵՊՀ սոցիալական փիլիսոփայության, բարոյագիտության և գեղագիտության ամբիոնի վարիչ, փիլ. գիտ. դոկտոր, պրոֆեսոր Էդվարդ Հարությունյանին, Քիմիայի ֆակուլտետի դեկան, քիմ. գիտ. դոկտոր, պրոֆեսոր Տարիել Ղոչիկյանին և Կենսաքիմիայի, մանրէաբանության և կենսատեխնոլոգիայի ամբիոնի վարիչ, ՀՀ ԳԱԱ թղթակից անդամ, կենսաբ. գիտ. դոկտոր, պրոֆեսոր Արմեն Թռչունյանին շնորհվեց ՀՀ գիտության վաստակավոր գործչի պատվավոր կոչում:

ՀՀ ԿԳՄՍ նախարար Արայիկ Հարությունյանը, շնորհավորելով բոլորին ԵՊՀ 100-ամյակի կապակցությամբ, ասաց, որ հարյուրամյա պատմության ընթացքում համալսարանը դժվարին ուղի է անցել՝ դիմակայելով մարտահրավերների և փորձությունների, և մշտապես հաղթահարել է՝ շնորհիվ համալսարանին հատուկ այն միջավայրի, որը, ըստ նրա, այսօր էլ շարունակում է գոյություն ունենալ Մայր բուհում:

Նրա փոխանցմամբ, համալսարանների համընդհանուր հռչակագրի հիմնարար սկզբունքներից մեկը համալսարանական կյանքի գիտահետազոտական աշխատանքներում և դասավանդման ընթացքում ազատության պահպանումն է:

«Կառավարությունները և համալսարանները պետք է ապահովեն հարգանքն այդ հիմնարար պահանջի նկատմամբ՝ մերժելով անհանդուրժողականությունը: Համալսարանները պետք է պատրաստ լինեն բաց երկխոսության»,- ասաց Արայիկ Հարությունյանը և հույս հայտնեց, որ «Բարձրագույն կրթության մասին» ՀՀ օրենքի նոր նախագծի քննարկմանը համալսարանականներն ակտիվ դերակատարություն կունենան, քանի որ ԵՊՀ-ն բարձրագույն կրթության ոլորտում հիմնական լոկոմոտիվն է:

ԵՊՀ 100-ամյակի կապակցությամբ շնորհավորական ուղերձով հանդես եկավ ՀՀ ԳԱԱ նախագահ, ԵՊՀ ռադիոֆիզիկայի ամբիոնի վարիչ և բուհի նախկին ռեկտոր Ռադիկ Մարտիրոսյանը, որը հոբելյանի կապակցությամբ ԵՊՀ-ին նվիրեց ամենահին գտածոներից մեկի՝ 5 հազար տարվա կոշիկի կրկնօրինակը:

Հայաստանյան մյուս բոլոր բուհերի անունից ԵՊՀ գիտխորհրդի հանդիսավոր նիստին շնորհավորական ելույթով հանդես եկավ նաև Հայաստանի ազգային պոլիտեխնիկական համալսարանի ռեկտոր Ոստանիկ Մարուխյանը, որն էլ ԵՊՀ-ին շնորհեց Հայաստանի ազգային պոլիտեխնիկական համալսարանի ոսկե մեդալ:

ԵՊՀ-ին հիմնադրման 100-ամյակի կապակցությամբ շնորհավորեց նաև Ճարտարապետության և շինարարության Հայաստանի ազգային համալսարանի պրոռեկտորը, որը հայտնի նկարիչ Թաթոսի հետ միասին համալսարանին նվիրեց նկարչի աշխատանքներից մեկը:

Գիտխորհրդի հանդիսավոր նիստի ավարտին համալսարանականներին շնորհվեցին ԵՊՀ ոսկե մեդալներ: Մրցանակակիրները ներկայացված են այստեղ, նրանց շարքում էին նաև Քառօրյա պատերազմի հերոսները:

 Քնար Միսակյան