Հաշվողական ենթակառուցվածք

Երևանի պետական համալսարանի հաշվողական կենտրոնը հագեցած է 72 NVIDIA H100 գրաֆիկական պրոցեսորներով (GPU)։ Ենթակառուցվածքը ստեղծվել է ՀՀ կառավարության և ՀՀ ԿԳՄՍՆ բարձրագույն կրթության և գիտության կոմիտեի աջակցությամբ՝ Հայաստանում արհեստական բանականության (ԱԲ) և բարձր արտադրողականությամբ հաշվարկների (HPC) զարգացումը խթանելու նպատակով։

Կենտրոնի հաշվողական կարողությունները

Բարձրագույն կրթության և գիտության կոմիտեի ֆինանսավորմամբ 2022-2023 թթ. ձեռք է բերվել 8 NVIDIA A100 և 8 NVIDIA H100 GPU։
2026 թ. հունվարին գործարկվել է ևս 64 NVIDIA H100 GPU՝ ապահովելով կենտրոնի ներկայիս հաշվողական հզորությունը։

Գերհամակարգիչը հնարավորություն է տալիս իրականացնելու մրցունակ հետազոտություններ հետևյալ ուղղություններով՝

Նոր մոլեկուլների նախագծում, լեզվական մոդելների մշակում, տեսողական և ռադիոազդանշանների մշակում։
Բազմաբնույթ սիմուլյացիաներ նյութագիտության, կենսաբանության և ֆիզիկայի ոլորտներում։
Արբանյակային լուսանկարների վերլուծություն և մեծածավալ տվյալների մշակում։

72 NVIDIA H100 GPU-ների առկայությունը հնարավորություն է տալիս լեզվական մեծ մոդելների (LLM) վարժեցման ժամանակը ամիսներից կրճատել մինչև օրեր։

Այս ենթակառուցվածքը նոր հնարավորություններ է ստեղծում հայաստանյան հետազոտողների և ուսանողների համար՝ զարգացնելու համագործակցությունը միջազգային գիտական հանրույթի հետ։

Կենտրոնի ենթակառուցվածքը հասանելի է ինչպես ԵՊՀ-ի, այնպես էլ ՀՀ այլ բուհերի և գիտահետազոտական կազմակերպությունների ուսանողների ու հետազոտողների համար։ Ռեսուրսներից օգտվելու հնարավորություն տրամադրվում է հայտը ներկայացնելուց և հաստատում ստանալուց հետո։ Հայտատուն պարտավորվում է հաշվողական հզորություններն օգտագործել նպատակային և արդյունավետ՝ գիտական ու կրթական ծրագրերի շրջանակում։

Գերհամակարգչից օգտվելու համար անհրաժեշտ է լրացնել հետևյալ հայտը։

Հաշվողական ենթակառուցվածք

Նորություններ և մեդիա