Memorandum of understanding signed to develop entrepreneurial skills of students, postgraduates and researchers

Ծրագիրը նախատեսված է ուսանողների, ասպիրանտների և երիտասարդ դասախոսների համար և նպատակ ունի աջակցելու սոցիալական որևէ խնդիր լուծող նորարարական գաղափարների իրականացմանը՝ օգնելով ձեռներեցներին սաղմնային փուլում գտնվող գաղափարը կյանքի կոչել և գաղափարից անցում կատարել դեպի ձեռնարկություն։

ԵՊՀ-ի և «Ձեռնարկությունների ինկուբատոր» հիմնադրամի (ՁԻՀ) հետ համատեղ մշակված ծրագրի շրջանակում մասնակիցները ձեռք կբերեն ձեռներեցության, առաջնորդության հմտություններ, շուկայի վերլուծության ունակություններ, սեփական բիզնեսը կառավարելու և զարգացնելու հնարավորություններ, նրանց կտրամադրվեն անհրաժեշտ ռեսուրսներ և մենթորություն, ինչի արդյունքում էլ նրանք կկարողանան ստեղծել/գրանցել ձեռնարկություն։

«Բիզնես ինկուբատորը ԵՊՀ կարևոր ստորաբաժանումներից մեկն է, որի միջոցով մենք զարգացնում ենք ուսանողների, ասպիրանտների և հետազոտողների ձեռներեցության ունակությունները։ Մենք համոզված ենք, որ գիտելիքը պետք է իր արդյունավետ կիրառությունը գտնի, և սա ամենաարդյունավետ ձևերից մեկն է, որի միջոցով հնարավոր է ստեղծել ամուր ու ճկուն կապ կրթության, հետազոտության և բիզնեսի միջև։ Այս համագործակցությունը կարևոր է նաև այն տեսանկյունից, որ ծրագրի շահառուները ոչ միայն կունենան հնարավորություն զարգացնելու իրենց ձեռնարկատիրական ունակությունները, այլև ստեղծելու բիզնես նախագծեր, որոնք կունենան սոցիալական պատասխանատվության հստակ տարրեր»,- նշեց ԵՊՀ ռեկտոր Հովհաննես Հովհաննիսյանը։

«Կրթութունը եղել և մնում է մեր ընկերության կորպորատիվ սոցիալական պատասխանատվության առաջնային ուղղությունը։ Ուստի մենք բարձր ենք գնահատում ԵՊՀ-ի և ՁԻՀ-ի հետ այս համագործակցությունը։ Համոզված ենք, որ այս ծրագրի մեկնարկը կունենա մեծ ազդեցություն ուսանողների շրջանում ձեռներեցության զարգացման գործում։ Կարևոր է նաև նշել, որ ծրագրի իրագործմամբ ցանկանում ենք նաև ուսանողների ուշադրությունը սևեռել ՄԱԿ-ի Կայուն զարգացման նպատակների ուղղությանը, ինչը խիստ արդիական է»,- ասաց «Ցե-Կվադրատ Ամպեգա Ասեթ Մենեջմենթ Արմենիա» ընկերության տնօրեն Արման Վարդանյանը։

«ՁԻՀ-ը ստարտափների աջակցման և դրանց էկոհամակարգերի ստեղծման մեծ փորձ ունի։ Այս ծրագիրը առանձնահատուկ է նրանով, որ ինկուբացիոն գործընթացն իրականացվում է հենց ակադեմիական միջավայրում։ Այս առումով համագործակցությունը ԵՊՀ-ի հետ մեզ համար շատ կարևոր է։ Չափազանց կարևոր է նաև սոցիալական պատասխանատվության սկզբունքներով ստարտափների ստեղծման գործընթացը»,- հավելեց ՁԻՀ-ի ներկայացուցիչ Ա․ Խաչատրյանը։

Տեղեկացնենք, որ ֆինանսավորման նպատակով լավագույն գաղափարները կդիտարկվեն «Ցե-Կվադրատ Ամպեգա Ասեթ Մենեջմենթ Արմենիայի» սոցիալական ֆոնդի կողմից։