Հայտնի են 2025-2026 ուստարվա ԵՊՀ անվանական կրթաթոշակառուները: ԵՊՀ տնտեսագիտության և կառավարման ֆակուլտետի չորս ուսանողներ՝ Անի Հովհաննիսյանը, Բենիկ Բալայանը, Ադրինե Ավետիսյանը և Անի Ամիրխանյանը, արժանացել են ԵՊՀ անվանական կրթաթոշակի՝ բարձր առաջադիմության, ուսանողական ակտիվության և համալսարանական կյանքին մասնակցության համար։
Երևանի պետական համալսարանը խրախուսում է ուսանողների նախաձեռնողականությունը և մասնագիտական աճը՝ ստեղծելով միջավայր, որտեղ գիտելիքը համադրվում է արժեքների, թիմային աշխատանքի և առաջնորդական մտածելակերպի հետ։ ԵՊՀ տնտեսագիտության և կառավարման ֆակուլտետի ուսանողական համայնքը հայտնի է իր ակտիվությամբ: Այստեղ յուրաքանչյուր ուսանող ունի հնարավորություն ինքնադրսևորվելու, մասնակցելու գիտական, հասարակական և մշակութային նախաձեռնությունների՝ կերտելով իր մասնագիտական ուղին։
Բակալավրիատի «Կառավարում» կրթական ծրագրի 3-րդ կուրսի ուսանող Բենիկ Բալայանը, որը միաժամանակ ֆակուլտետի Ուսանողական խորհրդի նախագահն է և ֆակուլտետի ամենաակտիվ ու նախաձեռնող ուսանողներից մեկը, համոզված նշում է. «ԵՊՀ-ում ամենաարժեքավորը մարդիկ են՝ դասախոսները, ընկերները, նաև այն միջավայրը, որտեղ ձևավորվում է մտածողություն, պատասխանատվություն ու առաջնորդական մտածելակերպ։ Համալսարանը ոչ միայն գիտելիք է տալիս, այլև հնարավորություն՝ ինքդ քեզ գտնելու և ամեն օր զարգանալու։ Պետք է չվախենալ, պետք է լինել նախաձեռնող, պետք է ոչ միայն սովորել, այլև զարգացնել հարաբերություններ ու հմտություններ։ Համալսարանը լավագույն տեղն է՝ փորձելու, սխալվելու և ավելի ուժեղ դառնալու համար»:
Հարցին, թե ի՞նչ կփոխեիք ձեր որոշումներում, եթե նորից լինեիք առաջին կուրսի ուսանող, և ինչո՞ւ, բակալավրիատի «Կառավարում» կրթական ծրագրի 3-րդ կուրսի ուսանողուհի Անի Հովհաննիսյանը պատասխանում է. «Առաջին կուրսում ամեն ինչ նոր էր՝ նոր միջավայր, նոր մարդիկ, նոր պահանջներ: Հաճախ փորձում էի ամեն ինչ հասցնել միանգամից՝ առանց հասկանալու, թե իրականում որն է ամենակարևորը: Եթե նորից լինեի առաջին կուրսում, ավելի հանգիստ ու գիտակցված կվերաբերվեի ամեն ինչին, կփորձեի ավելի վստահ լինել, չվախենալ սխալներից և ամեն փորձառությունից դասեր քաղել։ Իսկ առաջին կուրսի ուսանողներին կասեի՝ հենց սկզբից սովորելուն լուրջ վերաբերվելը ամենախելացի որոշումն է։ Սովորելը միայն գնահատականի կամ քննության համար չէ. դա այն է, ինչ քեզ ձևավորում է որպես մասնագետ ու մտածող մարդ»։
ԵՊՀ տնտեսագիտության և կառավարման ֆակուլտետի ուսանողները գնահատում են համալսարանի միջավայրը, որը տալիս է ոչ միայն գիտելիք, այլև հնարավորություն ինքնակրթվելու, զարգանալու և ձեռք բերելու նոր փորձառություններ։ Ուսանողները հաճախ միայն բարձր կուրսերում են լիարժեք գիտակցում, թե որքան կարևոր է համալսարանի ընձեռած հնարավորություններից լիարժեք օգտվելը։
Բակալավրիատի «Ֆինանսներ» մասնագիտության կրթական ծրագրի 4-րդ կուրսի ուսանողուհի Անի Ամիրխանյանի համար անվանական կրթաթոշակ ստանալը նոր մոտիվացիա է՝ շարունակելու սովորել նույն հետևողականությամբ, ավելի մեծ նվիրումով և զարգացնելու մասնագիտական կարողություններ։
«ԵՊՀ-ն քեզ հնարավորություն է տալիս հավատալու, որ յուրաքանչյուր ուսանող կարող է իր ներդրումն ունենալ համալսարանական կյանքում գիտական աշխատանքի, ուսանողական նախաձեռնության կամ պարզապես հետաքրքրասիրության միջոցով։ ԵՊՀ-ն պարզապես համալսարան չէ. այն մի վայր է, որտեղ մենք գտել ենք ինքներս մեզ որպես մտածող, որպես մարդ և որպես ապագա մասնագետ, որը ցանկանում է իր ներդրումն ունենալ երկրի զարգացման գործում»,- նշում է ավարտական կուրսում սովորող ուսանողը:
Ֆակուլտետի ուսանողներից շատերը ակտիվորեն օգտվում են համալսարանի ընձեռած լայն հնարավորություններից՝ սկսած մասնագիտական զարգացման և միջազգային ծրագրերի մասնակցությունից մինչև մենթորական նախաձեռնություններ ու պրակտիկաներ պետական կառույցներում, ֆինանսական ոլորտի և մասնավոր հատվածի հայտնի կազմակերպություններում։ Այն փաստը, որ ֆակուլտետի ուսանողների գերակշիռ մեծամասնությունը աշխատում է ընտրած մասնագիտությամբ, լավագույն վկայությունն է, որ ֆակուլտետի կրթական միջավայրը արդյունավետ է և համապատասխանում է աշխատաշուկայի պահանջներին։
Բակալավրիատի «Ֆինանսներ» մասնագիտության կրթական ծրագրի 4-րդ կուրսի ուսանողուհի Ադրինե Ավետիսյանը նույնպես հորդորում է նորեկներին ակտիվ լինել:
«Առաջին կուրսի ուսանողներին խորհուրդ կտայի չվախենալ «նոր»-ից, «անծանոթ»-ից և դժվարություններից։ Սկզբում ամեն ինչ կարող է թվալ բարդ ու անորոշ, բայց հենց այդ փուլում եք դուք կոփվում, հենց այդտեղ է դրվում ձեր ապագա ձեռքբերումների հիմքը։ Լավ կլինի ակտիվ մասնակցել համալսարանական կյանքի գիտական, հասարակական և մշակութային նախաձեռնություններին։ Կարևոր է նաև ձևավորել նոր հմտություններ, շատ ընթերցել և զարգացնել ձեր բոլոր ուժեղ կողմերը։ Յուրաքանչյուր հնարավորություն կարող է դառնալ ձեր ապագա հաջողության սկիզբը: Եթե նորից լինեի առաջին կուրսում, ավելի շատ ժամանակ կհատկացնեի ինքնակրթությանը: Համալսարանական տարիները շատ արագ են անցնում, և յուրաքանչյուր պահ կարելի է օգտագործել առավել արդյունավետ՝ սեփական ներուժը բացահայտելու և նոր հմտություններ զարգացնելու համար»։
ԵՊՀ տնտեսագիտության և կառավարման ֆակուլտետի ուսանողները վստահ են՝ համալսարանն այն վայրն է, որտեղ կարելի է փորձել, սովորել և կայանալ որպես մասնագետ ու անհատ։ Նրանց պատմությունները վկայում են, որ ԵՊՀ-ում հաջողությունը հասանելի է յուրաքանչյուրին, ով պատրաստ է բացահայտելու իր ներուժը և քայլելու զարգացման ճանապարհով։
