ԵՊՀ ՈՒԳԸ-ն ամփոփել է անցնող կիսամյակը

1947 թվականից գործող ՈՒԳԸ գիտական խորհուրդը, արժևորելով ուսանողական կառույցի զարգացման գործում ներդրում ունեցող անդամների աշխատանքը, վերջիններիս պարգևատրել է հուշամեդալներով ու արծաթե մեդալներով: 

Պարգևատրվել են ՈՒԳԸ հանձնաժողովների տարբեր տարիների նախագահներ։ Վերջիններիս թեկնածությունները քննարկվել և ՈՒԳԸ գիտական խորհրդի անդամների հավանությանն են արժանացել դեռևս կիսամյակի սկզբում գումարված արտագնա նիստի ընթացքում։

Պարգևատրվել են Տեղեկատվական հանձնաժողովի նախագահ Մարինե Մկրտչյանը, Ընդհանուր հարցերի հանձնաժողովի նախագահ Կարեն Ղազարյանը, Թարգմանական հարցերի հանձնաժողովի ռուսերենի գծով նախագահ Մարինե Մարգարյանը և նույն հանձնաժողովի անգլերենի գծով նախագահ Ֆարիդա Խաչատրյանը։ 

«Թեպետ այլևս ուսանող չեմ, բայց մինչ օրս ջերմությամբ եմ հիշում ուսանողական տարիներս, ինչի համար առավելապես շնորհակալ եմ Ուսանողական գիտական ընկերությանը։ Պատահական չէ, որ համալսարանի մասին խոսելիս առաջին հերթին հիշում եմ ՈՒԳԸ ընկերներիս ու կառույցում ունեցած հիշողություններս։ Շնորհակալ եմ այս գեղեցիկ, բայց միևնույն ժամանակ պարտավորեցնող պարգևի համար»,- ընդգծել է Մարինե Մարգարյանը։

Ուսանողական գիտական ընկերության առաջին հուշամեդալներով են պարգևատրվել ՈՒԳԸ փոխնախագահ Դավիթ Սարգսյանը, քարտուղար Կարինե Քամալյանը, Արտաքին կապերի հանձնաժողովի նախագահ Իրինա Մեհրաբյանը, Տեղեկատվական հանձնաժողովի նախագահ Մարինե Մկրտչյանը, Ընդհանուր հարցերի հանձնաժողովի նախագահ Յուրի Բալույանը, Թարգմանական հարցերի հանձնաժողովի անգլերենի գծով նախագահ Ֆարիդա Խաչատրյանը, նույն հանձնաժողովի ռուսերենի գծով նախագահ Կարապետ Թադևոսյանը։ ՈՒԳԸ հուշամեդալով պարգևատրվել է նաև Արտաքին կապերի հանձնաժողովի նախկին նախագահ Նարեկ Ավետյանը:

Հուշամեդալներ են հանձնվել նաև Կենսաբանության ֆակուլտետի ՈՒԳԸ նախագահ Նարե Դարբինյանին, Ֆիզիկայի ինստիտուտի ՈՒԳԸ նախագահ Սուսան Գևորգյանին, ինչպես նաև ֆակուլտետային ՈՒԳԸ-ների արդեն նախկին նախագահներ Անահիտ Ջիլիկյանին (Քիմիայի ֆակուլտետ), Էլեն Ասատրյանին (Իրավագիտության ֆակուլտետ), Կարինե Առաքելյանին (Միջազգային հարաբերությունների ֆակուլտետ), Անահիտ Սվազյանին (Տնտեսագիտության և կառավարման ֆակուլտետ), Սյուզաննա Դանիելյանին (Փիլիսոփայության և հոգեբանության ֆակուլտետ) և Հրածին Հովակիմյանին (Սոցիոլոգիայի ֆակուլտետ)։

ՈՒԳԸ զարգացման գործում ունեցած բացառիկ դերակատարության, մեծածավալ աշխատանքի համար ՈՒԳԸ նախագահին հանձնվել է պատվոգիր։

«Հպարտ եմ մեր միասնական թիմով: Հատկապես ուրախ եմ, որ տարբեր ֆակուլտետներում արձանագրվող հաղթանակներով մեզանից յուրաքանչյուրն է ուրախանում: Ոգեշնչելով մեկս մյուսին՝ մենք ձգտում ենք ավելիին։ Սա վկայում է, որ կառույցում առողջ մրցակցություն է»,- կարևորել է ՈՒԳԸ նախագահը։

Հետայդու պատվոգրերի են արժանացել նաև ֆակուլտետային այն ՈՒԳԸ-ները, որոնք ծավալել են կիսամյակային ակտիվ գործունեություն: Ըստ այդմ՝ այս տարի առաջին հորիզոնականում են ԵՊՀ միջազգային հարաբերությունների ֆակուլտետի և Ֆիզիկայի ինստիտուտի ՈՒԳԸ-ները։ Գերազանց գործունեության գնահատման սանդղակում հաջորդիվ Աշխարհագրության և երկրաբանության, Փիլիսոփայության և հոգեբանության, Պատմության, Իրավագիտության, Ժուռնալիստիկայի և Կենսաբանության ֆակուլտետներն են:

Հավելենք՝ առաջիկայում կյանքի են կոչվելու ՈՒԳԸ առավել մասշտաբային ծրագրեր՝ «ՍոցՔեմփ»-ը, «Հոգեբանական ճամբար»-ը և «ՈՒԳԸ ամառային դպրոց»-ը, որի շրջանակում Երևան կժամանեն ՈՒԳԸ միջազգային գործընկերներ Լոնդոնից, Կիպրոսից, Մոլդովայից, Ռուսաստանից և այլ երկրներից։