YSU wraps up its participation in T4GREEN project

Yerevan State University has successfully completed its participation in the Erasmus+ Capacity Building project T4GREEN, which aims to transform teacher education in Armenia and Moldova by making it modern, competitive, and aligned with the demands of the green and digital transitions.

«T4GREEN» («Transforming Teacher Education for Green and Digital Transition in Armenia and Moldova») ծրագիրը մեկնարկել է 2024 թվականին՝ միավորելով Հայաստանի և Մոլդովայի առաջատար համալսարանները, կրթական կազմակերպությունները, նախարարությունները, ինչպես նաև եվրոպական գործընկերներին Պորտուգալիայից, Չեխիայից և Իսպանիայից։ Այս համագործակցությունը հնարավորություն է տվել համադրելու ազգային առանձնահատկությունները եվրոպական փորձի հետ և մշակելու ուսուցչական կրթության նոր մոդելներ, որոնք ուղղված են ուսուցիչների նոր սերնդի պատրաստմանը։

Երևանի պետական համալսարանի մասնակցությունն ու նախաձեռնությունները

Ծրագրի տարբեր փուլերում ԵՊՀ թիմը մասնակցել է միջազգային հանդիպումների և վերապատրաստումների։ 2024 թվականի սեպտեմբերին Պորտուգալիայի Կովիլհա քաղաքում համալսարանականները ներկայացրել են Հայաստանի և Մոլդովայի կրթական համակարգերի համեմատական վերլուծությունը և քննարկել ուսուցչական կրթության հիմնախնդիրները։

Նույն տարվա դեկտեմբերին Չեխիայի Բռնո քաղաքում ուսումնասիրվել են ներառական կրթության, թվային գործիքների և «կանաչ» անցման եվրոպական փորձերը։

2025-ի հունիսին Իսպանիայի Վալյադոլիդ քաղաքում քննարկվել են STEM-ի, օտար լեզուների և կրթական չափորոշիչների բարեփոխումները՝ համադրելով հայկական և մոլդովական փորձը եվրոպական լավագույն մոդելների հետ։

ԵՊՀ-ն ծրագրի ընթացքում կատարել է մի շարք բարեփոխումներ։ Վերանայվել են առարկայական ծրագրերը և դրանց նկարագրիչները՝ ներառելով թվային տեխնոլոգիաների և միջառարկայական մոտեցումների բաղադրիչներ։ Դասավանդման գործընթացում ներդրվել են ինտերակտիվ և նախագծահենք մեթոդներ, կազմակերպվել են դասախոսների վերապատրաստումներ՝ ուղղված թվային գործիքների կիրառմանը և «կանաչ» օրակարգի ինտեգրմանը։ Բացի դրանից՝ ԵՊՀ կրթական ծրագրերը համեմատվել են եվրոպական առաջատար համալսարանների փորձի հետ՝ լավագույն լուծումները ներմուծելու նպատակով։

Նոր մոդելներ և ձևավորված մոտեցումներ

«T4GREEN»-ի շրջանակում ԵՊՀ-ում ձևավորվել են ուսուցման նոր ուղղություններ և մոդելներ։ Դրանցից մեկը «կանաչ» դասավանդումն է, որը նախատեսում է բնապահպանական և կայուն զարգացման սկզբունքների ինտեգրում կրթական գործընթացում։ Մյուսը թվային ուսուցումն է, որի շրջանակում դասավանդման մեջ ներգրավվել են նորագույն տեխնոլոգիաներ՝ արհեստական բանականություն, մեծ տվյալների վերլուծություն, GIS, ինչպես նաև AR/VR լուծումներ։ Զարգացվել են նաև միջառարկայական կապերը, որոնք միավորում են կենսաբանությունը, էկոլոգիան, տեխնոլոգիաներն ու ինֆորմատիկան՝ ստեղծելով միավորված կրթական միջավայր։

Հեռանկարներ և հաջորդ քայլեր

ԵՊՀ-ն նախատեսում է շարունակել ուսուցչական կրթության բարեփոխումները՝ հիմնվելով «T4GREEN» ծրագրի ընթացքում կուտակված փորձի վրա։ Առաջիկայում նախատեսվում է կազմակերպել դասախոսների նոր վերապատրաստումներ՝ ուղղված թվային գործիքների և կայուն զարգացման բաղադրիչների ինտեգրմանը, վերանայել առարկայական նկարագրիչները՝ դրանք համահունչ դարձնելով եվրոպական չափանիշներին, ընդլայնել լաբորատոր և կիրառական աշխատանքները, ինչպես նաև խթանել ուսանողների ներգրավվածությունը միջազգային կրթական միջավայրում։

«T4GREEN» ծրագրին մասնակցությունը դարձավ նշանակալից քայլ ԵՊՀ-ի համար՝ ուսուցչական կրթությունը եվրոպական չափանիշներին համապատասխանեցնելու առումով։ Ծրագրի ընթացքում կատարված փորձարարական վերանայումներն ու նոր դասընթացները ցույց տվեցին, որ ԵՊՀ կրթական համակարգը պատրաստ է նորարարական փոփոխությունների։

ԵՊՀ մանկավարժության և կրթության զարգացման կենտրոնի դասախոս Լիլիթ Սարգսյանի խոսքով՝ «T4GREEN» ծրագրին մասնակցությունը դարձել է բացառիկ մասնագիտական փորձառություն և զարգացման հնարավորություն։ Նրա խոսքով՝ ծրագրի ընթացքում ձեռք բերած գիտելիքները և թվային ու «կանաչ» օրակարգերի վերաբերյալ հմտությունները հնարավորություն են տվել վերանայելու դասավանդման բովանդակությունն ու ձևաչափը՝ ներառելով նախագծային ուսուցում, թվային գործիքներ և միջառարկայական համագործակցություն։ Լ․ Սարգսյանն ընդգծեց, որ այս փորձը ոչ միայն նպաստել է իր մասնագիտական աճին, այլև դարձել է ամբիոնի ընդհանուր զարգացման շարժիչ ուժը։

ԵՊՀ կենսաբանության ֆակուլտետի մարդու և կենդանիների մորֆոլոգիայի ու ֆիզիոլոգիայի ամբիոնի վարիչ, դոցենտ Աննա Կարապետյանի գնահատմամբ՝ «T4GREEN» ծրագիրը բացառիկ հնարավորություն էր հասկանալու և կիրառելու այն ուղիները, որոնց միջոցով հնարավոր է համատեղել «կանաչ» և թվային փոխակերպումները ուսուցչական կրթության մեջ։ Ըստ նրա՝ ծրագրին մասնակցությունը խորացրել է իր պատկերացումները այն մասին, թե ինչպես կարելի է համադրել կենսաբանությունը, տեխնոլոգիան, ֆիզիկան և քիմիան միասնական ինտեգրատիվ ուսումնական մոդելում և ուսանողին դարձնել ոչ թե պարզապես տեղեկություն ստացող, այլ վերլուծող ու լուծումներ ստեղծող մասնագետ։

ԵՊՀ ներկայացուցիչները համոզված են՝ ծրագրի հաջող իրականացումն ապացուցեց, որ կրթական բարեփոխումների հաջողությունը մեծապես կախված է հենց ուսուցչի պատրաստակամությունից՝ լինել փոփոխության շարժիչ ուժը։

«T4GREEN»-ը ԵՊՀ-ում ձևավորեց այդ մոտեցումը՝ դարձնելով դասախոսներին ոչ միայն գիտելիք փոխանցող, այլև նորարարությունը խթանող մասնագետներ։