Georgian Minister of Education, Science and Youth discusses ways to expand academic collaboration at YSU

Քննարկմանը մասնակցում էին ԵՊՀ ռեկտոր Հովհաննես Հովհաննիսյանը, ՀՀ ԿԳՄՍ նախարարի տեղակալ Արթուր Մարտիրոսյանը և Պատմության ֆակուլտետի պրոֆեսորադասախոսական կազմը։

ԵՊՀ ռեկտոր Հովհաննես Հովհաննիսյանը Վրաստանից ժամանած պատվիրակությանը ներկայացրեց համալսարանում վրացագիտության զարգացման ուղղությամբ տարվող աշխատանքներն ու տարեցտարի այդ առարկայի նկատմամբ ուսանողների շրջանում հետաքրքրության նկատելի աճը: 

Հովհաննես Հովհաննիսյանն ընդգծեց Պատմության ֆակուլտետում գործող Վրացագիտության կենտրոնի հիմնական գործունեությունը, որը ներառում է գիտական հետազոտությունների, կրթական ծրագրերի իրականացում. «Պատմության ֆակուլտետի «Կովկասագիտություն» կրթական ծրագրի շրջանակում անցկացնում ենք վրացերենի դասընթացներ։ Ներգրավված ենք նաև տարբեր փոխանակման ու գիտահետազոտական ծրագրերում։ Ակնկալում ենք, որ մեր համագործակցությունը կշարունակի ընդլայնվել և ամրապնդվել»։

Պատմության ֆակուլտետի դեկան Մխիթար Գաբրիելյանն ընդգծեց, որ ԵՊՀ-ում ավելի քան տասը տարի է, ինչ ուսանողները հնարավորություն ունեն սովորելու «Կովկասագիտություն» բակալավրիատի ծրագրով, որի կարևոր բաղադրիչներից է Վրաստանի պատմության, մշակույթի, լեզվի ուսուցումը. «Իսկ «Կովկասագիտություն» մագիստրոսական ծրագրի շրջանակում առավել դետալային են ուսումնասիրվում թե՛ Վրաստանի պատմությունն ու մշակույթը, թե՛ լեզուն: Պետք է նշեմ նաև, որ արդեն երկրորդ տարին է, ինչ ԵՊՀ-ում իրականացվում է «Վրացագիտություն» մագիստրոսական ծրագիրը, և հաջորդ տարի արդեն կունենանք շրջանավարտներ»: 

Մխիթար Գաբրիելյանը միջպետական համագործակցության շրջանակում առաջարկեց կազմակերպել ուսանողների փոխանակման ծրագրեր, ամառային ու ձմեռային ճամբարներ: Դեկանը ԵՊՀ-ում վրացագիտություն ու Վրաստանի բուհերում հայագիտություն ուսումնասիրող մագիստրանտների համար կարևորեց փոխանակման ծրագրերը, որոնց շրջանակում նրանք մեկ կիսամյակ կկարողանան զարգացնել լեզվի իմացության մակարդակը Վրաստանում և Հայաստանում: 

Ակադեմիական կապերի զարգացման համար առաջարկվեց նաև Վրաստանի բուհերի ասպիրանտուրայի հայագետներին հնարավորություն ընձեռել թեկնածուական ատենախոսությունը պաշտպանելու ԵՊՀ-ում, իսկ ԵՊՀ ասպիրանտուրայի վրացագետներին՝ Վրաստանում: Ընդգծվեց նաև գիտահետազոտական համատեղ նախագծերի իրականացման անհրաժեշտությունը:

Վրաստանի կրթության, գիտության և երիտասարդության նախարար Գիվի Միկանաձեն, կարևորելով ԵՊՀ-ում վրացագիտության զարգացման ուղղությամբ տարվող քայլերը, հիշատակեց, որ ԵՊՀ-ում նախորդ տարի Վրացագիտության կենտրոնի բացման արարողությունից մինչ օրս Վրաստանից պաշտոնական մակարդակով չորս այցելություն է կատարվել. «Մենք արժևորում ենք այն հանգամանքը, որ Վրացագիտության կենտրոնը զարգանում է, ընդլայնում գործունեության շրջանակը, ինչը մեր երկու երկրների համար կարևոր հանգամանք է»: 

Նախարարը հավանության արժանացրեց ուսանողների ամառային և ձմեռային ճամբարների անցկացման, ինչպես նաև մագիստրանտներին մեկ կիսամյակ փոխանակման ծրագրերում ներառելու ու կրկնակի դիպլոմի ծրագրի գաղափարները: Ինչ վերաբերում է թեկնածուական ատենախոսությունների պաշտպանությանը, Գիվի Միկանաձեն ընդգծեց, որ այն կդիտարկվի համապատասխան իրենց օրենսդրական փոփոխությունների: 

Վրաստանի կրթության, գիտության և երիտասարդության նախարարի խոսքով՝ ակնկալվում է ստեղծել ՀՀ ԿԳՄՍ և Վրաստանի ԿԳԵ փոխնախարարների աշխատանքային խումբ՝ երեք ամիսը մեկ հանդիպելու և ակնկալվող ծրագրերի իրականացումը քննարկելու: 

Հանդիպման ավարտին Վրաստանի կրթության, գիտության և երիտասարդության նախարար Գիվի Միկանաձեն ԵՊՀ-ին նվիրեց Վրաստանի պատմության դասագրքերի մի քանի օրինակներ: